309[layerslider id=”6″]
Nebrem veruvati, ali tak je! Ogjogascov ga ne niti za lek ili se za jiv nikaj ne čuje, a niti nikaj ne piše? Nebrem veruvati da je ve važneše što je novozebrani precednik opčinskoga veča od toga što je precednik ogjogascov ili pak što je glavni ogjogasec v seli? Pak je, prosim vas lejpo, jako važno znati što je glavni ogjogasec v seli, koga tre zvati ak se škedej ili pak slama vužge, što bode šprico držal v roki, a što pak bode zobe ogjo kazal z mlaznicom v roki. Dok se nekaj v seli vužge, dok se nekaj pohabi unda so nam ogjogasci dobri, a dok jiv tre pofaliti unda ga v novinaj ne placa polek političarov. Ve je važneše što bode sedel v šteri opčinski fotelji, što je koga grdo pogledal, što je za koga zdigel roko ili pak što se komo zameril? Se se je to zmešalo i nega nikšega reda. Negda se je se znalo v seli dok je teca Franca bila glavna, a ve dok so počeli hercuvati Guglini i Fejsbuki ve se nikaj ne zna i nega nikšega reda. Još bodemo si mi skupa prosili teco Franco kaj nazaj dojde na svetlo dneva (ili pak vampalice) čehara kaj se bodo tam žene mogle pospominati o semo onak kak to dragi Božek zapoveda. Nebre biti reda prinas dok so ogjogasci zaj za politikom i političaraj. Nekši se red mora znati, kaj velite?
Nejso seposot politike jednake. Negdi esdepeovci nesmejo dati svoje glase hadezeovcima, a nedgi drugdi je čistam nekak drugač. Ak malo bole poglednete kak so se zbirali precedniki opčinskih veča nejvečpot je bilo tak da so hadezeovci bili protiv onoga kaj so predložili esdepeovci ili pak obratno. Jedino je ne tak bilo v Poturno, tam so hadezeovci zebrali esdepovca za precednika. Kak zgledi hadezeovci so dosti dugo hercuvali v Poturno, pak jim se je zamerilo tak da so ve malo pustili esdepeovce nek vidijo kak je to biti prvi v seli. Ak sam dobro v pamet zel nejdugovečneši večnik v Poturno je Vladek Križajičov i večniki so ga prepoznali tak da je ve dorival tijam do potprecednika veča. Znova je počel iti prema gori. Hadezeovci i esdepeovci se več dugo lepo gledijo v Kotoribi i tam je to ne nikaj novoga. Nejbole je biti liberal v Središčo na Muri, oni imajo jenoga večnika v Grackomo večo i te je precednik. Kak zgledi serjanski liberali so se dobro kcoj držali dok so se opčinski stolci (čitaj: fotelje) delili.
Kak znamo dugoletni Turenski načelnik Jožek (moj imejak) Lepen je pušku hitil v kuruzo i odišel v političko penzijo. Neje odišel v mirovino nek v penzijo kaj znači da dela i dale sam je ne glavni čovek v seli, očem reči, opčinski načelnik. Mesto jega so Turenčani zebrali, a pomogli so jim i građani grada Matekovca, nejmlajšega načelnika na ovomo našemo „Falačko zemle med dvemi vodami“. Jako sam najgerek kak bode to zišlo dok cugle vlasti drži v svojimi mladimi rokami jeden inženjer i to još ledičen. No, ak je Perica Hajdarovičov, novozebreni načelnik, rekel da on to more unda to brzčas bode tak. Ali teca Franca je rekla: bode dečec videl da je čuda leži dojti gori nek gori ostati!
Još se je ne zafremala naša Županiska skupština, još se ne zna što bo gori, a što doli, očem reči, ne znati što bode na vlasti, a što pak v opoziciji? Naš župan, Matek Posavcov, si još navek prebira koga bi zel k sebi, a koga bi stavil. Kuliko sam mel za čuti, jeni se nudijo po noči, a po dnevo se preštimano držijo, a drugi pak se šmajhajo po cele dneve, a po noči mirno spijo, ali z otprtim očima. Nigdar je ne lefko bilo političarima, a denes je to nejmeje. Zakaj? Pak kuliko vidimo jedne koalicije vredijo v Lepoj našoj, druge pre našaj sosedaj Varaždincaj i Zagorcaj, a čistam tretje prinas.
Velijo da je politika isto kaj i kurveraj, očem reči, venodjanje. Ak ste i vi to čuli najte veruvati jerbo se vu venodjanjo zna što je gori, a što doli, ruon tak se zna što ga meče i komo je nutri, a v politiki je to saki čas drugač. I dok si nejbole siguren da si ga del nutri unda zide na to da si fulal, očem reči, da si porinul v krivo luknjo. A de se čovek nek navči kak, da i komo (i kaj) tre porinuti da so se političke škole zaprte. Zmislim se kak denes, negda so postojale stalne političke škole, a i one večernje, a te večernje so bile nejjakše jerbo se tam ne znalo što je koga, da i kulikopot. Ali viziperti so se delili, a i si so dobili, žene vejčpot, a moški da so na red došli. Ali so dobili!
Kuliko sam mel za čuti več ga ne bode koaliciji, ve bodo stranjke surađivale jedne z drugaj. To vam je ruon tak kak i denešji mladi, ne ženijo se, a živijo skupa, venodjajo se, a deco ne delajo Zemejo si ono kaj jim paše, a dok se tre za nekaj brigati unda si hrpte obrnejo. Pak bomo tam de smo i do ve bili.
Kam ide tua naša politika? Liberali ga več ne, „Seljaki“ idejo krajo, Narodnjaki se resteplejo, Partijci saki den se meje vredijo, Hadezeovci se još nekak držijo, ali nebrejo brez štaki i jako teško da bode Drašek sam ostal z glavom ober vode. Orehi, hrasti, laburisti i reformisti verjejo da još postojijo (prosim lejpo onoga što jif negdi vidi nek jif vrne nazaj v politiko), ali jif je niti z rešpeterom ne muoči najti. Pak, ljudi moji, kaj se bode sam Most i Živi zid bavil z politikom. Ak se mi jim v roke damo niti dragi Božek ne zna de bodemo završili?
Si znamo da je dofčerašji svetomartinski načelnik Franjo Makovec odišel v zasluženo političko penzijo. No, neje ga poslalo biračko telo nek se je on zavolil držati cugle opčinske vlasti vu svojimi rokami štere so denes dvajstištiri leti stareše nek so bile onoga dneva dok jif je prvipot prijel v roke. A da ne bi to sam tak minulo jegovi zemljaki so ga, za nagrado, poslali v Rim i to skupa z ženom. Znali so da je čuda delal i da je ne ftegnul skočiti v Rim, a to si je več zdavnja želel, još kak dečec, tak da so mo ve spunili željo kaj bode črez Rim odišel v penzijo. Dok pap Feri zazvedi što mo dohaja v poseto brzčas bo si zel malo cajta za jega, kaj se malo žnjim pospomina i kaj mo Franjo dopove kak se živi vu Svetomo Martino!
Ruon sam se spravljal pitati kuliko je dečjih igrališči napravleno od penez štere je gradonačelnik Štef prešparal v gracki kasi kak sabornik i štere je obečal dok je bil zebrani, a unda je prek noči zraslo novo igrališče na čakoskomo jugo. Nesam, uspel zazvediti je li je napravljeno z teh penez, ali je igrališče tu! A teca Franca mi je rekla: Jožek, nej konjo šteroga smo dobili brojiti zobe. I kaj ve morem?
Naš labodoritaš šteri je zgubil na Islando skupa z svojimi pajdaši, Luka Modrič, je skočil na sod v Osjek kaj soco Darkeco Krušlinu pove kak je on posloval s Zdravkecom Mamičom dok je igral v Maksimiro i dok ga je Zdravkec prodaval. Luka je se pošteno rekel kak je to bilo, no, mortik ne se, ali ono kaj se je zmislil je i povedal. Najbrž je se rekel onak kak je bilo sam ne znati zakaj je mam z soda odišel na spoved v nejbližešo cirkvo?
Drašek Plenkovič Plenki, precednik naše Vlade štera je na predelavanjo i precednik Hadezeja se prepravla, kak sam zazvedil pre čakoski gracki vuri, za jesenske izbore v stranki. Vidite ve na kaj je to došlo dok se čovek navči na dvoje izvore na leto. No, to je još ne se. Najme kaj, ima Drašek tri listeke svojih suradnikov. Na jenoj so oni šteri zutra več to nado, na drugoj so oni šteri so dobili još jeno šanso, ali to još niti ne znajo, a na tretjoj (ili prvoj) šteri bodo igrali v prvoj postavi posle izborov. Naš vodeči hadezeovec, Darko Horvatov Dobravski je na listeko za odstrel, a morem vam reči da sam našo Sunčico ne videl niti na jenomo listeko. Brzčas bode kak i navek, nešterni bodo prešli prek šalabahterov, a nešterni v sučevoj nadoknadi, očem reči, z kviskijom šteroga bode nešči drugi zdigel. Ne znati je li bodemo unda meli koga od hadezeja v Zagrebo? Plenki bi moral to meti na pameti, pak on zna da so naša međimorska vina nejbolša na sveto i ako ne bode nikoga zel v Zagreb komo bode hodal na pijačo. A Plenkoviči znajo kaj znači dobro vino piti. Bar so do ve znali!
