Španjolci so nas načeli, a Albanci dotukli?
Kak je to se lepo zgledalo dok so naši labodoritaši došli v Dojčland i dok so se počeli prepravljati kaj bodo natiravali labodo na Evropskomo labodoritaškomo prvenstvo. Se je to bilo lepo i dobro dok so došli, dok so se prepravljali, ali je, kak to tečno veli teca Franca, došel vrag po svoje dok je sodec zafučnul i utakmica je počela. Još je ne niti minulo prvo poluvreme, a več so nam Španjolci vpičili tri komada, a mi smo se niti ne snašli. A došli smo kaj bodemo se pobedili z šterima smo morali igrati, a nejvekša nam je želja bila kaj pobedimo Španjolce jerbo smo žnjimi meli stare nerešene račune, a i lani so nam pred nosom odnesli pokala i zlatne želencije v Ligi labodoritaških nacija. Se smo znali kaj nam je za delati sam nam je to nikak ne išlo od roke, očem reči, ne od roke nek od noge. Nebrem reči, naši dečki so igrali, ali so ne zabivali dok so meli priliko, a Španjolci so se čuda meje igrali, ali so zato čuda vejč zabivali. Kak je počelo tak je i završilo jerbo je pred kraj utakmice Bruno Petkovič ne zabil niti elvera. Ne da ga je ne zabil nek mo ga je španjolski golman zabranil. Ruon tak lefko kak i lani vu finalo Lige nacija kaj bi rekli da se je Bruno nikaj ne navčil od lani. Neje zabil elvera, a rival se kaj bo ga on rital. Kuliko vidimo neje dosti meti voljo, neje dosti znati nek je tre i elvera zabiti. Najbrž se je Petkovič preveč družil i paril z Livajom pak je počel i tak šlampasto elvere strelati.
Kak so nam rekli šporcki analitičari protiv Španjolske, dobro so igrali sam labodoritaši Hajduka, a si drugi so se vlekli po igrališčo kak da so igrali po kazni.
Bil je to jeden slab den, a unda pak i drugi…
Posle tekme protiv Španjolske si so priznali, jerbo jim je to bilo nejleži, da je to bil jeden slab den naših labodoritašov i da bode se drugač (bolše i lepše) na tekmi protiv Albancov. I tak je i bilo tak dugo dok je laboda ne genula z centra. Još so naši labodoritaši, Vatreni ili pak Kockasti, kak god vam paše, niti ne počeli igrati, a več se laboda koprcala vu naši mreži za hrptom našega „portera“ Dominika Livakoviča. Nikak i nikak so naši Vatreni ne hapili igrati onak kak znajo i kak smo se mi nadjali da bodo igrali jerbo nebrejo dva dni za redom meti slaboga dneva. Meli smo srečo do poluvremena kaj so Albanci ne još dva-tri pot fritnuli labodo v gol, a unda je došlo drugo poluvreme, drugi igrači i druga igra. Več od trifrtalj tekme je minulo i unda nam se je otprlo pak smo za dve minote zabili dva gole. Si, kak naši labodoritaši, tak kibici na tribinaj v Hamburgo tak i mi pred televizoraj v Lepoj našoj smo se poveselili kak je se došlo na svoje. Ali, kuliko znuomo, vrag nigdar ne spi (zato ima podočnjake) pak so nam Albanci zabili gola i to predi nek je sodec odfučkal kraja jerbo so naši Vatreni branili te dva gole štere so zabili mesto kaj bi zabili i tretjega. A mogli so, meli so hajdi priliki.
Ve smo ne meli hudoga dneva nek smo ne meli srečo tak da ve moramo pobediti Talijane v pondelek ak Vatreni očejo iti dale, a mi se to nadjamo jerbo so nas tak navčili. Neso naši labodoritaši stari, neso pozabili igrati, ali i drugi ričejo labodo se bole i bole. Naleteli so Belgijanci, Ukrajinci, Mađari, a ne sam mi.
Ali tre se još nadjati. Sa je sreča kaj je Dojčland ne tak blizo pak je naš izbornik Zlatko Daličov ne čul se kaj so mo kleli oni šteri ga nemajo radi kak i oni šteri imajo labodritanje v malomo prsto. A tkaših ga v Lepoj našoj cirka okoli štiri milijonov.
Kaj so itak iskali policaji vu našoj Vajdi?
Nikaj mi je ne bilo čudno kaj so naši ljudi, kak Čakovčanci tak i Međimorci, ne mogli dojti k sebi dok so čuli kak so policaji došli lohnit vu čakosko Vajdo jerbo je do ve Vajda bila na dobromo glaso i se kaj je dohajalo vu Vajdo je bila marha, a se kaj so vozili vum z Vajde je bilo meso. Dok so brati Pivac kupili Vajdo neje se nikaj preveč spremenilo samo to kaj je došla nova metla, a to nam je sima poznato da nova metla čistam drugač pomeče i zato so se žene na čehari spominale kak je vu Vajdi ve još vekši red nek je bil predi dok se je „stara metla“ brigala za red. I unda kak strela z vedroga neba došli so policaji. Ne znati je li je i tu med marhom i mesom nekaj nešči zahuzal ili pak so policaji došli po Vajdinoga jegera, šteri je još navek na dobromo glaso ili pak so došli po cvirke, šteri imajo veliko ceno jerbo jiv je saki den se meje i meje. A z čega bi vu Vajdi mogli naprajti cvirke ak prasci i svije štere vozijo vu Vajdo imajo tenkoga ili pak nikšega špeha?
Nejleži je z ljuckim tuči pikečoj živici
Nebrete veruvati kaj se našim ljudima, našim Međimorcima padne na pamet. Ali so ve to ne bili Međimorci nek Međimorke. So si puce v čakoskoj banki šteroj je gazda v belom Zagreb grado pregruntale kak bi one mogle z malo spametnešim poslima dojti do velikih penez. Kak so se one to spominale tak so i naprajle. Mele so praf dok so si pregruntale kak naši Međimoci još imajo hajdi penez kak v bankam tak i doma v strožokima. Ponudile so tem ljudima kamate kakše nišči v Lepoj našoj ne davle i „veliki“ gazdi so donesli peneze, a dimo so si odnesli bankine papere. I se je bilo vredo dok je ne vrag došel po svoje. Morem vam reči da so puce več nazobačile nekaj meje od dva milijone ojerov, dva mesece so delale iberštunde i nazopačile dva milijone. Kaj reči, ljudi šteri imajo vejč penez još več očejo jerbo da je ne tak ne bi halosili za čuda vekšim kamatama, a ve sam dragi Božek zna je li bodo dobili nazaj bar svoje peneze, očem reči, one štere so „kontraherali“ pre pucaj v zagrebečkoj banki. Sa sreča kaj teca Franca nema viška penez jerbo mortik bi ona svoje odnesla kaj malo vekši zrasli. Ne sam uspel zazvediti kakšega so biznisa itak puce tirale? Kakši god je bil, ali brzčas je nejleži z ljuckim tuči po ploto.
