309[layerslider id=”6″]
Kuliko vidimo, čitamo i čujemo Vladek Šeksov je kak maček, ima sedem političkih životov. Nejmeje. Još navek vedri i oblači, očem reči, da brez jega niti trava ne raste vu ovoj Lepoj Našoj. Jempot je Vladek, drugoč je „Sova“, a tretjipot je „Kolega“ i štero god ime ili pak cono nuca navek se se mota okoli jega. Jemo kak da nišči nikaj nebre, a nikaj se nebre pripetiti vu ovoj Lepoj Našoj, a kaj on nej tu mel svoje prste. I ne sam prste. Jegovi protivniki furt med sobom šepetujijo i stiha se veselijo kak Vladekovo vreme ide krajo jerbo je saki den se stareši i stareši, ali ne bi ruon vu tem bil tak siguren jerbo je Vladek trda korenika, kak napriliko Joža Manoličov, šteri je čuda stareši od Vladeka pak je još navek ne v politički penziji jerbo je još navek kak vegeta, vu se se meša. Najte me krivo razmeti, ali se mi vleče na to da je Vladek završil isto takšo političko školo kak i Joža.
Advent je minul, ali ne seposud jerbo v belom Zagreb grado još navek traje. Ali Zagreb je več drugo leto zaredom nejlepša varoš v celoj Evropi z nejveč sakefele fešti štere sakomo davlejo nekaj kaj ga nega nigdi drugdi vu to vremem godišta. Evropljani šteri so mo pak dali ocjeno pet plus so rekli da je to zadjipot i ak oče još da biti nejbolši, nejlepši i nejveseleši mora preseliti sklizalište na Jelačič plac, a ne kaj ga skrivle na Trgo Kralja Tomislava. Ak zagrebečki gracki načelnik, Milči Bandič, oče nekaj vejč o tomo znati nek si v Čakovec dojde po receptlina.
Advent je minul, došel je Božič. Ovo leto, očem reči, ovo zimo okoli Božiča i božičnih svetkov čuda sam čestitki dobil ovak: „Se nejbolše“, „Srečne praznike ti želim!“, pak nebre kaj nej zgombal kak so Božič i božični svetki ne prazniki, nek blagdani. I još nekaj, kak da je našim ljudima teško čestitati srečnoga Božiča, pak unda zmišluvlemo praznike. Prazniki so za školsko deco dok ne morajo v školo hoditi. Štel sam još sam pitati kaj je to z nami kaj ga za of Božič ne bilo petardi. Jako sam najgerek od čega bodo preživeli ovi kaj prodavlejo petarde ak jif mi ne bodemo hitali niti za Novo leto? Ak ne bodemo pokali?
Pravzaprav sam ne znal kam bi se obrnul i komo bi pisal kaj bi mi nekaj donesel za Božič. Nudil mi se Sveti Mikula, Mali Isusek, Ded Božičnjak, Baba Božičnjak i Ded Mraz. Tuliko ga bilo teh donatorov kaj sam, na se zadje, svoje pismo nikam ne poslal, pak sam unda i dobil friško figo. Ak se sam ne pobrigaš unda odideš po riti k meši. Moram vam priznati da sam se motal po čakoskoj glavnoj vulici, po čakoskomo Advento, dok je došel Ded Mraz pak sam unda dobil kuhano vino. Tak sam si mislil, ali dok sam odhajal me je Baba Mraz prijela za rokav i pošpotala kak se ono kaj sam spil mora i platiti. Sa sreča kaj mi je žena ne čistam spraznila žepe tak da sam se ne osramotil do kraja.
Te sindikalci kaj nosijo darove za ove svetke so mi ne dali mira pak sam prelistal, preiskal i prečital dosti knigi kaj bi našel što to i zakaj ruon te nosijo dare deci, a i nam malo ili pak malo vejč, starešima. Bilo vam je to tak: mel je japa dva sine i kak je to navek v sakoj priči jeden je bil dober i se je posluhnul japo (za mamo je ne nikaj pisalo), a drugi je bil lebodikaj (čitaj: ništ koristi) i tak je of drugi, hujši, zel svojega herba i odišel je v svet i se je zahuzal. Dok je došel nazaj bilo ga je sram iti japo prosit nek ga zeme nazaj za težaka, pak je odišel v Partijo. Ovoga prvoga, dobroga, si mi poznamo kak Svetoga Mikulu, a of drugi, lebodikaj, je ve Deda Mraz.
Vlada je čistam malo zdigla minimalca, velijo sindikalci da se je za to ne splatilo hlapariti plače jerbo se je minimalac povečal za nekaj vejč od sto kuni, a meje od dvjesto, tak da ve si težaki šteri so na minimalco v žep dobavlajo 2.750 kuni. Kak je rekel naš sindikalac, Mladen Zemličov, to je dosti sam za kruh i mleko črez mesec, a on se nadjal da bode ga Plenki zdigel na 3.200 kuni kaj bi unda bilo dosti i za cigaretline. Zakaj cigaretline? Pak oni kaj so na minimalco so nervozni, pak si moraju z nekim zmiriti živce. Brzčas ne razmem zakaj je Plenki to ne napravil jerbo minister Marič od sake škatule cigaretlinov dobavla pol penez v državno kaso. No, vidite, da je poslušal sindikalce Plenki bi bil frajer, a još bi mo se državna kasa punila čuda bole nek je planeral.
Čestitke čakoskoga gradonačelnika so ovo leto nosile nejlepše želje na štiri nejglavneše jezike vu ovomo delo sveta, a si znamo šteri so to: engleski, nemački, taljanski i francoski. Nekaj sam si gruntal da so čakoski gracki oci mogli dopisati dobre želje i na bugarskom, mađarskom i hebrejskom tak kaj bi saki grad prijatel Čakovca mogel svojo čestitko prečitati na svojemo jeziko!
Županiski političari pak vejč vredijo. Najme kaj, županijski večniki bodo drugo leto dobavlali 900 kuni za sako županisko sesijo, mesto 420 kuni kuliko so kaserali ovo leto. Kak so večniki vredneši tak je i precednik Županiske skupščine, gospon Mladen Novak, isto jempot vredneši nek je bil, očem reči, mesto ovoletošjih 1.500 kuni drugo leto bode dobavlal tri jezere kuni. Kuliko sam mel za čuti pre čakoski gracki vuri, gospon Novak ne nuca te peneze jerbo mo fabrika dobro posluje, tak da jif bode dal v Karitas ili pak v Katružo. Moram ga pofaliti, malo je ljudi šteri svoje peneze drugima davlejo, a to so za bokce ne ruon mali penezi. No, malo bi ipak počakal jerbo sam parpot odišel po riti k meši dok so mi ovi pre gracki vur, šteri se znajo kaj se je pripetilo, a negda i vejč od toga, nekaj pošepetnoli na vuho.
Kuliko sam mel za čuti Živi zid je za ukidanje tv pretplate. Tu jif i ja podržavlem. Dosta mi je plačanje državne televizije štero niti ne nucam. Živio Živi zid! Živio Ivan Vilibor Sinčič, belički zet, i jegova gazdarica Vladimira Palfi. Dok Živi zid zeme državne cugle vlasti vu svoje roke sima nam bode bole i nemo plačali televiziske namete. Da bodo oni, i kak, došli na vlast (to te ja pitam) ve da so se zamerili državnoj televiziji? A si znamo da na izboraj pobedi on šteroga si zberejo dečki i puce z televizije!
Več hajdi dugo hodam i lojsam po ovomo našemo „Falačko zemle med dvemi vodami“, a nekaj meje cajta ne hodam sam (lojsam i dale sam) nek mi se za roko drži žena. Imamo i deco i to skupa. Več so nam i deca velika, pak oni imajo svojo deco, a mi imamo vnuke. Ovo leto so deca slavila rođendane i to skupa jerbo so jim te dnevi čistam malo širom. Znate kak je to, mame nigdar ne šparajo na deci, ali zato mi navek na stol dobimo meje nek mislimo da bi mogli ponucati, a deci navek ostaja. Tak je bilo i na ovomo rođendano, pojelo se je skorom se kaj je na stolo bilo ponuđeno, a za posle nam je ostal sam švecki stol. Kak so šveđani ne došli unda smo se mi muočili z tem jivim stolom se do jutra. Negdi bliže jutri, baš dok so kokoti prvipot zakukurikali dal sam bandistima kaj odigrajo i mojo čestitko. Rekel sam deci predi nek je pesma počela: Ve več imate dosti let, do ve sam vam to skrival, a ve vam to moram vum dati kaj se ne bodete nečemo nadjali. I unda so bandisti hapili: Deca, moja deca, nikaj na te mela, mama vam je kriva, se vam je zapila…, se je resprodila…! Nejso deca kriva, ali roditele si nebrejo zbirati. Moram vam povedati kak je to bilo dok sam zbiral jivo mamo. Dok sam jo k hiži dopelal nadjal sam se da mi bode kuhala kak mama, a ona pije kak japa.
Kaj nek vam zaželim za ovo novo leto štero več pomalem rajnka na ovo našo potno leso. Plenki nam obečuvle da bode bole (to je i lani rekel), pak bode nekše nezerenske reforme delal, a mi sam očemo mirno živeti i kaj si ne bodemo morali posojavati, očem reči, kaj nam bode ono kaj dobimo dosti od prvoga do zadjega. Nek nam Božek da kaj bodemo i kleto fal kupuvali (makar i v Konzumo), zdravja, veselja i mira v hiži meli, kaj bodemo živeli pobožno i sveto, srečno vam bilo novo leto.
