309[layerslider id=”6″]
V minulo nedelo je bil ili neje bil referundom v Španjolskoj po šteromo Katalonija oče iti na svoje i neče več biti za jednim stolom. Zakaj se točno ne zna je li je bil jerbo Španjolci velijo da je ne bil, a Katalonci da je bil. Kak bilo da bilo, ali mam posle toga kaj se je pripetilo ili ne pripetilo v Kataloniji „naša“ Nova televizija je ne mela koga drugoga pitati kaj misli o referendumo nek je to morala pitati četnika Vučiča. Na kaj smo to mi došli v Lepoj našoj?
V esdepejo je do toga došlo kaj so Peđa Grbin i Milanka Opačič iskali Živoga zida kaj jif spasi kaj ne bodo deložirani vum z Partije. I morem vam reči da so ga našli i da jif je spasil tak da so Peđa i Milanka ostali v Partiji. Dobili so sam žute kartone, ali one vekše šteri malo na črleno vlečejo. To je tua partiska demokracija de smeš sam misliti kaj očeš, ali ne i reči ak ne misliš kak precednik.
Oglasili so se i međimorski esdepeovci, makar so se i ne morali, ali imajo praf jerbo naši Međimorci furt svoje glase davlejo Partiji i morajo znati kaj se to kuha v partiskomo lonco. Kak zgledi, od Zagreba prek Reke, pak se do Međimorja, kaj Zagorce nebom spominjal, Partija je na izmako snaga kak i koj Sančo Panse, ali naši Međimorci verjejo da se Partija bode okerusila i da bode došla k sebi. A posebno ve da je Bernardič ostal v sedlo i jaše dale na čelo kolone.
Negdašjega precednika Partije i precednika Vlade, Zokija Milanoviča, ne bijejo ruon nekši dobri glasi. Pripoveda se i to se glasneše i glasneše (a o tomo se spominajo i pre čakoski gracki vuri štera još ne kaže točno vreme) kak je Zoki jako slab biznismen, velijo da jedva zasluži za kavu, a hrani se v pučki kuhji. Dok ga ne prepoznajo. Da je Slaveka Liniča ne hitil vum z Partije ve bi mogel pre jemo biti Boško Buha. Očem reči, bil bi kurir i reznašal bi pošto!
Naša precednica Kolinda je bila v Istri i govorila je v Pazino. Tam so joj jeden čas pleskali, a med tem i fučkali. Dok je spomenula antife i Titija unda so joj pleskali, a dok jim je rekla kak so svečeniki i velečasniki čuda pomogli kaj se je Istra vrnula v Lejpo našo, unda so fučkali. Kak bilo da bilo Istra se je predi vrnula v Lejpo našo nek je drug Ljubičica bela zel cugle vlasti vu svoje roke i počel hercuvati. I još nekaj, Istra se je vrnula skupa z Trstom. A kaj mislite što je zahuzal kaj je Trst več hajdi dugo ne naš. Probajte pogunuti! Imate tripot pravo. Kaj vam malo pomorem bodem vam rekel da so tu svečeniki ne meli svoje prste.
I još nekaj. Dok je drug Ljubičica bela držal cugle vlasti vu svojimi rokami unda je, tak bar velijo antife, bilo sega, pak je i bila prava demokracija. Rečite mi, prosim vas lejpo, što je vupal fučkati dok je precednik govoril? Nejso vupali niti oni v Istri. Da so fučkali kak Kolindi rešti v Puli bi bili premali, pak bi jif, mislim one štero so fučkali, morali pelati na jeden otok prek pota Senja.
Minulo proščeje svetoga Remuša (čitaj: Jeronima) v našoj Štrigovi bode se pamtilo zanavek. Zakaj? Proščeje bi bilo kak i sako drugo da je ne posle proščejarske meše bil i Znanstveni skup o pavlino Jožeko (mojemo imejako) Bedekovičo šteri je pred 265 let napisal i izdal knigo „Natale solum…“ v šteroj nam je več unda govoril kak se je sveti Jeronim (Remuš) rodil v Stridono, kak so negda stari Rimljani prekrstili Štrigovo. Rekel sam vam več parpot: pak so ne Štrigovčanci zabadaf zazidali cirkvo svetomo Remušo i to z dva turne, očem reči, pak ne bi to napravili da se je sveti Remuš ne tu narodil. I to je još ne se jerbo je v cirkvi svetoga Remuša v Štrigovi Ivan Ranger narisal svoje nejlepše freske. I te freske so ve ofriškane i zlišpane, tak da još malo cajta fali kaj bode cirkva tak zgledala kak unda dok je bila nova. Rekel sam več, minulo soboto so došli v Štrigovo akademiki, profesori, se vučene glave kaj so govorili o svetomo Remušo i o Štrigovi, tak da ve si znajo da je Remuš rođeni v Štrigovi i da je z međimorskoga hatara genul v svet. Ne znati je li bi bil tak spameten da se je ne narodil tu med goricami?
Knigo „Natale solum…“ je z latinskoga na hrvatski prevel profesor Marko Rašič i za to mo je trelo skorom deset let. Kniga je debela i neje bilo lefko. Ali ve jo imamo i saki što oče more prečitati kaj je o Iliriko, Međimorjo i svetomo Remušo napisal Jožek Bedekovičov. A to kaj je kniga došla na svetlo dneva nejvekši krivec je naš dobovčane i akademik Dragec Feketarov.
I još nekaj, Jožek Bedekovičov je napisal kak se je sveti Remuš narodil v grado Štrigovi tak da je ve se v rokami načelnika Stankija Rebernika i štrigoskoga opčinskoga vječa kaj pošlejo zamolbo v Sabor Lejpe naše kak bi Štrigova bila znova grad, kak je bila negda dok se je Remuš narodil, tak kaj bi Stanko mogel biti gradonačelnik.
Navek se je pripovedalo kak se je sveti Remuš ne rodil v Štrigovi jerbo je on dostipot znal reči: Oprosti mi Božek kaj sam Dalmatinec. No, ve se je i to zazvedilo da so mo te reči deli v zobe naši sosedi Dalmatinci šteri so šteli kaj bi jif Stridon (ili tak nekak) polek Trogira bil jegovo rodno mesto. Ve dok se je prekapalo po staraj knigaj, dok se je prah zbrisal, ve se zazvedilo da je sveti Remuš pravzaprav rekel: Fala ti, Božek, kaj sam Međimorec! Saka istina (ili resnica kak Štrigovčanci to velijo) jempot dojde na svetlo dneva.
Povjesničari Međimorja i profesori povjesti so se čuda navčili od Jožeka Bedekoviča ili so se mogli navčiti, ali niti jeden je ne došel (ak ne brojimo profesora Vladeka Kapuna) v Štrigovo na Znanstveni skup. Pak kaj bodo oni hodali, oni se znajo. Slažem se, ali nikak nebrem razmeti zakaj unda našo deco nikaj o tomo ne navčijo?
Stari grad v Čakovco čaka kaj ga popravimo, spucamo i zlišpamo. Kuliko sam mel za čuti župan se je se dospomenul, penezi so prepravleni i tre sam fljučnuti v šake i genuti. Dok se to ne hapimo mortik bi trelo poskupsti drača i sfondati šibje štero raste vum z starih zidov. Najbrž je to ne tak negda bilo nek je Stari grad ne hodal redovito na šišanje. Nekaj si gruntam da so tu ne v pitanjo tak veliki penezi kaj se nej sramotili pred turistima šteri dohajajo glet de so živeli Zrinski i otkod so odhajali v Siget, Kuršanec ili pak Beč.
Fala opčini Selnica jenomo načelniko Ervino Vičevičo kaj je mel vupeša dopelati filma o borbama vu Vukovaro i stradanjo branitela po srpskim logorima posle pada Vukovara v čakoski Center za kulturo. Neje ruon lejpo kaj je te film z Vukovara za Čakovec išel črez Selnico, ali kak so rekli Vukovarci, drugač so ne mogli dojti v Čakovec. Ne znati kaj se Čakovčanci bojijo Vukovara? Pak vu Vukovara je bilo hajdi Čakovčancov i Međimorcov, a i dosti jif se je ne vrnulo. Za nešterne se još niti ne zna gde so ostali. Dvorana je bila puna, došli so i naši braniteli šteri so preživeli Vukovara i logore, došli so i mi smo jim se zafalili za se ono kaj so dali za Lejpo našo. Da bi večer bila lepša pobrigali so se KUD-ovi z Miholjana i Selnice. Saka čast načelniko.
Tanja Torbarina je pitala: Zakaj bi Plenkovič delal ono kaj od jega iščejo Janezi? Pak niti ne dela ono kaj od jega iščemo mi Hrvati!
