[layerslider id=”6″]
Morem vam reči da ne znam otkod bi se hapil otkak sam smo se minuli tjeden rezišli jerbo se hajdi sega pripetilo. Em smo pobedili Engleze i došuljali smo se onak pomalem, ali sigurno, vu finale Sveckoga labodoritaškoga prvenstva. Englezi so se v one dneve predi naše tekme v sredo furt puhali i nose v zrak držali, ali jim je to ne bogzna kaj pomoglo. Oni so prvi zabili, mi pak smo zadnji, a zna se odnavek što je zadji jegova je i puca i tak smo se mi, mic po mic, dosmickali do finala. Još sam vam minuli tjeden rekel da Englezi znajo kaj jiv čaka i zato so ne selili finale Vimbledona jerbo so znali kaj jiv čaka. Englezima je to tak teško palo kaj so posle zgubili i od Belgije za tretje mesto tak da so odišli dimo z drvenom želencijom. Neje jim se spunila želja kaj bi posle 42 leti pak nekaj osvojili kak 1966. leta dok so bili prvaki sveta, a labodoritaško prvenstvo je bilo v Engleskoj. Oni stareši se bodo zmislili da so Englezi pobedili i to tak kaj jim je sodec priznal gola štero ga so ne zabili. Unda ga ne bilo špijunov z VAR-om.
Par dni pred finalom naš kapetan Luka Modrić je nam Međimorcaj poslal poruku prek Fejsbuka: – Međimorci, spijte si jenoga za finale! Kuliko sam mel za čuti toga je vpotil Dražen Ladičov, naš golman z 1998. leta i Daličov pomočnik. Ne zna Luka kulikopot smo ga poslušali.
Ne znam kaj bi vam mogel reči o finalo nas i Francozov, a kaj ste još ne čuli ili pak vidli. Pol nas Hrvatov je bilo pred telkačaj, a druga polovica je zalukavala kaj se bode pripetilo v Moskvi jerbo je ne mela živce kaj bi gledala kak bodemo zišli. Kaj bodem vam rekel, naši Vatreni so igrali nejbole do unda na prvenstvo, ali so soci fučkali onak kak je jim i Francozima pasalo pak so Francozi zabivali i na se zadje so naši dečki odišli po riti k meši. No, nebrem to ruon tak reči jerbo je naša srebrna želencija zlatnoga sjaja tak da smo si mi v Lepoj našoj, a i naši zemljaki po celomo sveto zadovoljni z tem kaj smo postigli. Božek je bil na našoj strani se do te zadje nedele, a unda nas je pustil same i neje predi tekme zašpotal soce i se je završilo kak je završilo. Nas Hrvatov je nekaj prek štiri milijone, a Francozov je nekaj vejč o 67 milijonov, mi smo bili bolši od jiv, bole smo igrali sam so oni na krajo pobedili. Nama lepota, a jim pehar sveckoga prvaka. Sakomo nekaj.
Si so priznali da smo mi bili bolši, da smo mi trebali pobediti. Čak so nam i Englezi to priznali. I naše „Oko sokolovo“, Mateo Beusan, je zašinfal soca Pitano unda znate kak je sodec fušal. Se je bilo na našoj strani, a sam je pehar bil na Francuskoj. Morete si misliti kuliko so te srebrne želencije značile našoj precednici Kolindi štera je žrtvovala i precedničko fizuro dok je po dežđo čestitala našim „vatrenim“ herojima.
Prek deset jezer naših zemljakov se je na se mile načine doteplo v Moskvo na finalno utakmico tak da so i Rusi priznali da je jiv Črleni plac još nigdar ne bil tak črleni kak je bil to nedeljo. Ve so i Rusi vidli kak zgledijo te naše črlene „kockice“.
Ne sam da smo Ajfelovoga turna prefarbali v črlene kockice nek smo i nešterne Kineze pofarbali na kockice. Tu sam mislil na naše Slavonce šteri so i svoje kineske traktore oblekli v kockasto obleko. Kuliko vidimo si šteri so se v to vreme labodoritaškoga „ludila“ našli v Lepoj našoj bili so prefarbani v črleno-bele kockice.
Drugi den vjutro, predi nek so se naši labodoritaši stali je stigla čestitka z Vatikana za osvojeno drugo mesto. V čestitki je pisalo: – Hrvati, nejte se preveč sekerati, pak je i Papa Ivan Pavao bil drugi!
Javil se je znova i četnik Jovo z Pančeva: – Ustaše, svaka vam čast kak igrate. Nebrem vas videti, ali navijal sam za vas. Ve ste i nam Srbima pomogli kaj postignemo nejvekšega uspeha u povjesti (rekel je: istoriji) našega labodoritanja (rekel je: fudbala), mi smo ve prvi sosedi sveckoga doprvaka. Oni to nigdar nej bili da ga ne nas!
Štel to on priznati ili ne, ali si gruntam kak je odlehlo našemo malo starešemo pevačo, ali ne starešemo od Mišija Kovača, Duškijo Lokino, šteri je obečal da bode svojo periko z glave hitil v staro kramo ak bodo naši dečki nejbolši na sveto. Kuliko vidimo glava mo je ostala na plečima, a perika na glavi. Nebremo reči, Duško je dal se od sebe. Još vejč od toga. Nikak se te perike nebre rešiti.
V pondelek smo se si prepravlali kaj dočakamo naše srebrno-zlatne Vatrene dok so se vrnuli z „safarija“ po Rusiji. Morem vam reči da se nabralo prek pecto jezer Hrvatov po cestama od aerodroma Pleso vu Velikoj Gorici do Jelačič placa. Sedem vur so dečki putuvali z busom kaj so prešli teh sedem kilometrov. To je nejdukših sedem kilometrov na sveto. Pitate me zakaj tak dugo? Dok vam rečem da so žene vozile buse unda bode vam se jasno i več nikaj ne bodete pitali. Vništile so i jeno busa, očem reči, skurile so jeno kuplung lamelo, ali koga je to brige, nejglavneše je da so se dečki ipak, još v pondelek, dopelali na Jelačič plac de je bilo prek sto jezer Hrvatov i Hrvatina. A bilo je prek jezero Međimorcov. Bilo bi jako grdo da smo i mi ne meli tam svoje „igrače“.
Dugo so si naši političari gruntali kaj bi te „srebrni“ pondelek bil neradni dan, ali so to ne vupali naprajti. Baš škoda, pak ionak je nišči nikaj ne delal. Prek pecto jezer je bilo v Zagrebo, a prek milijon je sedelo pred telkačima, gledalo prenosa, trosilo pive, žvekalo roštilja, odojke, janjetino… Te den smo mi Hrvati bili složni kak nigdar, nigdi svaje, nigdi jala.
Ovi v Zagrebo so preprajli lepoga dočeka, se so zorganizerali sam so ljudi ne meli kaj jesti i piti. A mortik je to bilo jako spametno jerbo da je bilo dosti pijače posle bi nucali i šekrete šterih ga, ruon tak, ne bilo. Kuliko smo vidli i doček je napravlen v produžetkima. To je našim labodoritašima ostalo z Rusije i nejso se tak lefko mogli toga odevčiti.
Celi svet je priznal naše Vatrene. To smo čitali, čuli i vidli, a ne znati je li so jiv priznali si v Lepoj našoj. Kaj bi čovek rekel za one šteri so se posle zgube vu finalo od Francozov veselili: – Saka rit dojde na šekret.
Ne znati kaj bi čovek rekel za glavnoga „seljaka“ Krešija Beljaka šteri je Tomsona jako grdo pofljučkal v busu z našim Vatrenima. Rekel je: – Mora mi fašističko smetje pokvariti dneva. Ipak so naši labodoritaši ne uspeli pomiriti se Hrvate. To kaj je Beljak napravil to je niti z kruhom ne dobro. A to kaj je on Vatrenima kvaril jivo fešto to nikomo nikaj. Nešternima, kuliko vidimo je nikaj ne svato.
Neje v penezima (popevli: v šoldima) se, popevali so naši Vatreni na glavnomo zagrebečkomo placo. Popevali so labodoritaši, pevači, težaki, kulaki, tajkuni, bokci, oni na minimalco, oni na čakanjo, oni na burzi, oni blokerani, ovršeni… Ako je pesma za se unda je red da jo i si popevlejo.
Francoski labodoritaši so doleteli z Rusije v Pariz dve vure posle Vatrenih. Oddelali so dočeka, prijema pre precedniko i još so zadje dve vure ftegnuli gledati doček vatrenih v Zagrebo.
Štef se je z Tončijom pelal z Varaždina v Čakovec z dočeka trenera Zlatkija Daliča. V Nedeliščo so ga zastajli policaji i vidli so kuliko je vur jerbo je črez oblok auta pahnulo nejmeje dva promila nedopuščene duhe. A Štef i Tonča so bili zažarjeni kak da so vuzmenko kurili. Kak je i red policaji so poluknuli v papere, još jempot globoko poglednuli Štefa, a unda i Tončija i lepo so rekli Štefo nek se ne srdi, da se razmijo, ali kaj nej došlo do nekšega unfala, morajo ga isključiti z prometa. – Dečki, nekak zteška je zgovoril Štef – najte to delati, pak jedva sam se uključil vu Varaždino. Tonča je ne mogel zmagaditi: – Istina, dečki, ak je Štef da govoril istino, ve je ne zlagal. Dobro vuro nam je trelo kaj smo se ušaltali!
