Ne znati zakaj je precednik Zoki nahital cele kupe blata, drvja i kameja na profesorico matematike štera je več hajdi dugo v penziji, a negda je vučila matematiko starešega Zokijovoga sina i to sam zbog radi toga kaj ga je slabo navčila pak je mama moral ispravljati te lukje v sinovom znanjo, očem reči, morala se pobrigati kaj bode ocjena z matematike takša kakša priliči jivomo sino. A to kaj ga je profesorica ne navčila kak je morala to se zna čija je to briga. Ruon tak se točno ne zna zakaj je Zoki, kak je več ošter ne jezijo je, ne zašinfal ovo profepsrico, štera je letos zahuzala kaj je Sanjinomo i Zokijovom sino dala menšo ocjeno nek bi to moral dobiti precednikov sin? Najbrž si je Zoki fletno pregruntal da sinek mora iti i v četrti razred pak je čuda bole da se ne zameri profesorici kaj i za leto dni ne bode trelo delati nekše povišice kaj se ocjeni dotikavle!?
Kaj se Aleksa buni?
Verjem da si znate kak se Aleksandar Aleksa Vučič, precednik naših sosedov prek Drine, pobunil i svadil kaj so ga naši vodeči političari ne pustili na „hodočašče“ v Jasenovac? A neso ga pustili jerbo se je ne najavil kak je red nek je štel iti v Jasenovec mimo reda, očem reči, po prečeco. I ne sam to, štel sam reči kak je drug Ljubičica bela bil precednik negdašje Juge tridesti pet let i nigdar je ne bil v Jaenovco, a tua je mogel oditi da je štel i nikoga je ne moral pitati!
Bil sam na Golom otoko
Logori, Jasenovec i Goli otok morajo dojti na dnevni red čim se spominamo o Drugomo rato na ovomo našemo hataro i o državi štera je zafremana na ovomo našemo hataro. Poznato nam je kak je logor v Jasenovco delal od 1941. – 1945. leta pod jenim gazdima, a šest let posle pod drugim novim gazdima, očem reči, pod komunistima. Logor v Jasenovco je zaprti !951. leta, a unda se je otprti Goli otok jerbo navek je bilo onih šteri so ne plesali kak so gazdi igrali ili pak so bili malo na svojo roko. Nejpredi je delal sam Goli otok za moške, a črez par let so se i žene ne držale „hižnoga“ reda pak je za jiv otprti logor na malomo otoko polek Gologa, a to je bil Sveti Grgur. Žene so morale biti na „svojemo“ otolo jerbo da so jiv deli skupa z moškima morali bi unda otprti i zabavište za deco, a to je ne bilo v plano.Kaj reči, za teh četrdeset let kuliko je Goli otok delal? Tam bilo hajdi ljudi šteri so trli kameje i poslušali „političko nastavo“ saki den. A negda i v dve – tri šihte. Sega je bilo kaj sem čul i čital i zato me je furt nekaj vleklo kaj bi išel pogledati kak ve, kak denes zgledi te Goli otok. Dok sam več bil na Rabo na urlabo otpelal sam se jeden den prek na Goli. I kaj sam videl? Sam ono kaj je ostalo od negdašjega logora, a to je skorom nikaj. Se ono kaj je nekaj vredilo so sosedi z Raba, otpelali sebi na grunte. Ostale so sam hiže i to one od kamena i železne postele. Morem vam reči da so „nepoznati tati“ i pločice zidov strgali. Logor ne dela več 33 leti i morali smo žnjega naprajti spomen muzeja na se one šteri so tu bili črez minula leta i to kak zadji komunistički kazamat v Evropi i verjem da bi hajdi ljudi, turisto došlo to pogledati. Dosti ga hiži de so negda bili, stražari, doktori, bolnice, škole, šteri so napravleni od kamena i tu so se mogli naprajri hoteli, krčme, restorani. Ali mi, kakši smo več je, se ostavimo na milost i nemilost onima šteri so prvi došli. Nebremo si pomoči ak smo takši?
Kak dugo smo senjali Pelješkoga mosta?
Ne bi vam točno znal reči kak dugo smo senjali Pelješkoga mosta, ali ve ga imamo i pred par dni je puščeni v promet, očem reči, znova je Lepa naša v jenomo komado. Poznato nam je da je negda hrvatski Neum bil naš, bil je v Lepoj našoj, a unda četrdesetpete nam ga je Vladimir Bakaričov zel z rok i to je od unda morje Bosancov i Hercegovcov. A dok je Juga 1990.leta počela pokati po šavima i odišla po riti k meši, unda je i Neum odiše zaprav k našim sosedima. Ono kaj je napravleno četrdesetpete smo ne mogli poprajti, ali ve pak imamo Lepo našo v jenomo komado.
Most ne da je lepi nego je jako lepi ili kak mi v Lepoj našoj velimo: nejlepši na sveto, a oni kaj z sega spelavlejo huncvutarije velijo kak Neum ima nejlepšo zaobilaznico na sveto. Nek jim bo!
Morem vam reči da se je i Joža Manolič, kak jeden od nejstareših v Lepoj našoj razveselil i priznal dok je videl novoga mosta: – Tristo let sam to senjal!
Da bode prestalo goreti pre našim Dalmošima?
Otkak so počele te velike vručine, a to je več dva mesece, malo malo pak gori pre našim Dalmošima. Teško je reči što se to itak igra z ogjom kaj sako malo zgori par hektarov šume i sega kaj se v šumi i okoli je najde. Si vi šteri ste predi ili letos bili na debeloj vodi znate da je tam, se osim slane vode, suho kak šprih. Morem vam reči da sam Dalmošima bajal da bi mogli i oni, kak mi v Međimorjo, malo reda naprajti v tem šumicama i šumarkima pak unda se nej saki ogej tak „rezrasel“ kak se to ve pripeti. Ne brigajo se nikaj za te iglice, češere, listje, travo… kak da se to jiv ne dotikavle. Več bi jempot bil red kaj bi se tomo stalo na kraj i ak si gazdi nečejo sami počistiti nek to napravijo, gradi, opčine i nek gazdima pošlejo račune pak se bode leži z ogjima došlo na kraj.
A mi Međimorci imamo nejbolše vatrogasce
Moglo bi se reči da mi v Međimorjo imamo nejmeje ogji, a imamo nejbolše ogjogasce. Najme kaj, naši ogjogasci z Čakovca, Maloga Mihaljevca, Palinovca i Žiškovca so „branili boje“ Lepe naše na Olimpijadi ogjogascov pre našim sosedima Janezima v Celjo. Ogjogasci Čakovca so osvojili zlatno želencijo, a puce z Maloga Mihaljevca brončano. Kaj reči, saka čast i kapa do poda kak za dečke tak i za puce. Mi, prinas v Međimorjo imamo hajdi ogjogascov, nešterni so stari i sto let, kak napriliko Strahoninčari, a jega i stareših, ali zato ga prinas malo ogjov, a pomažemo, več hajdi let i Dalmošima, šteri so se ruon nikaj ne od nas navčili.
