Vi več znate što je potepel svojega glasa…
Dok bodete čitali ovo moje premišlavanje več bodete se znali. Očem reči, znali bodete što je v sredo navečer feštal, de je pivo i vino teklo potokima (pravice ili pak nepravice), a što pak je obslužaval karmine. Najme kaj, davanje glasov je bole tak kak labodoritaška utakmica sam ka izbori nebrejo ziti nerešeno, kaj bi rekel nebre saka strana odnesti po jenoga boda. Tu dobiš se ili nikaj, pobediš ili pak odideš po riti k meši i unda čakaš novo utakmico štera je pak za štiri leti.
Toplo se nadjam da je ne pobedil Peđa Grbinov, nejvekši političar v Lepoj našoj jerbo unda bodemo mi Međimorci ostali brez svoje županije. Verjem da ste ne pozabili kak nam je Peđa lepo v Čakovco rekel kak je naša Međimorska županija zviška v Lepoj našoj, ali nam je ne rekel kak je ruon naša Međimorska županija, te nejlepši falaček zemle na sveto, zviška?
Kak so se moji vrtni sosedi ravnali glase davat?
Moram vam povedati kak so se naši vrtni sosedi ravnali glase davat. Falili so se na čehari kak sikak kanijo iti glase davat i komo bodo svojega dali. Nejpredi se je sosed Imbra pofalil kak bode svojega glasa dal za Lepo našo, kak mo je ona prva na pameti i to mam posle Juge. Znali smo i to odnegda kak sosed Imbra diše, kam ga sploh črleni herček vleče, ali nesmo se nadjali da je i soseda Tilča ne dauko od toga. Dok je več Imbra rekel komo kani svojega dati neje niti soseda mogla zdržati kaj se nej pofalila pred pajdašicami. Rekla je: Tuđman je meni prvi, odma posle Jožeka, ali ne Manoliča.
Umjetna inteligencija bode kajkaj toga zazvedila
Predi nekaj vejč od pedeset let, 1972. leta, je drug Tito v Slavonskomo brodo rekel da bode predi Sava tekla v rikverc nek bodo Hrvati meli svojo državo. Kak so te jegove reči došle na svetlo dneva mam posle Hrvackoga prtuletja več unda se je počelo pripovedati kak je drug Tito ne Hrvat kak je to bil Jožek Broz. Unda se je počelo pripovedati, ali se je dale od toga ne odišlo. Ne znati je li bi se i ve odišlo dale da se je ne pojavila umjetna inteligencija. Kaj bom vam rekel, neje nam trela umjetna inteligencija kaj bi se vidlo kak je Jožek Broz bil visoki čovek za ono vreme, bil je veliki meter osemdeset ili pak 180 centimetrov, a drug Tito je bili niski, očem reči, mali, sam 161 centimeter. To se je moglo videti i na slikami Jožeka i Titija, ali posle Drugoga rata so se Jožekove slike zdošle tak da smo mi obični smrtniki ne mogli videti prostim okom šteri od jiv dva je vekši, a šteri menši političar?
Ve se je odnekod zmogel Francoz šteri je bil z Jožekom vu Španjolskomo rato i priznal je kak je hajdi dugo pajdašil z Jožekom i kak je drug Tito nikak ne mogel biti isti čovek kak i Jožek. Čim je Francoz to priznal mam so se našle i slike kak Titijove tak i Jožekove i umjetna inteligencija je potvrdila da je to ne isti čovek. Ve se još šepetuji kak je drug Tito bil vanbračno dete Winstona Čerčila i da mo je zbogradi toga Čerčil tak čuda pomagal okoli Juge. Pomalem bo se se zazvedilo, pomalem bo se zazvedilo kak je šlosar govoril francoski, kak je igral v klavir, kak mo je prst zrasel i kak je ne znal zagorski.
Na se zadje se je ipak ne fčakal
Pred par dni nas je ostavil i odišel k Božeko na konačni obračun Jožek Manoličov. Sima nam je poznato kak smo se hecali na jegov račun kak oče predi nek odide k dragomo Božeko kaj bode još jempot doživel kaj bodo “beli ftiči” još jempot prvaki Lepe naše v labodoritanjo. Kuliko vidimo jegovo stoštiriletno srce je ne zdržalo to kaj so Hajdukovci dva pot za redom zgubili od Dinamovcov i to na Poljudo. Do te zgube Hajdukovci so se još navek mogli nadjati kaj bodo ovo leto prvaki Lepe naše, ali posle te zgubi so hitili puške v kuruzo, očem reči, za štiri dni so ostali bez prvoga mesta v prvenstvo, bez kupa i Rabuzinovoga sunca, ostali so bez precednika Lukše Jakobušiča, bez trenera Mislava Karoglana i brez par jezer stolcov na tribinama. Kuliko vidimo ostali so brez sega za sam štiri dni. I nikaj čudno kaj je Jožijovo srce to ne moglo zdržati.
Kaj bode itak z međimorskim rokometom?
Morem vam reči da me gvinta i to jako kaj bode z našim međimorskim rokometom? Kak i si drugi tak i mi prinas v Međimorjo imamo moškoga i ženskoga rokometa. Hajdi let nazaj je ženski rokomet bil hajdi više od moškoga rokometa jerbo so naše rokometašice več skorom petnajst let v Prvi ligi, a moški rokomet je bil hajdi niže otkak je Željko Kavranov, z conom zvani Toza, odišel z kluba. Pred leto dni se je Toza vrnul nazaj v međimorski rokomet i dečki so počeli se bole i bole igrati. I ne sam igrati nek i pobeđivati tak da so ovo leto došli nazaj vu Prvo ligo. Očem reči moški se je rokomet na velika vrata vrnul v hrvatski rokomet. Ovo sezono, štera ve ide krajo, je se genulo čuda bole nek so se nadjali i nejvekši čakoski i međimorski zagrižjenci: moški se pobeđuvlejo, a Zrinskice so, roun tak, bile čistam pre vrho. Kaj bi rekli, nigdar lepše, nigdar bole, a unda so ženska rokometna kola počela iti doli z brega i to se fletneše i fletneše. Nejpredi so Zrinskice počele gubiti od slabi ekipi, a unda so natirali i trenera z Koprivnice Gordana Mrđena, šteri jiv je dopelal do tretjega mesta mam posle Podravke i Lokomotive. Mrđena je zamenil novi trener Risto Arnaudovski, ali rezultati so mam bili slabeši. Ne znati kaj bode itak zišlo z te svaje vu ženskomo rokometo jerbo je hajdi ljudi odišlo z Uprave i si se pitajo da se bode mir, a i dobri rezultati vrnuli v ženski rokomet. Ve vidite da mi Međimorci ne znamo kaj naprajti dok nam preveč dobro ide?!
