Minuli tjeden sam vam pisal o tomo kak v ovoj našoj, očem reči, Lepoj našoj kradejo, kaj nem rekel hasnujejo ono kaj je ne jivo. Još so ovi naši cajtungi pravzaprav ne došli na svetlo dneva več se zazvedilo kak načelnik Murtera Toni Turčinov rasfrčkavle opčinske peneze na sebe i na ženske okoli sebe, očem reči, pod sobom. Čovek je skočil malo v Osterajh kaj se Austrijancima pofali kak ga v jegovi opčini nega korone i kak ga ve po leti pet pot ljudi vejč nek je to po zimi dok stranjski odidejo. Rekel sam vam da so i opčinari tati, makar so ne hadezeovci, jerbo nebrejo zdržati kaj nej potrošili oliti ponucali vejč nek imajo, dok jim se za to pokaže prilika. Znamo, jerbo smo prečitali kak je Toni ne bil sam v Osterajho i kak je ne sam širil istino o turizmo na Murteru i Kornatima, točneše rečeno, na hataro jegove opčine. Žnjim so bile i dve gospe štere turizma na Murtero imajo v malomo prsto. Ne znati kak je Tonči žnjimi rešaval posle, ali se je zazvedilo kak je v drobne vure (čitaj: sitne sate) završil v javni hiži (to se vam po gracki veli: bordel) i nikaj se je ne čulo kaj je on tam delal sam je došla na svetlo dneva istina da je Toni vu te drobne vure tam peglal kartico i to opčinsko. Nekaj si gruntam, a kaj bi Toni, takši mož kak od brega fkrhjeni, mogel delati v bordelo v te drobne vure? Kak zgledi on je hajdi toga zbavil v „črleni hiži“ z črlenimi lampaši da je tripot moral peglati. Znate kak to Mujo veli: tripot je tripot. To je se kaj za ve znamo, ali nišči nam je ne povedal kak je Toni svojoj ženi dopovedal kaj je delal v javni hiži vu te drobne vure i to tripot. Bilo bi jako dobro kaj bi to Toni dal vum kaj bi se i mi od jega nekaj navčili, očem reči, kaj bi znali kaj nek rečemo našim ženama dok dojdemo rano vjutro dimo i ne preveč nalijani.
Črez par dni se je zavedilo da je načelnik Toni dobil opčinsko nagrado „Numero uno“ kak čovek šteri je v opčini obrnul nejveč ženi. Nesmo točno zazvedili što je se daval glase je li sam žene ili pak i moški? One šterima je platil so ne mele pravo glasa!
Pital je japa Iveka pučkoškolca: – Ivek, kaj bi ti štel biti dok zrasteš, dok bodeš veliki i završiš škole? – Kaj, pak načelnik Murtera! – Sinek moj, i tata bi štel to isto biti bar tak dugo dok ti ne završiš škole.
S Zokijom i Sanjom nam je nigdar ne dosadno??
Prepoveda se, i to na velikom, kak je još ne deta točna na i v klasični gimnaziji v štero je hodal Sanjin i Zokijov sin. Profesorica z matematike je dala malomo Milanovičo za popravak četvorke jenoga zadatka za dimo. Zadatak je bil ovakši: – Ako jeno pivo košta 5,oo kuni kuliko koštajo dve pive? Drugo jutro se je oglasila gospođa Sanja i to prek telefona i prosila je profesorico nek več ne davle tak teške zadatke za dimo jerbo so ne spali celo noč i to zbog radi toga kaj je japa obrnul celo Lepo našo i iskal je de so to itak te pive po 5,oo kuni!?
Nekaj se je ipak pripetilo v Lepoj našoj!!??
Moramo deti roko na srce i priznati da se tomo v Lepoj našoj neje nišči nadjal. Najme kaj, Srbi (čitaj: precednik Aco Vučič) som silom očejo v Jasenovac, a mi Hrvati ne da jim ne damo nek jiv ne pustimo!
Dinamovci so ne do kraja prepravleni
Kak zgledi Zdravkec Mamičov, šteri je na privremenomo poslo pre našim sosedima v Bosni, a još vejč, v Hercegovini je malo pustil z rok cugle labodoritašov, trenerov i uprave Dinamovcov. To se je mam vidlo na prvoj tekmi protiv Lokomotive. Dinamovci so počeli igrati stopram unda dok je Lokomotiva več zabila dva gole. Istina Božek, Dinamovci so se skockali tak da so do kraja utakmice ipak uspeli pobediti Lokose, ali nekak, kak je rekla teca Franca, jako bogo. Nadjali smo se da bodo Dinamovci pokazali kaj znajo i kaj morejo v tork protiv Makedoncov v kvalifikacijama za Ligo prvakov, ali i tu je ne se genulo kak so splanerali. Makedonci so dvapot vritnuli labodo na Livakovičov gol i zabili so dva gole tak kaj so Dinamovci jedva uspeli zvleči boda. Trener Dinamovcov Ante Čačič je svoje labodoritaše ne se navčil nek sam pol: do ve je vredilo da je pobednik ona momčad štera zabije vejč golov, ali to je sam jena istina jerbo pobednik more biti i ona momčad štera prime meje golov. Kuliko vidimo tre jeno i drugo meti na pameti jerbo Dinamovci so ne tak jaki kaj bi dečki v navali mogli zabiti vejč golov nek ovi dečki odzaj, skupa z Livakovičom, morejo prijeti.
V Međimorjo se odnavek pilo
Ne bi vam znal reči otkod se je dotepla tua navada v Međimorje kaj je saki den, bil on delovni ili pak svetek, počel z fraklecom. Odnegda so naši ljudi, očem reči, Međimorci meli šego kaj so po svojim gruntima, sadovjakima ili pak goricama pobirali se ono kaj je zraslo, se ono kaj nam je Božek dal i se se pospravljalo (črez prešo ili pak žgajaro) vu flaše, demižonke i lagve tak kaj se je melo za ponucati črez celo leto. Istina Božek, negda je v tem fraklecima, kupicama bilo reda, ali kak nam je dragi Božek sako leto se vejč toga dal tak smo punili fraklece vjutro, a kupice i kupičke odvečer, se gosteše i gosteše. Kak nam je standard rasel tak nam je i žeja bila se jakša i jakša. Zmislim se kak denes, bilo je to pred jeno tridesti-četrdeset let da se je zabranilo piti od jutra pak so se unda i krčme otpirale kesneše. Ali znate več kakši smo mi ljudi i da mi navek zmislimo nekaj novoga ak nam to paše. Znuom da so ranojutarnji težaki meli po oblokima krčmi, ali v dvoraj, fraklece tak da je saki svojega frakleca obrnul i to tak v časi kaj je niti ne moral postati z peciklinom. Tak so delali jeni, dok so drugi kupuvali „unučiče“ po štacunima i vozili so jiv sobom skupa z gablecom. Dok so političari vidli da „dok ne pijejo“ težaki so bole pijani na poslo unda so znova otprli krčme od ranoga jutra i na tomo je ostalo do dneva denešjega. Tre ljude navčiti (to se zove prventiva) kaj ne bodo pili vejč nek morejo podnesti i se bode vredo!
