Ne znam koga bi pravzaprav pital pak pitam vas kaj bode našim međimorskim kojima? Kak zgledi črez kratek čas bodemo mi ostali brez kojov za trko. A brez kojov je ne muoči naprej, nebrejo niti seljaki, a niti pak turistički težaki. Teca Franca mi je nekak srdito otpovedala kak je čuda leži najti koje med političaraj nek v međimorskaj štalaj. To je zgovorila, trupnula je z vrati i odila štihat vrčaka. Nesam jo niti ftegnul pitati koga je točno mela na pameti dok je pripovedala o kojima v politiki, ali ne bi se ruon složil z tecom jerbo so koji, pak tak i međimorski, preštimana marha i najbrž se ne kanijo rivati v politiko. To smo se, verjem, dospomenuli, ali nikaj ste mi ne otpovedali dok sam vas pital kaj bode z našim međimorskim kojima z šterima smo se na leta jako štimali? Negda ga hajdi kojov bilo po poljima, goricama i sadovjakima, a denes je muoči na prste jedne roke nabrojiti kuliko kojov ste vidli po celomo našemo, makar malomo, Međimorjo? Ne znati je li bode, črez par let, ostal bar štei koj z šterim se bodemo mogli štimati i kaj ga bodemo vnukima kazali. Ne tak zdavnja so se koji i sako sredo na semo prodavali, a denes kojov nigdi. Štel bi kaj bi se koji vrnuli med nas ljude, nekaj si gruntam da nas bodo ove sakefele krize natirale kaj bodemo nazaj meli i koje po štalaj i žjimi se štimali, a ne kaj se bodemo falili z kojima v traktoraj. Koji so si to brzčas zaslužili!
Kaj nam oče reči novi rotor v Buzovco?
Malo je duže trelo, ali je ipak, na se zadje, predelal rotor v Buzovco i to v nejdukšoj čakoskoj vulici, Preloškoj. Makar so ga sakefele meštri dugo klepali, kao Noa svojo barko, ali so ga na krajo lepo scifrali. Črleni je kak cvetje vu vrčako tece France. Morem vam reči da mi je jako čudno kaj so ga pofarbali na črleno ve dok so SDP-eovci potepli vlast v čakoskoj varoši? Par dni sam se gruntal o tomo i to mi se vleče na to da čakoski gracki oci kanijo naprajti koalicijo z SDP-eovcima pak so jim to ne znali kak drugač reči nek so jim to rekli prek novoga rotora.
To mi nekak vleče na to kak je frajski dečko pozval k sebi ledično puco. Rekel joj je: – Dojdi navečer k meni, nemam nikoga doma. I ona je došla, zvonila je i zvonila, i zaprav je ne bilo nikoga doma!
I Si Sveci zdiguvlejo cene…
Čim se Si Sveci se vrže približavlejo cene sega onoga kaj se nosi na grobje letijo v zrak, kaj ne bodem rekel v nebo. Nebrem veruvati kaj bi dragi Božek nekaj mel z tem, nabrž to mi ljudi dozidavlemo cene, a na Božeka se zgovarjamo. Da bi to bilo sam ovo leto brzčas bi si pregruntal kak to se, očem reči, sveče, lampaše, cvetje, vence, aranžmane dobavljamo z Ukrajine, ali tak je sako leto okoli prvoga novembra, ali ovo leto so te šteri nam to se ili pak sako posebno prodavlejo zašili olovke čuda, čuda vejč nek smo se nadjali. Dok smo si, žena i ja, malo globleše preračunali bodemo morali dati celo jeno plačo ak očemo obiti so rodbino na grobjo i sako bar jeno svečo, očem reči, lampaša vužgati. To je zbog radi toga kaj so lampaši i cvetje dragi, a i se vejč rodbine imamo na onomo drugomo sveto, pre dragomo Božeko. Kak veli teca Franca: cvetje je podražilo, sveče so podražile (a od sramote nebreš na sakomo grobo de imaš rodbino sam jeno vužgati) pak po tem kak smo okinčili grobe i naši pokojni čuda vejč vredijo. Ak smo i ne Bog zna kaj marili za jiv dok so se špancerali po ovomo našemo cveto ve jim furt kinčimo grobe sam kaj tam ostanejo de so je i kaj jim bode tam dobro! Čudni smo malo, da malo, mi ljudi, dok smo se z rodbinom parili (ili pak z pajdašijom) navek smo cendrali i škrtarili, a ve dok nas čakajo po grobjima ve se gavalerimo. No, kuliko vidim i drugi tak delajo. Božek dragi, kaj je tua korona z nas naprajla, več se niti mi nebremo prepoznati.
Krčma je cirkvena hiža, posluživle se vino, furt so nam na jezikima Jezuš, Božek, otec i majčika. Nešterne mušterije se na šanko spovedajo, a jega i dnevov da morete videti kajkakša ukazanja!
Cene se utrkivlejo štera bode više skočila
Ne bodete veruvali, ali jega na ovomo sveto i nečesa v kaj se teca Franca ne razme. Najme kaj, došla me je spituvat kaj je to za ščeje tua inflacija? Lepo sam joj pojasnil da je to tak da v žep furt dobavlaš i mečeš isti kupček penez, a za te peneze moreš se meje i meje toga kupiti jerbo cene saki den ido gori. A bormeš je tak, kam god dojdeš saki den je se dražeše: dojdeš v špeceraj se dražeše, dojdek k peko em so vekše cene, em so kruheki, klipiči i žemlice menše. To je dok ti nekam ideš, a dok si doma saki den, no ne ruon saki den jerbo poštari hodajo dvapot na tjeden, dohajajo se vekši i vekši čeke.
Na priliko, ve dok so počeli jesenski dežđi i dok ne znamo kam z vodom ve nam ovi v Međimorskaj vodaj zdignejo cene i pošiljajo vekše čeke. Nebrem to razmeti, jim Božek pošilja vodo zabadav, a oni nam zaračunavlejo i dražeše prodavlejo.
Plinači so „čuda pošteneši“ oni nam, sako malo, pošiljao nekše ugovore štere morete potpisati, ali ne morate jerbo sikak vam dojdo novi čeki šteri so jeno sedemdeset ili pak osemdeset procentlinov vekši nek stari. Kak da bi ves plin dohajal z Ukrajine ili pak Rusije. Ali plinači so ne tu postali, oni so nam poslali i nove ugovore v šterima imate pravo tuliko platiti kuliko vam oni zaračunajo, a počim bode to to niti dragi Božek ne zna. Ve vidite, potpišete (ili ne potpišete) ugovora i ne znate kuliko vas košta kubik plina šteroga plačate v kilovatima. Najbrž je to jedni plin šteri se prodavle v kilovatima kak i struja. A zakaj to? Pak to je zmišleno kaj ne bodete mogli nikak skontrolerati toga plinskoga obračuna i nigdar ne znate na čemo ste, ali ako ne platite umda bodete vidli svojega virgeša. Kam god se čovek obrne navek ga inflacija fčehne po žepo.
Morem vam reči da se je ifglacija (čitaj: nove višeše cene) zarivala i v apoteke tak da nam ve i zdraviče čuda vejč vredi, očem reči, brez kupčega penez vu žepo teško je dojti do jega. Zato posluhnite naše stareše šteri so spametni kak vrag: – Što ne pije po krčmama te pije po apotekama… Ili pak ono starešo: – Našim starima je ne trrelo leka, klet (pelnička) jim je bila apoteka!
