Zrinska garda i jeni pajdaši
Čakoski gracki oci so na svojim Internet stranicaj objavili anketo v šteroj pitajo kaj se Čakovčanke i Čakovčanci izjasnijo je li očejo kaj bode naš kardinal i blaženik Lojzek Stepincov, šteroga so komunisti v negdašjoj Jugi zaprli v rešt makar so mo ne našli grehe po šterima je to zaslužil, mel spomenika, očem reči, kipa v grado Čakovco. Lepo so napisali kak to pitajo Zrinska garda i jeni pajdaši makar so čakoskoj gradonačelnici donesli pismo da bi to šteli i da bi to bil red čakoska Matica hrvacka, “Družba Brača Hrvackoga Zmaja” Zmajski stol Čakovec i čakoska Zrinska garda. Ne znati zakaj so Družba i Matica sam gardini pajdaši, a si tri “pajdaši” skupa več šest let delajo na tomo kaj bi kip kardinala Lojzeka Stepinca bil postavljeni blizo cirkve ili pak negdi drugdi de se to šika i de to grackim ocima nejbole paše. Kozervatori z Varaždina so rekli svoje: oni bodo blagoslovili sako mesto štero bode čakoska gracka vlast, na čelo z gradonačelnicom, zebrala! Na redo so Čakovčari i toplo se nadjam kak ne bodo pozabili kak so se v spisek čakoskih građanov zapisali kak katoliki i da ne bodo svoj glas dali kak farizeji: jeno pripovedajo, a drugo delajo!
Sima nam je poznato kak se je po zadjemo popiso pučanstva v grado Čakovco cirka osemdeset procentov Čakovčarov izjasnilo kak so oni katoliki i zakaj bi unda bilo čudno ak bi mi v grado katolika šteli meti kipa našega hrvackoga blaženika Lojzeka Stepincovoga. Na zido čakoskoga samostana blaženi Lojzek ima spomen pločo štera je postavljena 2015. leta kak spominek na 1935. leto da je na Fratarskomo trgo održani veliki euharistijski kongres, a organizeral ga je ruon Lojzek Stepinacov, šteri je unda bil zagrebečki nadbiskup koadjutor.
Lojzek Stepinac blaženik
Znuomo da je Lojzeka Stepinca Papa Ivan Pavao II proglasil blaženikom 3. oktobra 1998. leta v hrvackomo marijanskomo svetišto v Mariji Bistrici. Papo je dragi Božek prerano pozval k sebi tak da je ne ftegnul Lojzeka proglasiti i svecem. A jenoga dneva se bode i to pripetilo. Mi katoliki čakamo i molimo za te den. To so Zrinska garda i “jeni pajdaši” meli na pameti dok so predložili čakoskim grackim ocima kak bi bilo lepo da blaženi Lojzek i v Čakovco ima svojega kipa.
Ne znati od da grad Čakovec ima šego kaj raspišuvle ankete predi nek postavi nešternoga kipa ili pak spomenika jerbo do ve je nigdar ne tak bilo? Nešterni so spomeniki postavleni prek noči, a nišči je ne nikoga nikaj pital? Jenoga so meknuli, a drugoga postavili.
Dosta je bilo cajki, na redo so domoljubne pesme
V zadjih par meseci meli smo priliko hajdi pot čuti kak so srpski pevači i pevačice popevali cajke po Lepoj našoj i punili naše nejvekše dvorane. Nejvečpot se pisalo o tomo kak so Aleksandra Prijovič i jena punica Lepa Brena napunile zagrebečko Areno i to ne jempot nek pet–šest pot. A unda se je skazal i Zdravko Čoličov i to ne sam v hrvackomo Dubrovniko nek i pre naši sosedima vu Varaždinu, šteri je ruon tak v Lepoj našoj. To se je zamerilo našemo glazbeniko i stihoklepco Nenijo Ninčevičo pak je on zašilil olovko i počel je pisati domoljubne pesme tak kaj bodemo nekaj lepoga mogli poslušati i mi šteri ne poslušamo cajke. Več je ve napisal celi pušel lepi domoljubni pesmi i zafremal je Hrvacke rože tak da se črez jeno kratko vreme moremo nadjati i koncertlino vu zagrebečkoj Areni. Napisal je pesmo i našemo kardinalo Stepinco, našoj Domovini, našim braniteljima, a zmislimo se i jegovih pesmi Dalmatinac sam, Dalmacijo, Geni kameni, Nije u šoldima sve, Evo mene moji ljudi i još čuda lepih štere so nam več do ve došle ne sam do vuh nek i do srca. Znuomo kakši je Nenek dok se prime posla tak da se veselimo jegovomo novomo koncertlino z novim lepim pesmama.
Če duže dale izbori so nam se bliže
Dnevi lečejo i to tak kaj jeni druge prestiguvlejo tak da smo sakoga dneva se bliže dnevo da moramo iti davat glase i to za sabornike. Saki den se spominkujo, i to prek medija, kak Plenkovičov i jegova družina na jenoj strani tak i MIlanovičov na drugoj strani, jeni blatijo druge tak da naše biračko telo ne zna koga zebrati jerbo so jeni hujši od drugi. Obedvoji se nadjajo kaj bodo pobjedili i da bodo ruon oni hercuvali posle izbori na Banski dvorima z Lepom našom. Neje biti lefko denes biračko telo v Lepoj našoj jerbo ono kaj si mi birači skuhamo črez tri tjedne to bodemo jeli štiri leti. Naše bitačko telo bi štelo zebrati nejbolše, a to nebre jerbo se najbolši niti ne nudijo, a more se zbirati med onima šteri mo se nudijo, šteri so svoje ime deli na bitačke listeke po šterima bodemo glase dali onima štere očemo, a preskočili bodemo one druge šteri so nam ne po volji.
Do unda se pripoveda kajkaj toga, jeni velijo da je Drašel lepši od Zokija, a drugi pak velijo kak je Zoki jakši od Drašeka i da tak i vaga kaže. V krčmi prek pota se spominajo kak Zoki nebre pobediti Drašeka niti v kartanjo, a nti pak “Čovječe, naj se srditi”, a ne kaj bi dobil izbore. Morem vam reči da si je teca Franca još ne zebrala svojega livlinga makar se sako jutro o tomo spomina z Božekom i Marijicom i veli kak bodo joj oni predi srede pokazali pravoga pota. Veli, tak je bilo saki pot do ve i ona na to računa.
Štero je vekša, a štero menša nevola?
Niti sam ne znam kuliko pot sam do ve čul zakaj itak Zoki MIlanovičov ide na izbore za sabornike? On je uvjeril sebe, a ve oče i nas kak ide sam zato kaj je Drašek Plenkovičov ne premijer kak treba jerbo so vlast vu Lepi naši drži vu svojimi rokami, a to je diktatura. Drašek sam hercuje, a jegovi ministri, tak bar on veli, preveč kradejo i da je Drašek ne uspel stati korupciji na kraj? Zoki se buni protiv diktature Drašeka i nudi nam svojo: po čemo to je tua jegova diktatura štero nam nudi bolša i kredneša od ove štero ve imamo? A na to nam je ne do ve odgovoril? I još nekaj, nikak mi je ne jasno zakaj neče ostajti Pantovčaka de je precednik i boriti se za Banske dvore de bode premijer? A ne, on bi i jeno i drugo, on bi i birke i peneze!
Srečnoga vam predizbornoga Vuzma želim!
