Kak se bodo spominali Peđa, Sandra i levičari ?
Najbrž je i dragi Božek pomogel kaj je Ivek Turudičov zebrani za glavnoga državnoga fiškala pak je to zdiglo na noge se naše levičare šteri so kanili zastajti Iveka na poto do fotelje glavnoga. Ne sam kaj so oporbenjaki (čitaj: SDP-e i družina) skočili na noge junačke, i to na one leve, nek so organizirali mitinga na Markijovomo trgo tak da smo pravzaprav zazvedili kaj jiv itak gvinta. Ne gvinta jiv tuliko HDZ-e nek jiv gvinta kaj hadezeovci preveč dugo vedrijo i oblačijo i kaj nikak nebrejo do Banski dvorov. Točneše rečeno, Ivek Turudičov nam je pomogel kaj smo zazvedili kaj gvinta levičare v oporbi: nikak da dojdejo do cugli vlasti, očem reči, nikak da cugle vlasti dojdo v jive leve roke. Najgerek sam, jako sam najgerek kak bi itak zgledala ta jiva vlast jerbo kuliko čujemo oni bi meli dva premijere, očem reči, premijera i premijerko. Brzčas bi dopolne hercuval z Lepom našom premijer kak od brega odvaljen Peđa i to Grbinov, a popolne bi cugle vlasti vu svoje preštimane roke, vu šterima je osemnajst let držala knige pravice i z šterima je hitila venca v Dunav i to vu Vukovaro lani v novembro, zela Sandra Benčič. No, Sandra je još ne sigurna je li bode mogla dobiti cugle vlasti vu svoje “školane roke” jerbo mora predi najti svojo diplomo pravnoga faksa za štero niti dragi Božek ne zna de se je zagubila. Pak neje Lepa naša tak nisko pala kaj bodemo meli premijerko ili pak ministrico vanjskih poslov bez diplome. A premijerki ili pak ministrici se nej šikalo kaj bi mela diplomo z Banja Luke, Sarajeva ili pak Mostara kak nešterni generali. Dalija Oreškovič bi trebala biti ministrica za pravico i sode, Šike Krešo Beljak, “glavni seljak” je na ceduljki za ministra poljoprivrednikov i traktoristov, Tomek Tomaševičov je stručnjak za smetje, očem reči, ekologijo i Jakuševec, Kata Pejovićova, zvana “šmajser” bi štela biti ministrica obrane, a Severina bi bila z demografijo…
Ne znati z kakšim jezikom bodo se itak spominali naši levičari dok jenoga lepoga dneva dojdejo na vlast (???), ak znuomo da so Sandra Benčič i jena pajdašija v Saboro zdigli roke protiv Zakona o hrvackomo jeziko. Kak mi je pošepetnula teca Franca, navelikom se šepetuji kak so Sandra i Peđa za to kaj bodemo mi v Lepoj našoj meli nekšega jugo jezika. Što bi se tomo nadjal kaj bi naši levičari (čitaj: jugonostalgičari) šteli kaj bi mi v Lepoj našoj stali jenoga velikoga koraka nazaj. Kaj god! Kuliko znuomo Juga je odišla po riti k meši i to zanavek.
Čovek se vuči dok je živ, pak tak i Milanovič
Nigdar je Zoki Milanovičov ne bil, otkak je postal „glavni rančer“ na Pantovčako, na Tuđmanovoj strani, a ve je najempot pofalil prvoga našega precednika Tuđmana. Zoki je rekel i to z čista mira: “Tuđman je bil sto pot vekši demokrata od Plenkoviča!” Kaj reči, Zoki je, brzčas, fletno to zazvedil, ali je nikaj ne rekel kaj je to Plenkovič itak napravil kaj ga je Zoki svrstal v drugo demokracko ligo. Od da se je Zoki doselil na Pantovčak “šaka z Pantovčaka” malo, malo pak nas iznenadi, očem reči, neje muoči znati kaj bode Zoki rekel, a ne kaj bi mogli znati kaj si grunta, a akj bode napravil. Ne muoči reči, čuda vejč dela nek unda dok je bil premijer jerbo je unda delal malo vejč kak nikaj.
Zoki je bil nejglasneši kaj se dotikavle Iveka Turudiča. O tomo sam vam več pisal. No, nesam uspel zazvediti je li se Zoki boji kaj nej Ivek jegovo ritico dovlekel ma šekret ili pak so v pitanjo nečije druge i glatkeše ritice? Nebrem veruvati da je još ne pozabil kaj mo je Ivek poslal na službeni pot v Dojčland Jožeka Perkoviča i Zdravkeca Mustača? Kaj bom vam rekel, teca Franca je stoprocentno sigurna da je Zoki ne pozabil kaj mo je Ivek napravil makar je to bilo pred cirka deset let. Još nekaj, Ivek je rehabiliteral blaženoga Lojzeka Stepinca, očem reči, poništil je presudo štero so za Stepinca zmislili Jakov Blaževič i Titijovi komunisti. Ivek je na svetlo dneva donesel istino kak je Lojzek ne bil zločinac v Drugomo rato nek je pomagal sima komu je trelo, a nejveč deci z Kozare.
Otkod traktoristima traktori?
Denes več nišči ne štrajka makar so štrajki ne zabrajeni, neso štrajkali niti soci, neso štrajkali navučiteli i profesori, neso štrajkali doktori, a bormeš so ne štrajkali niti traktoristi… Denes vam nišči ne štrajka nek si, kak se to lepo po štacunski veli, prosvjeduju, ak jim nekaj ne paše oni zmislijo prosvjeda. O prosvjedo na Markijovomo trgo, šteroga so zmislili Peđa i Sandra i šteri se je pretvoriv v miting sam vam več dosti toga napisal, a ve bi vam štel nekaj reči o prosvjedo traktorista na traktorima. Ne znati što je toga prosvjeda zmislil i zakaj so traktoristi prosvjedovali? Još bi nekaj štel znati makar me je ne brige, zakaj so prosvjedovali sam traktoristi v Đakovo i naši međimorski ?. Kak veli teca Franca, vidla žaba kak je kobila zdigla nogo pre kovačo pak se je unda i žaba naprčila s zdigjenom nogom, ali mi je ne štela reči šteri so to traktoristi bili tak kak žabe, naši ili pak “lipicaneri”? No, štel sam vam reči da mi nikak nejde v glavo zakaj so naši traktoristi pravzaprav prosvjedovali? Prepovedali so kak furt i navek delajo i kak još najdejo kupca, ali te kupec ne plača, kaj bi rekli robo mo otpelajo, ali penez nikak da se fčakajo. To je ne ruon lepo ak je to tak, ali i ja bi tu mel nekaj za pitati: dok so se traktori i traktoristi pelali dimo z prosvjeda videl sam da so na prosvjedo bili samo veliki ili kak to veli teca Franca, sam debeli traktori šteri ne košptajo malo. To so traktori za šteroga treba dati pun kufer penez, a ako čovek oče dati za tak veliko marše tak čuda penez unda mora i te peneze meti. Vidite, tu sam vas čakal: otkod našim traktoristima tak veliki penezi ak jim nišči ne plača ono kaj so prodali? Najte me krivo razmeti, ne bi štel zabraniti traktoristima kaj bi prosvjedovali, ali nek bar na prosvjede dojte z onim starim i menšim traktorima kaj si unda bodemo i mi gruntali kak jim šeft slabo ide, a ne kaj jafčejo kak jim je teško, a dopelajo se v “mercedesima”. I to v novima!
