Ve posle obiležavanja, očem reči, proslave ovoletošjega Dneva pobjede i ovoletošje „Oluje“, ve da je novozebrani potprecednik hrvacke Vlade srbijanec Boris Miloševičov održal svojega govora pred Hrvatima, hrvackim branitelima i HOS-ovcima, šteri so bili v slepo vulici na krajo grada Knina, zazvedili smo kak Srbijanci z Lepe naše ne iščejo od nas Hrvatov kaj se jim ispričamo za Olujo z 1995., ak bode naš minister Medved došel v Grubore i priznal da je tam nastradalo šest jivih civilov. Na se zadje se bode i pozabilo što je i za kaj hapil ovoga zadjega rata med nami i Srbima i nikaj mi nej bilo čudno ak bode Pupavac Pupi iskal kaj se nam zabrani kaj ga bodemo zvali Domovinski rat i da je bil oslobodilački?
Neso se Srbijanci primirili, neso niti vtihnuli, a neso niti prestali senjati mejo na crti Virovitica–Karlovac–Karlobag jerbo so za naš Den pobjede, za naš Den Oluje znova brojili svoje mrtve civile, šteri so nastradali za vreme „Oluje“ i v svojim „Novostima“ so jiv nabrojili nekaj meje od sto. A nešterne od teh štere so nabrojili je sfondala i vojska BIH, ali so to nigdi ne priznali. Oni svoje brojijo po dva–tripot kak so delali i ovi v Jasenovco. Svoje so prebrojili, ali so nigdi ne napisali, nigdi so ne priznali kuliko so oni sfondali naših hvackih civilov za vreme agresije i okupacije, od 1991. – 1995.leta? Saki svoje rane leči, saki svoje mrtve broji, tak da smo mi na našoj strani nabrojili da so Srbi sfondali 7263 hrvacka civila, a još se cirka 800 vodi kak „nestali“. A za te „nestale“ nam nikak nečejo reči de so i kaj so žnjimi naprajli. Ne moramo biti preveč spametni dok si gruntamo de bi jiv mogli najti posle nekaj meje od tridesti let?
Teško je o tomo govoriti kuliko vredijo Srbijanci v Lepoj našoj, a kuliko vredijo naši ljudi, šteri so restepeni po belomo sveto? Najme kaj, po našemo Izbornomo zakono šteri još nevek vredi i po šteromo smo hodali glase davat pred dva mesece za naše nove sabornike, se od sih Srbijancov v Lepoj našoj zbirajo tri saborniki, a ruon tak se od naših Hrvatov restepenih vum meje Lepe naše zbirajo tri saborniki. Z toga računa, očem reči, z te računice lefko zračunamo kuliko vredi jeden Srbijanec ak znamo da ga Srbijancov posle rata ostalo ili pak se povrnulo nekaj malo meje od pet procentov, cirka 200 jezer, a naših ljudi ga odišlo v beli svet želocom za kruhom cirka štiri milijonov?
Dok se je korona pojavila prinas v Lepoj našoj pred nekaj malo vejč od šest mesecov si smo se nadjali da tua nevola bode trajala kratko kak prtuletni mraz ili pak letni dežđ. Ali kuliko vidimo nikaj od toga. Dok so nas naši doktori-epidemiologi prvič natirali z posla v karanteno, dok so nam zaprli krčme, cirkve i javne hiže si smo se nadjali da toj nevoli, toj vuteski bode fčasi došel kraj. Pripovedali so nam da korona ne podnaša vručino, da na vručini zgine kak rosa okoli polneva, ali korona je prešla prek sega toga i ve dok so vručine nejvekše ve smo našli nejveč betežnih. Gruntam vi i to več hajdi dugo kak ipak nekomo paše tua korona kak gud se dotepla na svetlo dneva. Probajte si zračunati, ve nikam nedemo pak imamo čas računati i preračunavati, kuliko se je sam maski sprodalo, a i još se prodavle i to navelikom. Kam god idete morate meti masko. Velijo i ovi kaj još navek hodajo v kurveraj da nikam nejdejo brez maske jerbo ve morejo iti i po dnevo jerbo jiv z maskom ionak nišči ne pozna. Teško je pravzaprav zračunati kuliko smo maski potrošili za teh minuli šest meseci, a još je teži zrečunati kuliko so ovi zaslužili šteri so nam maske prodavali i još nam jiv prodavlejo? Predi dok smo maske niti ne kupuvali jerbo smo jiv niti ne nucali, so koštale 60 lipici po komado, a ve dok jiv nucamo kak bi rekli na jezere, ve so po šest kuna. To je dobiček kakšega nigdi ne muoči zaslužiti. Nekaj čistam slično je i z cenom rukavici sam kaj rukavice nucamo nekaj meje, ali je niti tu ne znati što več zasluži oni šteri jiv delajo ili pak oni šteri jiv prodavlejo, a nam šteri jiv plačamo je sejeno v čiji žep penezi idejo. On šteri je toga korona virusa pustil vum z krletke vu Wuhano v Kini, lani v decembro, si je jako dobro preračunal kuliko bode milijonov ili milijardi dolarov nazobačil v toj sveckoj pandemiji. To je još ne se, a kuliko so zaslužili oni kaj prodavlejo sredstva za dezinfekcijo? A stopram ovi šteri prodavlejo šprice vu šteroj je tua dezinfekcija? Moramo deti roko na srce i priznati da je vu tem flašicama bilo sega od prave dezinfekcije do žganice drožđenke, važno da smo si roke z nekim pošpricali i reda zbavili. A zakaj ljudi mečejo v šprice drožđenko? Zato kaj je nejfaleša i zarada je nejvekša. I ne sam to, nek je moreš bar štiti-pet pot dotočiti. Nekaj so tu zaslužili i doktori. Saki od nas šteri se je štel testerati, a nejveč ga onih bilo kaj so bili v kvaro, so morali to testeranje sami platiti, a testeranje ne košta malo, cirka jezero kuni. Kak god gledimo tua korona je od nas naprajla još vekše bokce nek smo bili: em nebremo delati kak tre, a čim ne delamo nebremo niti zaslužiti, a moramo trošiti na maske, rokavice, dezinfekcijo na štere smo sa ova leta ne morali.
Kaj se korone dotikavle prinas v Međimorjo je nejbole išla žganica i to domača za štero niti korona nema leka. Kak velijo naši međimorski znanstveniki fraklec žganice na den ne da je dobro spiti nek je i premalo.
Ovo 2020. leto bode zapisano v Ginisovo knigo sveckih rekordov kak jedino leto, od da je Božek sveta stvoril, da so roke dobile čuda vejč alkohola od jetri.
