Pupi i pajdašija ipak preslavili Božiča
Kaj sam vam rekel da Pupi i naši sosedi prek Drine ne bogajo nikoga pak niti Evropo tak da so oni preslavili Božiča kak spada. Kak sam vam zadji pot rekel, mi smo ne preslavili Božiča nek vesele blagdane, očem reči, srečne svetke, a unda so nam sosedi za to mlado leto podlečili Lepo Breno i to v obleki kakšo je niti Drakula ne mel dok je hodal večerjo iskat okoli svojega „čardaka niti na nebo, a niti pak na zemli“. No, to neje nikaj ne smetalo Pupija, šteri je niti jenomo našemo cirkvenomo ili pak civilnomo dostojanstveniko (a niti pak Dejano Lovreno) ne čestital niti srečne svetke, a ne kaj bi jim čestital Božiča, ali je zato na svojo večerjo, na svoj Badnjak, pozval maloga Slobo, velikoga četnika i srpskoga vanjskoga ministra, Ivico Dačiča. Žnjim ili pak za jim je došel i glavni šef oliti patrijarh srpske pravoslavne cirkve Porfirije i morem vam reči da so prešli črez Šengen tak kaj jif je nišči ne nikaj pital. Brzčas so meli ausvajze štere jim je shodil Pupi z svojom podprecednicom naše vlade. Kaj smo si posadili to ve i žjemo: imamo naše srečne svetke i jivoga Božiča. Več tjeden dni se teca Franca z menom ne spomina kak da sam ja tu nekaj kriv! Furt krivico rivlem na Pupija, ali ona neče niti čuti za jega.
Što itak zdiže cene i kak tomo stati na kraj???
Najte me krivo razmeti, ali to mi nikak nejde v glavo, kaj god se pripeti na ovomo našemo sveto štacunari zdiguvlejo cene. Ne sam štacunari nek i krčmari, očem reči, si oni šteri nekaj prodavlejo i to tak zdiguvlejo kaj si oni šteri kupuvlejo nebrejo pomoči: došla je korona cene so se počele pomalem smickati na gori kak da so štacunarima odbrojeni dnevi, pak tre čim predi nazobačiti čim vejč i to kuliko god se more. Verjem da ste ne pozabili kak je to bilo pred tri leti dok so cene špeceraja letele v nebo i to tak kaj je i drek paper podražil i to čuda pot vejč nek si je zaslužil. No, kuliko so skočile cene maski, rukavici i sakefele žganicama za dezinfekcijo to je bilo črez bogme, ali si smo bili tiho, nišći je ne gombal, a i si smo kupuvali. Bar Božek da smo meli de kupiti ak smo šteli kaj ostanemo na ovomo našemo sveto i kaj nas ne bodo otpelali na grobiče i to kaj nišči ne bode znal jerbo se je to delalo sam med onom nejvožešom rodbinom ruon onak kak so se komunisti ženili v cirkvaj 1990. leta. Još se korona ne zmirila, cene so malo hejale, ali so Rusi započeli rata v Ukrajinji i pak so cene išle gori i to posebno struja, voda, plin, nafta i benzin. Tu smo si ne nikaj mogli jerbo je počel rat, a ratnim profiterima je još nigdar nišči ne stal na kraj ak ne računamo one v Severni Koreji. Rat se je malo zmiril, a i cene so došle k sebi, a unda je Lepa našla zmenila našo kuno za stranjskoga ojera i cene su tu počele skakati i to v zrak kak da je štacunarima i sima drugima kraj sveta. Dospomenuli smo se i si smo znali da za sedem i pol kuni moremo dobiti jenoga ojera, ali dok smo to preračunavali v cenikima unda nam je navek tak došlo kaj ono kaj je koštalo sedem i pol kuni ve košta ojer i deset i pak još vejč centi. I znate što je za to kriv, kalkulatori, štere smo nabavili za preračunavanje. Čim so došli v naše štacune mam so počeli vleči na gori. I to ne sam na jeni mesti nek seposod kak da so se štacunari dospomenoli. Telefonači pak so ne zdigli mam cene jerbo bi to sima vudrilo v oči nek so oni zmislili indeksacijo i bodo cene zdiguvali ak bode inflacija. A znate da stoprocentno ne bode jerbo ak je ve bila dok smo meli svoje peneze, unda si morete gruntati da ve ne bode dok gospodarimo z ljuckima. Ne bi del roko v ogej jerbo je soseda Barika rekla da je joj navek bole one lepe stvari delati z ljuckim. Ali Bariki nebremo se veruvati jerbo je ona nigdar ne bila kak druga deca.
A kak tomo stati na kraj – to te ja pitam? Najbrž mi je teca Franca nekaj betežna jerbo mi nikaj o tomo nema za reči. To se je još nigdar ne pripetilo. Brzčas je i jo prijela nekša gripa ili pak hetika?
I jejci so podražile….
I jejci so podražile: v kunama so bile faleše, a v ojerima so dražeše. Nikak nebrem razmeti zakaj so ve kokoši zdigle ceno svojim domačim jejcima, a plačamo jiv v stranjskim penezima? Podražila so sam kokšje jejci, a ovim moškim jajcima je pala cena jerbo so na dukšemo cugo nek lani pak meje vredijo. Tak bar velijo one štere se saki den igrajo žnjimi kaj nem pak sosedo Bariko spominjal.
Zazvedil sam, a verjem da je i vam v pamet palo kak je v se zemle Evrope došla zima, a prinas je lepo i toplo vreme, cvetejo jaglaci i visibabe, a se to, se te blagodati, moremo zafaliti spametnoj politiki naše vlade i našega precednika Plenkoviča.
Svetki so minuli, a gableci dočakali školarce
Minoli so božični i novoletni svetki, minolo je i školsko ferje, minolo je i skijanje što je negdi mortik snega našel. Ste vidli otkak je dugoletni zagrebečki gradonačelnik Milan Bandič odišel k Božeko na račun več nti na Sljemeno ne curi sneg tak da niti Snežna skijaška kralica nebre biti prinas na kvarteljo duže od dva dni. Deca so nam znova genula v školo tak kaj nas več ne bodo srdila doma i kaj si bodemo i mi stareši mogli malo počinoti. Deca so v školi dočakal gableci i to topli i za se đake. To je za pofaliti se one šteri so vu gablecima meli svoje prste. Ve sam još tre deco prefčiti kaj bodo jeli ono kaj jim tece kuharice, kaj nem rekel sokačice, spravijo, a ne kaj se bodo zbrčkavali z kuhanim gablecima kak to doma delajo z kuhanim obedima Velijo političari da saki đak mora meti jenoga toploga obroka, to so rekli, a lačno deco štera so ne navčeni žlicom jesti nikaj ne pitajo. Neso denešja deca kak negda mi šteri smo jeli se kaj so pred nas donesli. Kak se penezi i cene mejajo po našim štacunima tak bi se i deca trebala privčiti na kuhane gablece v školskim kuhjama, a ne sam na velike klipiče, male pice, bureke… Ak je več vlada otrgla od svoji gableci po deset kuni, očem reči, 1,33 ojerov unda jiv tre i ponucati.
Najgerek sam, jako sam najgerek kaj nas ne bode naša vlada rescartala: nejpredi lepo vreme po zimi, a unda topli gableci za školsko deco. Ne znati kaj nam prepravljajo.
