Fletneše nek smo se nadjali so nam izbori poranjkali na vrata, još se sam dvapot stanemo i moramo pak iti glase davat. Zutra je sobota den da moramo biti stiha i nesmemo se nikaj spominati o politiki nek sam, kak je rekel pajdaš Miška da smo pili pre novomo pijaco kavu v škrneclino, očem reči, v šalici štero smo si sobom nosili, kak se v soboto slobodno spominamo sam o venodjanjo. Najbrž je pozabil kak još den denes si politiko mečejo v isto korpo kak i venodjanje. Nikak mi nejde vu to mojo sero glavo zakaj za politiko velijo da je fljundra, a si znajo ili bar mi moški, da nam fljundre navek davlejo vejč nek moremo zeti. Istina je da fljundre i koštajo, a kaj očete reči da so politika i političari zabadav. No, nikaj ne moramo dati vum žepa političaraj, a o tomo kaj čuda meje v žepe dobavljamo zboga radi politike o tomo čkomimo kak drekec v travi.
Došli so na svetlo dneva si oni šteri bi šteli biti lokalni (neje od glagola lokati) političari ako jiv biračko telo prepozna. Kaj reči, dosti ga starih, šteri več na leta živijo (i to jako dobro) na grbači biračkoga tela, ali so oni nikaj ne krivi ak ovi znova jim svoje glase davlejo. Moremo reči da se hajdi načelnikov zmuočilo ili pak zavolilo toga posla, toga kruha brez motike, pak so svoja mesta spraznili nek i drugi vidijo kak je to živeti na opčinskomo kruho. Nikaj ne bodem novoga rekel ak vam rečem da se pak hajdi doktorov 8i doktorici) rivle v politiko, ali je to ne zato kaj je jako teško delati z betežnim ljudima nek zato kaj nam je politika betežna pak doktori očejo pomoči kak bi čim predi ozdrajla i stala na svoje hirave noge.
Morem vam reči da smo se pak kajkaj toga na poslušali i to čuda meje onoga kaj je v zadjih štiri leti napravleno, a čuda več onoga kaj nam novi (stari) župani i (grado)načelniki obečuvlejo da bodo napravili. Očem biti pošten i zato moram reči da nam nešterni kandidati rivlejo iste one cedule i plakate štere so nam rivale pred štiri leti sam so spremenili leta, a i plakati so druge farbe. Istina Božek da smo mi kak biračko telo saki den se stareši i senilneši, ali smo najbrž ne tak kaj se nej zmislili kaj so nam naši vrli političari obečuvali pred štiri leti.
Nejvečpot do ve se delala,očem reči, zidala kak se to prinas veli Specijalna škola, a to je pravzaprav Centar za odgoj i obrazovanje. Jeno deset let ga je zidal grad Čakovec, a ve štiri leti županija, a vu ove štiri leti bodo ga najbrž skupa zidali. Ak bi se malo i naši saborniki genuli i zasukali rokave mortik bi i deca doživela kaj bi došli vu novo zdaje. Nekak se si političari lovijo za obilaznice gradi i vekši opčini (Čakovec, Prelog, Središče na Muri, Nedelišče), a i šporcke dvorane so sake štiri leti na dnevnomo redo. Ak se dobro zmislim Sveta Marija, Vratišinec, Kuršanec i Sveti Martin na Muri bodo, ak Božek da srečo i zdraviče, meli vu novomo mandato več i tretjo dvorano. Nekaj mi je ve i to v zadji cajt palo na pamet: ak se bodo naprajle se steze za pecikline i ak denemo kcoj i se one štere so do ve bile obečane unda bodemo v Međimorjo meli tri steze okoli Međimorja našega maloga. Ve vidite kaj se politika more naprajti? Nek se gospodarstveniki skrijejo.
Nekaj si gruntam da je pajdaš Tonča mel prav dok mi je donesel i porinul v roko ceduljko: – Faliti političare zato kaj so nam naprajli dvorano, školo, zabavište ili pak zaobilaznico z opčinskim, grackim ili pak državnim penezima je ruon tak kak da zafalimo bankomato kaj nam je isplatil naše peneze! Što god je to Tončijo dal ima prav.
Čakovčanci i Čakovčance točno znajo što jim je to se kaj imajo ili nemajo privoščil? To je SDP-e, šteri v Grado Čakovco več punih dvajsti let drži cugle vlasti vu svojimi rokami. Negda je Čakovec bil menši grad šteri je mel se kaj je trelo i z šterim so se Čakovčanci i Čakovčanke štimali. I ne sam to, nek je i hajdi gradonačelnikov z drugih takših i vekših gradov dohajalo v Čakovec glet i vučit se kak tre gospodariti z gradom i ljudima. Kaj nebom spominjal kuliko je Čakovec mel fabriki i kuliko je težaki, Čakovčancov i Međimorcov, delalo v Čakovco, a v zadjih dvajsti let se se je to zrušilo; fabrike so odišle po riti k meši, a težaki ruon tak, očem reči, na burzo, v penzijo ili pak dimo, a Čakovec nikak da nazaj dojde na zeleno grano. I ne sam to, nek saki den se bole bogo zgledi, a glavne čakoske vulice i glavni čakoski trg so prazni i nišči ne hoda več v center kak daj čakoski pozoj šteri dremel pod Starim gradom nej nikoga v center pustil. Več niti krčme ne delajo; Kavana, Plavi podrum, Riblji, Centar, Narodna kuhja, Kacun več so zdavnja svoja vrata zaprli pak ljudi nemajo pokaj hoditi v centar grada. I čakoska glavna vura se je popravljala štiri leti. A vreme je spreletelo makar so čakoske vure, nejvečpot, stale. Ne razmem Čakovčanke i Čakovčance, a i dosti Međimorcov je takši, oni navek svoje glase davlejo istima, makar so ne ničim to zaslužili i očekuvlejo promjene. Ako mi Međimorci očemo pravzaprav nekaj spremeniti moramo zasukati rukave, zašiliti olovke i naposel.
Makar so se esdepeovci ne skazali kaj se hercuvanja v Čakovco dotikavle, ali je sreča kaj so oni hercuvali, a ni hadezeovci jerbo si znajo i seposot se pripoveda kak hadezeovci kradejo, ali so v Čakovco ne bili niti blizo vlasti pak se tu ne kralo nek se se delalo pošteno i kak jiv bog zapoveda.
Skorom mi je pobeglo, pak Čakovčanci i Čakovčanke pak imajo obečane vanjske bazene. Kak se pripoveda dofčerašji gradonačelnik je i zajme štel zeti, ali niti jena banka nema tuliko pene kuliko je on nucal. Tre se nadjati da bode novozebrani gradonačelnik respisal međudržavnoga natječaja za te (dugo) vječni čakoski projektlin, pak se mortik javi mađarski precednik Viktor Orban tak da bi Čakovec mogel dobiti bazene mam posle labodoritaškoga igrališča v Osjeko. Pak bil bi red da Mađari nekaj vrnejo Međimorjo za sa ta leta kak so dugo hercuvali na ovomo našemo falačko zemle..
Nesam mogel kaj nej bil pital teca Franco kaj ona očekuvle od ovih izborov šteri so pred nami. Morem vam reči da sam ostal brez reči, a bormeš i brez zraka kak da me je korona zgrabila dok mi je otpovedala. Rekla je kak bodemo dobili novoga župana, a i v Čakovco bode došel novi čovek, ali posle tretjega kruga. Pital sam, je li to bode čovek ili pak žena, ali se o tomo neje štela z menom spominati. Nebrem se srditi na moju teco ipak smo si mi rodbina!
