Spala kniga na osem slovi
Kak god je dauko bilo ve nam je čistam blizo i tu pred nosom, očem reči, čistam pred nami, na poceko, so novi izbori, znova davanje glasov za precednika oliti precednico Lepe Naše. Kak to naši vnuki velijo, još se sam dvapot stanemo i idemo glase davat kaj bodemo unda znali što bode precednik Lepe naše vu ovih pet let štere so pred nami. Hajdi se je jiv grozilo kaj se bode kandideralo na ovaj izboraj, ali je na se zadje knjiga spala na osem slovi. Verjem da znate što je teh osem dečki i puci šteri kanijo pobediti i pet let sedeti vu nejvrednešoj fotelji v Lepoj Našoj i to onoj precedničkoj na Pantovčako. Dve naše nejjakše stranjke oliti pak partije, HDZ-e i SDP-e imajo svoje, kak oni velijo, nejbolše kandidate: Hadezeovci so na birački spisak porinuli doktora Primorca, šteri jedini more pobediti Zokija Milanoviča za šteroga pak so SDP-ovci stoprocentno sigurni da bode još jeden mandat “šaka z Pantovčaka”. Ak denemo roko na srce moremo čistam lefko priznati da bodo ovi dva kandidati nejglavneši igrači i da bodo oni, brzčas, došli i v drugi krug. Od ostalih so tu Mostovec Miro Bulj, Ivana Kekin, ona se More, ruon kak i jena stranjčica, tu je i Branka Lozo, stranka DOMINO, nezavisni kandidati Marija Selak Raspudič, Tomislav Jonjič i Niko Tokić Kartelo. Saki od jiv je v nečemo dober ili pak bolši od drugih, o nešternima se čuda piše, a o nešternima, kak napriliko Tomeko Jonjičo, čistam nikaj. Vidite da se nam hajdi jiv nudi kaj bi bili ne sam naši precedniki nek i precedniki Lepe Naše. Morem vam reči da si jako teško zbiram komo bodem svojega glasa dal, ali je več dosti oni šterima sigurno ne bodem. Čistam bode drugač zgledal moj listek ak se v nedelo vjutro stanem na levo nogo nek unda ak se stanem na desno. A vi, moji poštuvani čitateli, vi več znate komo bodete svojega dali i več brzčas znate što bode i pobedil?
Marica ima svoje adute
V predizborni kampanji smo kaj kaj toga zazvedili makar je ne preveč dugo trajala. Saki od precedničkih kandidatlinov je rival na svetlo dneva ono kaj mo je pasalo, ono de je nejjakši i nejvredneši, a skrival je, kuliko god je to mogel, svoje falinge i nejslabeše točke. Tak smo mogli zazvediti, ak smo dobro poslušali kak je nezavisna kandidatkinja Marija Selak Raspudič jedina štera bi mogla pobediti “šako z Pantovčaka” v borbi za drugi petoletni mandat v drugomo krugo. To nam je se čistam jasno i jako smo dobro razmeli kaj nam je štela z tem reči, ali smo nikak i nigdi ne uspeli zazvediti kak bode ona itak došla v te drugi krug? Razmem da nesme se adute deti na stol predi izborov, ali nam, biračkomo telo, to mora reči jerbo na naše glase računa i brez nas nebre uspeti. No, ak nam je do ve ne rekla unda niti ne bodemo zazvedili jerbo je zutra izborna šutnja i jako sam najgerek po šteromo bode to prečeco Marija došla v drugi krug?
Ivana oče kaj bodemo si jednaki
Ivana Kekin, žena od pevača Mile Kekina, od pjevača, a ne labodoritaša tak kaj bodemo stoprocentno znali o komo se spominamo. Ona dohaja i njo podržavle stranjčica štera se zna i šteri se MOREJO. Ivana nam lepo obečuvle kak bodemo si jednaki dok bode ona precednica i si bodemo jednako se mogli. Nejpredi sam ne mam razmel kaj nam to Ivana oče reči, ali pomalem so došle vum tajne jenoga precedničkoga predizbornoga programa tak da ve znuomo da ak bode Ivana precednica unda bodemo mogli kupuvati zemljo čistam blizu morja, kak vu Dalmaciji tak i vu Istri, po ceni za jeden kvadrat kak koštaju fritule v Zagrebo za vreme adventa. Tak je ona kupuvala do ve, pak sam oče kaj bodemo vu Lepoj Našoj si meli iste prilike, iste šanse i iste cene. Nedjelja bode pokazala kuliko mi, biračko telo, verjemo Ivani?
Komo se je zameril Tomek Jonjičov?
Dok je Tomek Jonjičov donesel odluko kaj se bode kandideral za precednika Lepe Naše na ovim izborima prekzutra neje se nadjal kaj bodo ga si, i to ruon si, novinari preskakali i hodali polek jega kak polek turskoga grobja. Si znajo da je Tomek jeden od bolšoih kandidatov šteri so deli svoje ime na listeke za precednika Lepe naše, ali se je vu toj ne preveč dugoj predizbornoj kampanji o jemo nikaj ne moglo preveč zazvediti. Tu i tam je nekaj malo pisalo, radio i televizija so rekli par reči, i to ne saki den, ali za Tomeka se je ne smelo preveč znati. Kak je počelo prvoga dneva tak je i završilo čistam pre krajo, a tak mo i ankete ne davlejo nikše šanse. A što bi za njega glasal ak se niti ne zna da je na listeko. Niti to se je ne preveč pripovedalo kak je Tomek donesel v Izborno poverenstvo nejveč potpisov posle Milanoviča i Primorca šterima so potpise se skupljale partija i stranka. Novinari so zebrali svoje adute i nišči jiv je ne mogel natirati kaj bi i Tomeko dali malo placa v medijima. A posle izborov si bodo z prstima kazali na nas biračko telo!
Jeden svetek, a dve čestitke
Ovo leto smo za jeden od nejvekših, ak ne i nejvekši svetek nas krščana i katolika Božič, da je Isusek došel na svet vu štalici i na slamici, meli dve čestitke. Najme kaj, več se lani počelo z čestitkaj za srečne svetke i to sam zbog radi toga kaj se ne bi spominjalo Božiča, a z tem se je nastavilo i ovo leto. Nebrem nikak razmeti kaj z tem nešči oče što nam čestita srečne svetke, a nigdi ne muoči zazvediti šteri so to svetki šteri bi nam trebali biti srečni. Nebrem razmeti je li nešči dojde k sosedo, pajdašo ili pak rodbini na rođendan i čestita mo srečne svetke. To sam još nigdi ne čul pak mi je zato jako čudno kaj očemo čestitati Isuseko rođendan i unda čestitamo srečne svetke. Pak si znuomo da se je Isusek narodil na Božič, a te den je svetek postal posle.
Još nekaj, znuomo da je naš župan jako pedanten i da o semo vodi računa i da jemo nebrejo pobeči nikše sitnice, a za nekaj vekšega se niti ne bodemo spominali i zato mi nejde nikak v glavo kak je vu svojoj čestitki za ovoletošje svetke pozabil čestitati Božiča, očem reči, nekak ga je preskočil i mam je prešel na novo leto. Ne znati što je tu zahuzal, ali čestitko za Božič smo mi čitatelji ne dobili!
