Lepo je prinas v Međimorjo

Najbrž je jako lepo kak v Međimorjo tak i prinas v Čakovco?

Dok sam minuli tjeden došel na čakosko Gracko veče ostal sam iznenađen i zatečen jerbo sam vu prvomo redeo videl Stipea Mesičovoga. Bil je svetešje kredno oblečeni kaj je govorilo kak je došel na svetešjo sesijo Grackoga veča, a bil je vu prvomo redo kaj znači da je pozvani kak gost i to ne bilo kakši neg gost enc A (1A) prve klase. Neje minulo niti mesec dni kak je Stipe bil prinas vu Međimorjo na fešti za Den županije. Za Den županije je bil skupa z precednikom Lepe naše Zokijom Milanovičem. Još sam ne fregnul nikoga pitati je li bode i na Den grada došel precednik Zoki, a on se je več pojavil i smestil se mam polek Stipea. Mam mi se je vužgala svečica vu glavi kak so Stipe i Zoki došli uveličati Dan grada Čakovca isto onak kak so to naprajli Županiji pred mesec dni. Ve si znajo kuliko je naša županija i kuliko je naš grad Čakovec važen v Lepoj našoj da so denes važeći precednik Zoki Milanovičov i negdašji precednik Stipe Mesičov šteri to nikak neče i nebre prestati biti došli dvapot i to za mesec dni.

Več sam si dosti dugo gruntal kakša je to sila štera Stipea i Zokija saki mesec vleče v Međimorje naše malo. Najbrž jiv nešči zove da furt dohajajo. Hajdi pot znuomo reči da otkod je čoveko žena otod je i on, istina božek, Mesičova žena Milka je z Štrigove i on ima nekšega juša kaj sem dohaja, ali kaj Zoki furt dela prinas? Ve na Dnevo grada Čakovca nam je Zoki povedal kakša je to sila kaj ga furt i navek vleče v Međimorje. Najme kaj, Zoki je tak lepo govoril o Zrinskima i Frankopanima kaj smo i mi zazvedili kak je Međimorje več zdavnja v Evropi i kak so Međimorje dopelali v Evropo Zrinski pred nekaj vejč od štiristo let tak da god Stipe i Zoki dojdo v Međimorje oni pravzaprav dohajajo v “Staro Evropo” nejstarešo na ovomo hataro, štera je tu, ne od stoletja sedmoga, ali je zato tu od stoletja šesnajstoga, a to je čuda predi nek je Jadranka Kosor pustila Evropo k nam, na of naš hatar prek Šentilja pred 15 let. Morem vam reči da je Zoki govoril o nam Međimorcima tak kak da se štima z nami i da smo mi Međimorci pravzaprav jedna svetleša točka (čitaj: županija) na celomo hataro Lepe naše.

Morem vam reči da je Zoki jako lepo govoril o “falačko zemle med dvemi vodami”, o ljudima šteri tu živijo, o političarima šteri tu hercujejo, tak nas je falil kaj je i Međimorje naše malo zarival vu grb Lepe naše, ali na se zadje nam je pozabil čestitati Den Državnosti. No, makar ga nam je ne čestital mi smo drugi den ostali doma i preslavili Den državnovnosti skupa z cirkvenim svetkom Tijelovim. Kaj se fešti dotikavle tu smo čuda bole zgrabni nek dok se tre posla prijeti.

Zrinski so dobili spomenike

Kak so čakoski gracki oci navelikom obečuvali Čakovčanke i Čakovčanci so za svoj Den grada dobili i spomenika vu vulici Matice Hrvatcke i to prek nejlepše čakoske hiže vu šteroj hercujejo Međimorske vode. Još lani je na svetlo dneva došla istina kak je Juraj Zrinski IV napisal Poveljo 1579. leta po šteroj je ondašje naselje Čakovec dobilo status trgovišča pak se je mogel fletneše razvijati i hajdi predi je postal grad nek nešterna druga mesta ne sam v Lepoj našoj nek i okoli toga hatara. Spomenik je Juriju Zrinskom IV Grad Čakovec postavil kaj mo se zafali kaj je ubrzal razvoj grada i kaj je Čakovec postal trgovačko središte čuda predi nek so se to Čakovčanci i Čakovčanke nadjali. Spomenika “Juraj Zrinski IV” je grado Čakovco poklonika čakoska Matica Hrvacka, a nabavila ga je v stečajo tiskare Zrinski jerbo so menađeri i težaki tiskare hitili puške v kuruzo tak da Zrinski ne posluje več duže od pet let. Razmim da je svojega spomenika dobil Juraj Zrinski jerbo je on bil vizionar i zafremal je prvo tiskaro v Nedeliščo 1574. leta, ali mi nikak nejde v glavo kaj so Čakovčanci postajli spomenika tiskari Zrinski štera je, kak smo več rekli, odišla po riti k meši več pred 5-6 let. Po takšemo bi spomenike morali dobiti i druge fabrike štere so hitile puške v kuruzo i več ne poslujejo, a to so napriliko GK, MTČ, Hrast, Trgocentar… i kaj nem dale nabrajal.

Međimorski plinači so došli na dober glas

Što bi se tomo nadjal kaj se bodo si spominali o našemo Međimorje-plino, očem reči, o našaj međimorskaj plinačaj. Lani so naši Međimorski plinači bili na hudomo glaso jerbo so prodavali plina nam Međimorcaj nejdražeše od sih trgovcov v Lepoj našoj i ne smo si mogli nikak pomoči. Dugo je trajal rat nas potrošačov z našaj plinačaj i na se zadje znate što je zvlekel krajšega kraja. Ovo leto so zagrebečki purgeri zazvedili da morejo kupiti falešega plina prinas v Međimorjo nek jim to prodavlejo Zagrepčanci. Ve se pokazalo da naši Međimorci morejo čuda vejč nek MOREJO ovi Tomaškovičovi vu Zagrebo i to čuda faleše. Delali so pomalem ili pak nikak dok jiv je nišči nikaj ne pital, a ve dok so došli Međimorci unda se je pokazalo da je naš teški međimorski konj čuda bolši za trke po zagrebečkim vulicama od zagrebečkih “lipicanerov”. Naši Međimorski plinači so pokazali purgerima kak se posli delajo, a najbrž bodo i naši međimorski političari, šteri so si navek bili zdobra z Hrvatima, pokazali kak se vodi politika, očem reči, kak se dela z penezima i kak se za meje penez more dobiti vejč toga. Ve pomalem dohaja vum ono kaj smo se mi Međimorci navčili od Zrinskih, šteri so još negda hercuvali v Austro:Ugarskoj, se bi bilo drugač da se je ve toga pitalo nas Međimorce (čitaj: Zrinske).

Ostavi komentar

Povezani članci

Ostanimo povezani

49,208FanoviLajkaj
608SljedbeniciSlijedi
0PretplatniciPretplatiti

NAJNOVIJE

“Lipanj, nestabilan prethodnik ljeta”

Još tjedan dana i onda život staje!

Neje Nemčija kak je negda bila

Nema fešte bez kotlića i koncerata