Dalmoši so fletni, a mi Međimorci i Štrigovčanci smo kak muhe v močjako
Mi Međimorci se seposot falimo kak smo nejbolši v Lepoj Našoj i kak se druge županije se moraju dojti k nam vučit kak se nekaj dela. No, moram vam reči da je ne navek ruon tak. Napriliko, Dalmoši so se spominali niti ne mesec dni kak bodo svojemo aerodromo v Splito dali ime sveca celoga sveta, svetoga Jeronima, makar se je on narodil prinas v Međimorjo, očem reči, v našoj Štrigovi, štera se je zvala Stridon negda dok je sveti Jeronim, oliti Remuš kak ga mi Međimorci i Štrigovčanci zovemo, još v pesko igral. Ne bodete veruvali, neje minulo mesec dni i Dalmoši so svojega aerodroma nazvali po svetomo Remošo, a mi, očem reči, naši Štrigovčanci več 5-6 let imajo knigo vu šteroj je zapisana i na svetlo dneva donešena Bula Pape Nikole V. vu šteroj je on, črno na belo, napisal kak je Stridon, kaj bi rekli naša Štrigova, mesto vu šteromo se je skopecnol – došel na svet, sveti Remoš. Dok se je to zazvedilo, a to znajo si v Lepoj Našoj, a i čuda dale, naši Štrigovčanci se prepravlajo kaj bodo polek tabli, de piše kaj ste došli v Štrigovo, napisali da se je tu narodil sveti Jeronim. Ali oni se sam prepravlajo, a neso naprajli nikaj, a poglednite Dalmoše z šterih se mi norca delamo kak so leni i kak delajo malo vejč od nikaj. Istina Božek, nebremo mi Dalmošima zeti aerodroma, ali nek se zna kak je sveti Remoš (čitaj: Jeronim) naš čovek, Štrigovčanec i Međimorec i od par dni ima svojega aerodroma v Splito!
Kam god se obrneš, kam god geneš – Adventa najdeš
Najbrž nas je to korona navčila kaj smo se počeli si zapirati vu svoje županije, vu svoje grade i opčine, vu svoje hiže, pak je došlo do toga kaj saki grad, saka opčina ima svojega adventa, svojega božičnoga sema, svoje, vekše ili pak menše, božične koncertline, svoje štande – hižice, svoje fritule, svoje kuhano vino, svoje Dede Božičnjake, svojega maloga Isuseka. Si to imajo sam v našemo Čakovco je božji mir. Istina božek morete najti fritule, a i kuhano vino, ak na vreme dojdete, ali nikaj preveč drugoga. Nebrem reči da ga ne štandi, da ga ne kučici, ali jih je nejveč prazno. I još nekaj, ne znati kam so se zgubili ljudi kaj je Čakovec prazen, a parking pun čim mrak padne, a znuomo da v ovo zimsko vreme mrak v časi padne. No, neje čistam prazen, ali bi bil da se Filipinci i Nepalci ne bi po jemo špancerali. Najte me krivo razmeti, ali nebrem nikak razmeti kaj se je to pripetilo z našim Čakovcom? Pak negda je Čakoski advent bil na jako dobromo glaso i Čakovčanci so se jako štimali žnjim i Bandič se je dohajal k nam vučit, a ve so se se te lepote nekam zgubile? Ako očete cmreke i hiže bleščeče okinčiti to morete najti v Čakovco pak se nadjam da bodemo vesela i otprta srca dočakali maloga Isuseka.
Lani se je po Čakovco hajdi glasno prepovedalo: – Dok ljudi na seli pred štacunom pijejo pive oni so pijanci, a dok so Čakovčanci pre kučicama pili kuhano vino oni so obslužavali Adventa.
Kipelo je v političkomo lonco Doljnjega Vidovca
V Doljnjemo Vidovco imajo to srečo kaj jim lepši spol vedri i obleči z opčinom i opčinarima, očem reči, nemajo načelnika opčine nego načelnico. Ne bodete veruvali, ali načelnica oče kaj bi bilo se po jenomo jerbo je ona načelnica, a ak je ne po jenomo unda se srdi i vum z rukava vleče nejjakše žensko oružje, a to so soze. Velijo dečki z oporbe da je jako haklik i šegava ak se nekaj bunijo protiv je. Nebrem jiv razmeti. A kak bi jim bilo da jim je moja žena glavna? Ak je ne po jenomo, joj ne dojdo soze na oči, ali zato vudri šakom po stolo, negda z praznom, a negda z mlinčekom i posle toga je mam jasno što ima praf. Zato bi prosil ove v oporbi nek preveč ne srdijo načelnico kaj ne bode i ona počela tuči po stolo kak, napriliko, moja žena. Čim žena vudri z šakom po stolo mam joj dam za praf jerbo more nekaj zeti v roko, kuhačo, šibo ili šaraklina, pak bi onda mogel još i huje prejti. Dok dojdete k doktoro, posle spominka z ženom, unda vam niti dopunsko ne pomore. Kak veli moja teca Franca: pamet v glavo, čuda je leži sprečiti nek lečiti!
Od Badnjaka do Herodeševoga
Advent je predbožično vreme štero smo negda zvali Došašče, vreme da se čaka kaj se Isusek narodi. Hajdi ga tu svetkov, od svetoga Mikloša, šteri je negda mel krampuse, a denes so deca strahom pak ve sveti Mikloš sam dare nosi. Stareši so ne pozabili, sam ne znati je li so navčili i svojo deco, vnuke kaj se den predi Mikloševa čistijo šolci i čižmice i vu bloke mečejo kaj sveti Mikloš ima kam dare nametati. Negda je tak bilo, ak so šolci ne bili čisti dobil si šibo, a denes stareši deci se šenkajo. Posle svetoga Mikloša mali Isusek ostavlja svoje dare pod borom, a mam posle Božiča je Štefaje, a godovjaki Štefi so se navek posebno svetkuvali jerbo je sveti Štefek bil prvi Jezušov mučenik. Posle Štefeka je i apostol Ivek da se blagoslivlja vino i jabuke. A znate kak je to, navek je blagoslovljeno vino bilo bolše pak ga unda tre sprobati i to vejčpot. Den posle Ivaja je Herodešovo. Negda so roditeli svojo deco vjutro z šibom budili, a selski dečki so hodali od hiže do hiže z korbačima i posebno bi spokali one šteri so zabili za te osvetek. Janja z Muzeja nas je se zmislila na korbače, pak smo zazvedili kak se korbači delajo z vrbovi šibi, a negda so se delali od setinci šteri so po trataj rasli. Morem vam reči da sam več dugo ne videl setince, a niti pak korbače. Denes ga setinci več ne, a i šibi ga malo jerbo lefko je bilo z šibi korbače splesti dok so rasle šibe kaj so se žjif korpe i korpice plele tak da je denes i šibo teško najti. No, oni šteri se ravnajo kaj nekomo zravnajo hrpta z korbačima oni se na vreme šibe nabavijo.
Božič nam je več pred vrati, na poceko, otprite vrata i pustite ga nutri. Ne bodem vam čestital svetke šteri so pred nami, šteri dohajajo, nek bodem vam zaželel srečnoga Božiča, čuda sega sam ne nikaj hudoga, a nejveč Božjega blagoslova i zdraviča!
