Negdašji čakoski gracki načelnik i još navek sabornik Štef Kovačov se je v majušo, predi zadjih izborov, štere je zgubil, plakal jerbo mo je nešči prek moba spominjal familijo i zagrozil mo se kak bo se pobrigal kaj on odide na drugi svet predi nek postane tretji pot prvi čovek Čakovca. Nikaj od toga, očem reči, nikaj hudoga se je ne pripetilo i si so ostali na brojo sam je, kak nam je poznato , Štef zgubil izbore. No za te političke soze na glavnomo čakoskomo trgo i pred televizijom se je zaintereserala policija i uskoki tak da so Štefa otpelali i deli so mo na hrbet greha kak je trgoval svojim ugledom, ugledom čakoskoga gradonačelnika i našega sabornika. Nekaj mi tu ipak nejde v glavo: zakaj so mo premetali hižo i grunta? Kaj so iskali je li morti ima doma negdi v komori, v pelnici ili pak na najži sklajenoga ugleda? I to so došli štiri mesece posle kak je zgubil izbore. A dok je zgubil izbore ostal je brez domačega čakoskoga ugleda, a ostal mo je sam državni, saborski, a tam se je ne ruon zalagal jerbo se je od zadjih izborov do ve još niti jempot ne javil za reč. Najbrž mo je se jasno, Sabor dela kak vurica tak da mo je Štef ne našel nikše falinge. Ak pak nema nikše zamjereke, nikaj protiv ili pak nekaj spametnoga za reči kaj se bode unda javljal? Štef, čovek od političkoga iskustva i ugleda on zna da se mora javiti, a da pak mora čkometi. Brzčas so ga jegovi partijci ostajli na miro jerbo so mo ne nikšo partisko zadačo dali v Saboro, kak da so več hitili političke puške v kuruzo, zdigli so roke od sega i os Štefa i prepustili so hadezeovcima i jivoj pajdašiji kaj vodijo Lepo našo onak kak si pregruntajo da je za jiv nejbole. Kak veli jeden moj pajdaš:Esdepe je na izdisajo samo oni to još ne znao, a si mi okoli jiv to vidimo i čkomimo. To je po onoj staroj, očem reči, starinskoj da mož zadji zazvedi kam mo se žena hoda past, očem reči, kam hoda v kvar.
Moram vam reči da mi sejeno nekaj tu nejde v glavo. Nejde mi v glavo kak delajo te naši uskoki i policija. Oni dojdejo vum, a to nišči ne zna, kaj bodo otpelali naše dečke šteri so nekaj krivi jerbo oni tak mislijo, a dok so došli več so jiv pred hižom dočakali novinari. Što je itak novinarima prišepetnol kaj se bode pripetilo pred jenom ili pak pre drugom hižom? Što? To te ja pitam? I kakše so unda to tajne službe ak ne znajo nikaj tajiti? Kak žene na čehari ili pak na mlekari.
Dok so nam otpelali župana, dok so mo na hrbet hitili mito od deset jezer on je podnesel ostavko tak da so ve pred nami novi izbori za župana. Kak so nam povedali oni šteri znajo prečitati izborne zakone, glase moramo iti davat nejkesneše za tri mesece. I ve se si čudijo kak niti hadeze, a niti pak esdepe nemajo svoje kandidate za župana. Pak kaj se čudijo, pak so jiv niti ne meli tak fletno dok so bili oni redovni izbori, a ne kaj bi ve nešči isplival za te dva tjedne. Nešči se bode včasi našel čim se bode zazvedilo da jiv bodemo mi, međimorsko biračko telo, hodali prebirat i zbirat.
Sa je sreča kaj je Štef Kovačov zgubil izbore v majušo, da je ne ve bi morali pak iti zbirat i novoga grackoga načelnika. Kuliko vidimo v sakoj nevoli se najde i nekaj dobroga. Probajte si pregrutati kak bi to grdo zgledalo da bi se ve pripovedalo i pisalo kak so uskoki otpelali čakoskoga gradonačelnika i sabornika Štefa, a ve pak so sam otpelali sabornika, a gradonačelni(ca)k je ostal.
Minuloga petka smo mi Međimorci preslavili Den oslobođenja našega maloga Međimorja i Den naših međimorskih branitelov. Rekli smo veliko fala našim međimorskim branitelima za se kaj so naprajli za naš „Falaček zemlice“, a i za Lepo našo, a posebno i znova smo zafalili našim herojima, jiv 78, šteri so položili svoje živote na oltar Lepe naše.
Moram vam reči da je hajdi ljudi, hajdi branitelov došlo kaj se je obiležil Den oslobođenja Međimorja. Došlo jiv je hajdi, a hajdi jiv je i falilo. Falil mi je glavni zapovednik i glavni komandant prinas v Međimorjo, Zdravko Holcinger, z conom zvani Giga. Nikak je ne moglo biti kaj bi on bil došel, a kaj ga ja ne bi videl jerbo se on z svojih dva metre nebre nikam skriti. Ne znati zakaj je ne došel kaj se pozdravi i vidi z svojim dečkima štere je vodil dok se je Međimorje naše malo, zanavek, rešavalo jugosoldateske. Nekaj mo se zamerilo ili pak ga je korona ostajla doma? Nebrem veruvati da bi korona mogla podrti i zastajti takšega velikoga i jakoga čoveka kak je Giga? Moremo biti srečni kaj je došel unda dok smo ga nejbole nucali, a to je bilo pred tridesti let, zel puško v roke i rekel bobu bob i popu pop i pretiral jugosoldatesko prek Drave, vum z Međimorja i to zanavek. Fala ti Giga još jempot, veliko fala!!!
Dok smo mi obiležavali 30 let otkak je kasarna postala vojarna, na drugoj strani so naši labodoritaši i jivi šefi zbirali novoga precednika Međimorskoga labodoritaškoga saveza. Najme kaj, hajdi onih šteri se bavijo z nejvekšom labdom i z labodoritašima so ne bili zadovolni kak je priločanec Mato Kljajičov vodil saveza i šteli so kaj on položi račune za svoj posel. Mato pak je ne veruval da mo je med labodoritaškim težakima odzvonilo, ali mo je nešči, predi nek je završil v opsajdo, to pošepetnol tak da je podnesel ostavko pet minot predi dvanaest, očem reči, predi nek so ga zmenili. Na se zadje mo je to došlo na isto: ostavka ili smena sejeno je završil v ropotarnici labodoritaške povjesti. Dok jempot počnejo zvonari zvoniti teško se je zvleči od penzije. Niti se je Matek ne uspel zvleči, makar si je on gruntal da ga si radi imajo. Ili si je on gruntal ili so mo oni tak pripovedali? Najbrž je Matek ne poslušal one šteri so jamrali protiv jega. Ili pak ne pozna nas Međimorce, naš spominek z figom v žepo!
