Kaj bi mi bez garde??
Minuli tjeden smo mi Međimorci preslavili Den županije i obiležili spomenden Zrinskih i Frankopana. Najme kaj, naša županija si je den da so 30.aprila v Bečkomo Novigrado sfondani naš velikani, hrvatski ban Petar Zrinski i jegov šogor Fran Krsto Frankopan, zela za svoj Den županije. Ovo leto je obiležavanje toga dneva, šteri se več 11 let slavi kak Spomenden, a tak so to rekli naši saborniki 2011.leta., bilo posebno svetešje jerbo se je nejpredi otkrival spomenik na mesto zločina v Bečkomo Novigrado, šteroga je postajla naša čakoska Zrinska garda, a celi minuli tjeden se je slavil Den županije. Posebno svetešje je bilo v soboto, na sam Den županije, da je Zrinska garda dopelala v Čakovec još dvajsti postrojbi z sakefele krajov Lepe naše, a bile so i postrojbe naših sosedov z Mađarske. Bila je to prva smotra posle tri leti otkak nam je takše velike fešte zabranila korona štera je hercuvala ne sam z našim Međimorjom, ne sam z Lepom našom nek i z celim svetom. Kak sam več rekel bil je pun Čakovec sakefele gardistov i postrojbi, a bilo jiv je cirka okoli sto i mogli smo jiv videti na mimohodo po čakoskim vulicama, mogli smo jiv videti v cirkvi pre meši, štero je služil naš i varaždinski biskop Bože Radoš, mogli smo jiv videti posle dok so davali prijavke našemo međimorskomo župano za Den županije na glavnomo čakoskomo trgo, mogli smo jiv videti dok so metali vence i vužigali sveče pre spomeniko poginulim i nestalim našim međimorskim branitelima v Domovinskomo rato i tak obiležili obletnico, i to 27., VRO Bljesak i na se zadje smo jiv mogli videti pre spomeniko Oproštaj, šteroga je garda postajla v dvoriščo Staroga grada de so postajli vence, vužgali sveče i pomolili so se za se one štei so dali svoje živote za Lepo našo od negda pak do denes. Pomolili so se i za županijo kaj bode i dale išla napre kak je to bilo do ve.. Lepo je bilo videti se kaj nam je preprajla Zrinska garda i zato jim moramo zafaliti. Morem vam reči da so se postrojbe bile fajne, ali naši gardisti so bili nejfajneši jerbo so meli nove oprave, nove kape, nove čižme i nove sablje. Ne moram vam niti govoriti da so naši dečki bili jako fajni. Oni so navek fajni, ali za den županije so se zlišpali i bili so nejfajneši. Fala gardi i fala gardistima. Nam preostaja kaj se bodemo i dale štimali žnjimi.
Kaj bo z precednikom Zokijom?
Ne znati kaj bode z precednikom Zokijom Milanovičom ili kak ga z conom zovejo „šaka z Pantovčaka“ jerbo saki den nekaj novoga doživimo od jega. Saki den so mo na pameti nekše nove huncvutarije i to sakefele. Što god mo se najde na poto on ga nakinči z sem i sačim sam ne z ničim lepim. Nišči se nikaj ne razme kak v politiko tak niti v se drugo, on je jeden jedini šteri se zna. Tak se bar on fali. Mi si znuomo da jeden čovek nebre se znati i nebre biti ruon v semo nejspametneši, ali dok poslušamo Zokija unda dojdemo do toga da je on pobral sa znanja, so pamet, ovoga sveta. I ve na se zadje došel je na tapeto naših psihijatrov. I kaj smo zazvedili? Da je nekaj s Zokijom ne vredo, da je on malo zglajzal ne sam z političke nek i z kulturne štreke. Veli naš poznati psihijatar da kak se ve Zoki kaže da mo nej dal dve nacrtane birke kaj bi mo jiv pazil, a ne kaj bi vodil državo. Najgerek sam, jako sam najgerek kaj bode itak s Zokijom, je li bode zdržal do kraja mandata od pet let na kuliko je zebrani ili bode predi odišel po riti k meši?
Jegovo veličanstvo bažolj
Ve vidite da je of Putinov rat protiv Ukrajine, šteri traje dva i pol mesece, napravil čuda vejč huncvutariji nek je to uspelo koroni za dve i pol leti. Cene plina, struje, nafte, benzina so skočile v nebo, a unda je i se drugo odišlo gori. Znate kak to več ide, štacunari to zovejo „lančana reakcija“ dok jeno podraži odma i se drugo. Tak nam je nejveč podražila hrana. Saki den smo se bogateši jerbo so nam obroki se dražeši. Negda si mogel, onak na brzino, spokati nekšega gableca za dvajsti ili pak još meje kuni, a denes za meje od tridesti kuni dobiš sam praznoga tajera i mesto za stolom. Kak se je to se na pijaco i v špecerajo pošemerilo pokazal nam je i prvi maj, očem reči, bažolj šteri se je več na leta kuhal za te „veliki radnički svetek“. Najme kaj, praznik težakov je bil poznati po bažoljo šteri se je kuhal na se strane. Negda se je kuhal sam ono leto da so bili izbori i on šteri je mel nejbolšega bažolja te je pobedil na izborima, a ve več par let nazaj se bažolj kuha sako leto. Ovo leto je ne ruon tak bilo jerbo se je bažolj kuhal sam tam de so meli peneze. Zakaj peneze? Pak bažolj je tuliko podražil kaj so ga mogli kupiti sam oni malo bole penežlivi. Znate kak je to, pak nebrejo kuhari bažolja to delati zabadav ak je bažolj tak dragi. Saki kuhar šteri drži do sebe je nekaj zaračunal. Sam vam mam rekel da je tu v pitanjo lančana reakcija. Ovo leto je bilo hajdi meje bažolja i prdeti so mogli (čitaj: jesti bažolja) sam oni šteri so meli peneze. Kuliko vidimo i bažolj se je, niti kriv niti dužen zrival med gospodo!?
Svaja pre čakoski vuri
Več hajdi dugo sam ne bil na frakleco i spominko pre čakoski vuri. Kak se vejč pot spominam z tecom Francom tak se meje nucam čakoske dečke. Minuli tjeden sam ipak skočil malo do dečki i mel sam kaj za čuti. Svadili so se okoli nove direktorice naši Međimorski vodi. Si tri so isto govorili, a ipak so se svadili. Si so se složili kak je nova direktorica Međimorskih vodi gospođa Sunčana, ali oni so bili stoprocentno sigurni da je to ova naša Sunčana štera je v Briselo i neje jim nikak išlo v glavo to kak je ve ona došla z Brisela v Čakovec i to v Međimorske vode. Neso oni meli nikaj protiv Sunčane kak direktorice neg jim je to ne išlo v glavo. Zval sam sakomo još jenoga frakleca i dok smo jiv spraznili rekel sam jim da je Sunčana je nova direktorica, ali je ne Glavak nego Glavina. Malo so me čudno gledali, ali so se ne nikaj bunili protiv još jenoga frakleca slivke. Ve vidite, sam dragi Božek me je poslal k čakoski gracki vuri.
