Kak so broji, šteri nam govorijo kak stojimo z koronom i da je se bomo rešili, saki den se vekši i vekši, ruon tak je i se vekši broj onih štere korona pošilja k Božeko na račun, moramo priznati da se korone ne bodemo tak včasi rešili i da se bodemo još borili žnjom, očem reči, protiv je. Ne znati kak bodo dugo naše krčme otprte, kak dugo bodemo smeli hodati na šporcka događanja i nigdar ne znamo da bode naš državni stožer to se zapral i ostavi nas doma. Znuom da to bode teško išlo jerbo smo se več pomalem privčili kaj moremo oditi vum z hiže, kaj se moremo pajdašiti po krčmama kak na terasama tak i nutri, jerbo je več jesen zela cugle vlasti vu svoje roke, pak je ne ruon lefko sedeti na terasi dok nam sunčeko ne sveti. Kak nam furt pripovedajo oni šteri se bavijo z koronom trebali bomo se navčiti živeti žnjom, očem reči, morali bodemo i dale nositi maske, morali bomo sedeti jeden od drugoga nejmeje dva metre, ne smemo, ne da ne smemo nek več nebremo ščipati puce jerbo smo to negda delali skrivečki, a ve so nam predauko od nas da bi to mogli naprajti dok nam dojde volja, a polek je nas je nešterna mlada i frčna puca ili žena. Se ono kaj nam je negda bilo lepo, a protiv čega so se ne preveč niti puce i žene bunile korona nam je dopušča.
Kuliko vidimo nejteži to korono, te zabrane podnašajo naši mladi. Navčeni so bili kaj so skorom saki vikend išli vum kaj so se podružili z pajdašijom po diskačaj, čajankaj ili pak nekšim drugačešim druženjima, a ve ga toga nega duže od leto i pol. Mladi bi išli, a nemajo kam, družili bi se, a nemajo de, a doma jim več se ide na živce i sam se svadijo z svojimi starešimi. I kam unda morejo oditi nek nekam v park ili pak v kakšo šumico de jif nišči ne vidi i de jim nišči furt ne prdekoje kak so neodgovorni, kak nemajo masko, kak si nesmejo nikaj spiti jerbo korona to ne dopušča iili kaj je još nejhuje kak se nesmejo stisnuti k svojoj zebranoj pajdašici jerbo i tu korona ima svoje prste. Ili prosim vas lepo, kakše je to košuvanje prek maske ili pak se nesmejo niti kušnuti ak so obedvoje ne cepleni i ak nemjao kovid pasoša. Rekla je teca Franca, kuliko sam mogel čuti ona se još dobro zmisli kaj je to, kušuvanje prek maske ti je ruon tak kak da bi se čovek venodjal z pucom prek gačici. Moramo priznati da korona dela bedake z nas, a nebremo si pomoči.
Kak zgledi neje korona samo beteg šteri nam dela probleme s zdravičem nek je pomalem počela rivati roke i v naše žepe. Nejfletneše so skočile v zrak cene na tankštelima i to ne malo. Si znamo za našo Blanko Vlašič štera nas je na leta razveseljuvala z svojim evropskim, sveckim i i olimpiskim želencijama v skakanjo v zrak. Ona je to delala na leta, skakala je hajdi let i hajdi visoko, ali cene benzina i nafte so jo prestigle črez mesec dni. Ne sam da so cene skočile jako visoko, ober našega državnoga, evropskoga i sveckoga rekorda nek niti ne znamo da bodo prestale skakati. Ak so negdi naši političari pretirali unda so pretirali z cenami benzina. Kaj oče naš minister za peneze, Zdravek Maričov, kaj bodemo aute ostajli doma i kaj se bodemo prestali voziti i de bode unda on punil našo državno kaso. Znuomo mi da mo penezi falijo, ali zakaj toga nejvekšega tereta moramo podnesti mi šoferi i ovi dečki i puce šteri pušijo. Nek to malo resporedi i na druge pak bodemo si skupa leži to podnesli. Pak smo za korono ne krivi sam mi šoferi i ovi pušači?
Verjem da ve si skupa moremo razmiti zakaj se mladi bunijo protiv toga kaj bi naši komunalci zrušili nešterne dreve vu čakoskomo parko? Ak se dreva zrušijo i ak se park rezredi unda se bode mam vidlo de delajo šanki na otprtomo i de se mladi družijo i parijo. Drevje i grmje mora tak ostati ak očemo kaj ne bodemo se vidli kak i z kim se pajdašijo naši mladi, a dreve bodemo rušili dok jempot korona odide z našega hatara v ropotarnico povjesti k španjolskoj gripi.
Sima nam je poznato da so pred nami izbori za našega međimorskoga župana jerbo je naš Matija podnesel ostavko. Kak god teška srca, ali bodemo morali iti znova glase davat. Je li bodemo znova zebrali Matijo ili pak nekoga drugoga to samo Božek zna, a biračko telo odlučivle. Mogli smo čuti ili pak prečitati kak so to novi stroški za našo županijo štere smo ne planerali i pak bode nešterni projektlin odišel po riti k meši jerbo ga nebo penez štere bodemo potrošili za izbore. Nekaj sam si gruntal da so to novi stroški za štere smo ne znali, pak bi mortik mogli te nove izbore kandiderati prema EU fondovima kaj nam oni pomorejo. Mortik bi mogli? Tre probati, pak ionak Evropa kajkaj toga financera
Več se navelikom političari spominajo o tomo što bi mogel biti naš i međimorski novi župan? Još se je ne nišči kandideral pak smo, bar za ve, si kandidati. Javil se je naš sosed zagorec iz Varaždina, gospon Čačić i on nam nudi svojega kandidata, i to tak kaj ne bodemo meli župana nego županico. Morem vam reči da ja znuom što bode naš novi župan? Što? Pak on (ili ona) šteroga bodemo zebrali. Biračko telo našega novoga župana drži v svojimi rokami!
Kaj nam ne bode ruon se korona kriva ovo leto se je na naš ( i ne sam naš) hatar dorivala i suša štera je hajdi plodovi polja, goric i sadovjaka pobrala predi jeseni, predi nek so berbe i počele. Najme kaj, zbog radi suše naši kalamperači (čitaj: Beličanci) so nabrali skorom na pol meje kalampera nek lani. To kaj je on bolši i vredneši to bodemo lefko podnesli, a čuda teži bodemo podnesli to jerbo bode dražeši. Pitala me teca Franca je li smo mi ve vredneši ak jemo dražešega kalampera? Morete si misliti. Ne sam da ga bilo meje kalampera, meje ga bilo i kuruze, pak bodo i pajceki, piceki, pure, teliči, krave (govedina) dražeši. Za gorice sam več zadji pot pisal. Ak si nešči grunta da se bode meje pilo te je v kmico fritnul. Niti nas je korona ne natirala fkrej od štamprlini i kupici, a ne kaj bi to suša mogla. Kaj god bodemo rekli, ali moramo priznati da nam je živleje se dražeše i dražeše, a plače i penzije so se nikam ne genule. Jempot dok cene odidejo gori teško jiv bo nazaj doli sprajti makar ga drugo leto ne bode suše. To znamo jerbo je letos ne suša bil prvič otkak se klatarimo po ovomo sveto.
