[layerslider id=”6″]
Ne znati kam itak ide tua naša državna politika, očem reči, demokracija. Saki si grunta kaj oče, a nešterni to i vum dajo i unda jif stranačka stega pomete. Nebrem razmeti kak te stareši političari kak so napriliko hadezeovci Mirek Kovačov i Davor Ivek Stir ne znali da stranački šef nigdar ne dela grehe, ali ak mo, tu i tam, nekaj pobegne to se ne sme videti, a još meje pripovedati. Nigdar je ne bilo tak, pak niti denes je ne, kaj bi japica (čitaj: Plenkovič) išel po šumi, a mamica (čitaj: Kovač, Stir) pak po poteco. Zakaj so si Ivek i Mirek gruntali da so ober toga? I bili so jen kratek čas, dok jif je stranačka oluja ne otpuhnula. A koga jempot stranačka oluja otpuhne te se več nigdar ne povrne! Kak v hadezejo, tak v esdepejo, haeneso kaj ne bodemo išli dale do „seljaka“ ili pak našega Šenkovčara, Drageca Lesara i jegovih laburistov.
Ste zeli v pamet kak dečki i puce z partije gombajo protiv svojega šefa Davora Bernardiča, ali dok tre zdiči roko oni so tu ak nečejo završiti v ropotarnici povjesti, očem reči, ak nečejo oditi po riti k meši kak je to negda odišel Slavek Liničov. A Slavek je bil dugoletni partijac, dobro potkovani i z penezima, dopelal je Zokija Milanoviča v premijersko foteljo, ali mo je to ne nikaj pomoglo i partijska oluja ga je posprajla z politike zanavek. Što se za mač lovi od jega i zgine!
Kuliko se pripoveda i to navelikom, Bernardič bo se pomalem dosmickal do vlasti. Si pripovedajo, mladi, stareši, stari, pak i babe coprnice kak se prepravla velika koalicija štera bode znova zela cugle vlasti vu svoje roke jerbo levi ili pak desni nebrejo sami dobiti dosti glasov kaj bi znova bili nejjakši v državi. Što zna je li bode tak? Ali navek je tak bilo dok se je počelo navelikom šepetujiti, posle se počelo kadeti, a unda je i do toga došlo. Nam nikaj rekel, bodem malo počakal, imam ja čas!
Pre čakoski gracki vuri se navelikom spominajo i to oni šteri se nejbole znajo kak se je esdepe raspal, hadeze se respada, a „zidari“ se višešega zida nazidavlejo, očem reči, Živi zid raste oliti je v uspono. Brzčas na nekaj računajo, nečemo se nadjajo ak je Sinčič počel otplačivati zajma, a plača i tv pretplato!
Ne bi vam ja znal reči jeli je Zdravkec Mamičov kriv, je li so krivi i si oni šteri so žjim tikve po Maksimiro sadili, je li so oni pofratili te velike kupčeke penez ili ne? Znamo kaj je o tomo rekel osječki sodec Davor Krušlin, ali zakaj je to rekel ruon ve dva tjedne predi Sveckoga labodoritaškoga prvenstva? Ak smo tak dugo čakali kaj tua socka trakavica dojde do kraja unda smo mogli počakati još mesec dni tak kaj bi naši dobri, ak ne i nejbolši labodoritaši, Luka Modrič i Dejan Lovren mogli odigrati v Rusiji onak kak oni znajo, a mi očemo. Furt nešči rovari protiv naših labodoritašov i unda se posle čudimo kak so pak ne odigrali onak kak smo se mi nadjali. A furt delamo protiv jif. Mamič je mogel i posle dojti na red i posle Sveckoga labodoritaškoga prvenstva oditi na hodočašče v Međugorje.
Zdravkec je doišel v Međugorje jerbo je ono ne v Evropi i tam EU roka pravice još ne tuče po stolo, ali ne znati je li ga to bode spasilo rešta ak znamo da je naša vodeča coprnica z Pitomače rekla kak bode on stanuval v rešto nejkesneše za dve leti. Najbrž i coprnice nekaj znajo!?
Što bi nas Hrvate razmel? Što bi nas razmel kaj mi pravzaprav očemo? Našli smo dvoje – troje dece v Dubrovniko štera imajo ospice ili pak nekaj tomo slično i ve to bobjajo na sa zvona i to tak jako kaj bode se čulo v se vogle ove kugle zemaljske štera je pravzaprav okrogla. Nebrem razmeti, bobjamo kak da bi šteli splašiti se one šteri kanijo dojti k nam na urlab, to z jene strane, a z druge strane se nadjamo, očem reči, falimo se kak bodemo ovo leto, prek turistov, nazobačili vejč penez nek smo to lani. Što nas more razmeti, mesto da bodemo stiha i zlečimo te betežnike, mi furt iščemo nove i plašimo turiste. Ak bodemo i dale tak delali bode nas i dragi Božek hitil vum z svoje cukor pikse.
Dok smo si napeti kaj bode z toga sveckoga labodoritaškoga prvenstva, dok punimo špajze z pivami, gemištima i sem onim kaj ide kcoj, kurimo roštilje i čakamo kaj laboda gene z centra, v tišini Mure se hapilo Svecko prvenstvo v ribičiji. Naši ribiči, na čelo z precednikom Zokijom Fajferom, so se preprajli: vodo, čeke, ribe i pijačo tak da je Svecko prvenstvo hapilo v Središčo na Muri, a ribe se bodo lovile v Selnici, Poturno i v Žabniko. Nejsam nejbole vpučeni je li ribe znajo kaj jif čaka? No, to je isto kak i navek, ribe navek zazvedijo zadje. Kak bilo da bilo, Zoki je z svojim dečkima to se posložil i kuliko sam mel za čuti, prek pecto ribičov je došlo k nam v Međimorje naše malo kaj pokažejo kak je ribičija ne norija. To je več drugo svecko prvenstvo štero je Zoki dopelal na of naš falaček zemle med dvemi vodami. Nebodete veruvali, ali sima je prinas jako lepo, nebrejo nas nafaliti, očem reči nebrejo nafaliti lepote, dobrote i finote štere mi tu imamo. I nebrejo razmeti pokaj naši ljudi ido vum ak ga na sveto ne lepšega falačka zemle?
Na čakoskomo Jugo je minulo proščeje, Antonovo. Si znamo da je sveti Tonček patron čakoske južne župe. Na proščejo je popevala šibenska klapa Maslina. Lepo so popevali i hajdi dugo, ali smo, ipak, na se zadje, zazvedili kak so šibenske masline još navek neobrane i kak još navek nigdi nebrejo najti nikoga što bi jif pobral! A oni lojsajo okoli
Na čakosko južno proščeje je došel i naš poznati međimorski pjevač Mirko Švenda z conom zvani Žiga. Nejpredi sam si gruntal da je došel poslušat kak popevlejo jegovi pajdaši z klape Maslina, ali sam posle zazvedil kak je došel na spominek jerbo bi štel i on prejti na klapsko popevanje. Ne da mo je klapska pesma tak jako lepa nek se mora prekvalificerati ak oče v Čakovco popevati.
To nebrem nikak razmeti, mi Međimorci se žalimo kak nam furt nešči krade po polima, sadovnjakima, goricaj i prosimo policaje nek nam pomorejo kaj se teh vuteski rešimo, a policaji si kupijo novoga fletnoga auta šteri bode nas nagajal po cestaj i zobačil penez v državno kaso. Kak zgledi mi Međimorci preveč imamo i zato se dopušča ovim tatima kaj nas kradejo, z jene strane, a z druge strane nam, ruon tak, tre zeti peneze ak se, tu i tam, pelamo malo fletneše i to doli z brega. Se nevole na nas Međimorce i na Međimorje naše malo!
Darko Horvatov, naš novi minister gospodarstva šteri je herbal ministarsko foteljo od Martine Dalič, dobil je k fotelji kcoj još hajdi poslov. I velijo da je to ne se kaj je gospa Martina delala. Dok se malo bole pregruntam, pak da je ona to se ftegnula? I još je mela Agrokora prek sebe, očem reči, pod sobom, a bila je i potprecednica Vlade. Ve dok smo jo zmenili smo stopram zazvedili kuliko nam je bila vredna, kuliko je vredila!? Znuom da znate, ali sejeno vas moram zmisliti kak je hajdi Martinini poslov dobil i poljoprivredni minister Tomislav Tolušič. Škoda za takšo ženo kak je Martina, škoda kaj smo jo prekesno prepoznali.
