15 C
Čakovec
Četvrtak, 28 ožujka, 2024

Prcinkulovo nišči nebre otkazati

Nesam mogel veruvati kaj sam čul, čital ili pak poslušal v zadje vreme: Prcinkulovo v Čakovco je otkazano! Spituvlem se okoli je li se je to to pravzaprav pripetilo i vsepsod mi velijo da je tak. Unda spituvlem se okoli: što je itak mogel otkazati Prcinkulovo? Zazvedil sam da so to naprajli čakoski gracki oci i turistički težaki. Dok sam to zazvedil sam počel sam sebe spituvati: a kaj je to pravzaprav Prcinkulovo? Pak se Prcinkulovo v Čakovco obslužavle več 360 let i do ve ga je nigdar nišči i nikaj ne otkazalo, obslužavle otkak je Nikola Zrinski dopelal fratre v Čakovec. Sveti Franjo je zafremal Prcinkulovo v trinajstomo stoletjo dok je hodal po zemli i zato ga fratri obslužavlejo i to sako leto drugoga augustuša i Prcinkulovo nebre nišči otkazati ili pak preseliti nekam drugam. Prcinkulovo se obslužavle sako leto što dojde dobro dojde.

Ovo leto da so čakoski turistički težaki otkazali Prcinkulovo je glavno proščejarsko mešo služil biškop i to bjelovarski, monsinjor Vjekoslav Huzjak, i meša je bila vuni na fratarskomo dvoriščo, kak, i za sako Prcinkulovo, na friškomo zrako tak kaj je zišlo vejč ljudi nek v cirkvo i nejso delali stisko nek so držali i razmaka. Došli so si šteri so mogli dojti, a ne kaj bi Prcinkulovo bilo otkazano. Pak so Prcinkulovo ne zafremali čakoski turistički težaki kaj bi ga oni mogli otkazati. Najme kaj, čakoski turistički težaki so otkazali svoje 56. Prcinkulovo, a čakoski fratri i vjerniki so preslavili svoje 360. Prcinkulovo.

Prcinkulovo se je obslužavalo makar je ne došla Severina, Nives Celzijus ili pak Jelena Rozga. Nega bilo niti Bajage, Dražena Zečiča, a niti pak Željkija Joksimoviča. Oni so bili pozvani pak otkazani, a Prcinkulovo  se je brez jif obslužavalo. Na proščeje so došli si pozvani međimorski OPG-eji, šteri so popunili vulico pod mamrelami. Istina Božek, malo so falili međimorski brežni gradi, očem reči, vinogradi, ali ovo leto nam sako malo nekaj fali pak smo se prevčili i brez toga. Neje bilo lefko, ali smo se prifčili. Ve vidite kaj se korona dela od nas. Prinas je još dobro kaj ga nega niti jenoga betežnika, a mi bogoboječi Međimorci se pridržavlemo sega, očem reči, skorom sega kaj nam naši stožeri zapovejo ili pak zaprdnejo, kak to lepo po domačim veli moja teca Franca.

Minulo antikorona Prcinkulovo je bilo kak negdašje starinsko proščeje. Došli so ljudi z sih krajov Međimorja našega maloga, neka jiv je bilo z Mađarske, a došlo je i nekaj pobožni ženi z Dežele. Kak i sako leto. Proščeniki so zbavili mešo, potlim so se pomalem klatarili od štanda do štanda, nekaj so si kupili, nekaj so si pojeli, spili i na se zadje so završili pre licitaro na gvirco. Tak so naprajli stareši proščeniki, a oni mlajši so si predi meše našli mesto na terasama vu glavnoj vulici pod mamrelaj i neso delali stisko v cirkvi. Stareši Čakovčanci, šteri držijo do sebe i do Prcinkolovoga kak proščeja so si svojo rodbino pozvali dimo pod brajde, kak je to negda bilo.

Morem vam reči da so koncertlini nejbole falili zakajenim proščenikima i našel sam se pre čakoski gracki vuri de so oni gombali na čakoske turističke težaki jerbo ga ne koncertlinov. Niti oni so se ne mogli dospomenuti što jim je nejbole falil: ovima z Lopatki je nejbole falila Severina, ovi z Kuršanca so drukali za Nives Celzijus, a ovi z Paraga so bili navijeni za fajno i napeto (seposot) Jelenu Rozga. Jive dekle, puce ili žene, so se ne mogle dospomenuti je li bi rajši Zečiča ili pak Joksimoviča. Jen čas so gombali, halavajili, a unda so odišli na pivo i proščeje je minulo.

Dok čovek  več pot nekaj čita unda hadji pot zazvedi nekaj novoga. Tak sam, ne tak zdavnja, naletel na cajtunge v šterima je pisalo kak se nešterni naši novozebrani saborniki bunijo protiv temeljnoga (kaj god to značilo) ljuckoga prava na pobačaj. Ne sam mogel zazvediti jerbo je ne pisalo je li to pravo morejo rabiti sam žene ili pak na pobačaj imajo pravo i moški. Prosim vas lepo, ako je to temeljno ljucko pravo unda najbrž vredi za se, kak za one šteri nosijo hlače, tak i za one štere nosijo kiklje. Denes je teško po obleki respoznati šteri je moški, a štera je žensko. Znate kaj, furt si gruntam, zakaj bi opče moralo dojti do pobačaja? Te naši mladi, šteri se bavijo z tem športom posle šteroga se dobavlajo deca, bi morali znati ak se spravijo k venodjanjo da se z takšim poslom i deca delajo. Nekak mi se zdi da se dečko i puca  sam zgrabijo, on se joj rivle nutri, ona se natekne jega i ak se unda nekaj pripeti unda se čudijo kak picek glisti. Jako so spametni, se znajo, Interneta furt sobom nosijo z sobom, a ne znajo kak se delajo deca, očem reči, ne znajo da deco ne nosijo rode. Najte me krivo razmeti, ali vam meni to nejde v glavo: sam zato kaj smo mi to dete napravili mam imamo pravo (i to temeljno) kaj ga sfondamo ako nam ne paše i ako ga ne nucamo??

Ruon tak imamo i temeljno pravo na posel. Ak očemo jesti i od nečega živeti moramo i delati. Nina Badričova naša pevačica nam se požalila kak jo nišči ne zove kaj bi popevala ve vu vreme korone. Ona nebre razmeti da je ljudima v koroni ne do pesme. Čim so naši ljudi zazvedili da je žena brez posla i da nema za korico kruha ponudili so joj kaj dojde k nam kalampera brat i to ne za malo dnevnicom od 300 kuni. A kcoj dobi jesti i pijačo. Po kalamperiščo bi mogla i popevati, pak bi nabrž moški i nekaj fteknuli med zizeke. I ne mora dojti sama, more sobom dopelati i pajdašijo, posla ga dosti za se, a i nadnica je za se jednaka.Pak je to lepo od naših Beličancov kaj pomažejo one šterima je korona kruha zela. Najgerek sam kuliko jiv bode itak došlo na Belico?

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE