-1.7 C
Čakovec
Nedjelja, 5 veljače, 2023

Sam Božek zna de živijo Hrvati

Si znuomo, verjem da smo ne pozabili, još smo ne tuliko senilni, kak je to bilo lani dok se prinas vu Lepoj našoj počelo popišuvati i zapišuvati, kaj nem rekel brojiti kuliko ga itak je nas Međimorcov i naših sosedov Hrvatov pod ovom kapom Nebeskom. Ruon tak nam je poznato da je falilo hajdi oni šteri so popišuvali, a med onima kaj so hodali od lese do lese, očem reči, ode vrat do vrat je bilo i oni kaj so znali čitati, a pisanje jim je bila slabeša strana. I to čuda slabeša. I unda je ne čudno kaj je to popišuvanje pučanstva prešlo onak kak je prešlo. Nebom rekel da popisano pučanstvo predi prebrojijo v Bangladešo nego prinas v Lepoj našoj, makar je tak, jerbo je hajdi naših zemljakov odišlo, z koronom, k našemo dragomo Božeko na račun pak so niti ne znali kuliko nas Hrvatov živi v Lepoj našoj. No, denemo to na stran i hitimo oko na te listeke popisa, očem reči, kaj poglednemo kaj so naprajli i kuliko so nas nabrojili popisivači, a kuliko nas je ostalo dok so se posla prijeli brojači. Ne moram vam niti reči kak so brojači nejglavneši navek posle kak mi odidemo dimo dok hodamo glase davat našim političarima kaj bodo rižili z nami i hercuvali štiri leti kuliko jim mandat traje. Brojači so rekli kak nas je cirka deset procentov meje nek pred deset let, točneše rečeno božekovo sonce v Lepoj našo greje 3.871.833 građevina /rekel bi negdašji premijer Tihomir Oreškovič). Ne zna se točno kam so se rezišli oni Hrvati šteri falijo jerbo zapisati to je ne bila zadača naših popisivačov, a unda pak so niti brojači to ne zazvedili. Kaj vam nek rečem, ljudi so popisani, žene i deca so zapisani, marha je pobrojena, se črno na belo, a ruon tak je zapisasno što hoda v cirkvo i kakšo, što ne hoda, zakaj ne hoda i v štero ne hoda.

Mi Hrvati smo zazvedili kak ga nas hajdi meje, a Milči Pupovac se čudi kak ga i Srba meje, a on i jegova družina furt delajo na tomo kaj bode Srbov vejč i to bar v Lepoj našoj. No, popisivači so zapisali sam one šteri so bili toma, tu na hrvackoj zemlici, a nejso zapisali i one štero so furt na službenomo poto i to tam onkraj Drine. Bomo vidli kaj se bode itak pripetilo z Srbima jerbo je Milči obečal da bode napravil se kaj more, a pozval bo i pajdaše, kaj se broj Srba poveča kak v Lepoj našoj tak i vu Vukovaro. Najme kaj, Srbi vu Vukovaro so nabrojeni i popisani meje od 30 procentov tak da ve nema što čitati table z čirilicom pak jiv bode vukovarski gracki načelnik Ivek Penava moral zeti doli i otpelati v ropotarnico povjesti, očem reči, bode jiv dal Milčijo kaj si on to shrani v romare jegove srpske stranjke.

Što je brojil vjernike??

Nejveč halabuke se je zdiglo okoli građanov Lejpe naše šteri hodajo v cirkvo. V tablicaj vu štere smo bili zapišuvani ga bilo hajdi kocki de so se mogli zapisati oni šteri hodajo v cirkvo, šteri verjejo da naš dragi Božek postoji, kak i oni šteri verjejo da  dragi Božek ne postoji. Popisani so si sam nišči, pak niti dragi Božek ne zna kam so zapisani. Ve smo prvič, od stoletja sedmog, zazvedili kak so katoliki ne krščani, pak je unda i tak zapisano. Zišlo je vum z teh paperov, štere so popunjavali popisivači kak ga krščanov čuda vejč, a katolikov čuda meje, ali ga ne čuda vejč onih šteri ne delajo stisko v cirkvi. Najgerek sam, jako sam najgerek ako Pupi zazvedi da ga jegovih pravoslavcov čuda meje nek Srbinov unda bode on sforseral pre svojeme pajdašo i sponzoro Drašeko Plenkovičo kaj se bode to se skupa išlo još jempot brojit i popišuvat. Mora se tak dugo popišuvat dok bode broj Srbinov i pravoslavcov štimal z brojom šteri je zapisani v Memorandumo „SANU 2“ kak ne ni pak došlo do svaje izmeđo nas i naši soedov i kaj se ne bomo morali pak spominati prek nišana.

Si smo se nadjali da bodo se ti listeki prebrojili, makar so brojači to delali kak Noa svojo barko, i da bodemo unda točno znali kuliko ga v Lepoj našoj katolika, kuliko krščana, a kuliko pravoslavcov, protestantov i na se zadje kuliko ga nezerenošov (čitaj: ateisti) i rotorani (čitaj: agnostiki). Ve smo to ne zazvedili, ali bodemo počakali još deset let pak nas unda bodo brojili roboti.

Verjem da ste čuli kak so zadji pot brojili i popišuvali pučanstvo, predi drugoga rata, 1931. leta i unda je v našemo Raskrižjo ne živel niti jeden Janez, a 1993. leta nam je Raskrižje odišlo za sneho v Deželo makar ga tam još navek vejč Međimorcov (čitaj: Hrvatov) nek Janezov. Kaj reči, čudni so negda ne sam poti Božekovi nek i čovekovi. Naši ljudi so se navčili par reči slovenski i postali so Janezi, a po noči, dok jiv je nišči ne videl, so na ploče po grobjima klesali trdo Č na svojim međimorskim (hrvackim) prezimenima. Kuliko vidimo nekomo je i Dežela obečana zemla, a ne sam Dojčland ili pak Švicarska, Irska…

Magdica  je  još  navek  v  rešto

Naša Magdica (čitaj: Magdalena) je još navek v rešto. I ne sam ona nek i jeni vujča. Dok Magdica čuči i hmajikuje v rešto ovi jeni Poncije Pilati iščejo jene grehe kaj ne bode zišlo kak je bila zabadav v rešto. Nekaj sam mel za čuti kak so joj našli nekšega potnoga naloga šteri je bil napisani za Kotoribo, a ona je žnjim odišla v Štrigovo na Urbanovo. A to je veliki greh prek šteroga ne muoči sam tak prejti. A to kaj sam ja katolik, a zapisali so me pod pravoslavne to nikomo nikaj? I ne sam to, Magdica je z tem drobnim grehima v rešto, a tri plinači šteri so v INI zamračili milijardo kuni gulijo kalmpera za opče dobro. Imate praf, što je Magdici kriv kaj so doma na vrto zapustili povrtele pak ne raste več kalamper??

Ivek  Sokačov  i  dale  na  konjo

Naš vodeči policajec Ivek Sokačov je znova zebrani za glavnoga sim policajima v Međimorjo. I to na pet let, kak smo se i nadjali. Dok je to zazvedila teca Franca mam mi je došla reči kak je stoprocentno sigurna da je te mandat od pet let zmišleni dok je Ivek prvič došel za načelnika, a predi, dok je bil Kruni Gosaričov unda je mandat bil štiri leti. Ne bi vam znal kaj tu reči, a ruon tak se nej štel zameriti niti teci jerbo mi je ona najduže rodbina i to nejbližeša. Kak Magdici vujča!

Ostavi komentar

Povezani članci

Ostanimo povezani

0FanoviLajkaj
3,695SljedbeniciSlijedi
14,700PretplatniciPretplatiti

NAJNOVIJE