309[layerslider id=”6″]
Ruski spisatelj Fjodor Dostojevski je napisal svojo knjigo Idiot, a nigdar je ne bil v Lepoj našoj kaj znači da i negdi drugdi ga jega hajdi sega takšega kak i prinas, a mi Međimorci i naši sosedi Hrvati mislimo da smo sam mi takši, očem reči, tak spametni i takše sreče na ovomo sveto. Kuliko vidimo jega i drugdi tak spametnih ak ne i spametneših. Bar jif je bilo, a mortik so se več ve zdošli?
Mile Pupovac, srbin, doživotno na privremenom poslo v Lepoj našoj, se postavlja na zadje noge kaj bode čim vekši kak bi mogel zeti doli spomen pločo HOS-o v Jasenovco štera je postavljena branitelima kaj so dali svoje živote za Lejpo našo, a nikaj ga ne muoči spomenik četniko Mili Babičo v Krnjako polek Karlovca šteri je, kak piše, poginul od ustaške roke. Isto tak nišči nikaj ne pita i nikaj se ne buni, pak niti Pupovac, protiv spomenika velikom četniko Vukašino Šoškočanino v Borovo Seli šteri je sfondal naše policaje 1991.leta. I nišči se ne buni kaj na spomeniko piše da je spomenik postavljen na srpski zemli. Se je vredo čim ne piše „Za dom spremni“. Pupovco se smeta kaj je hrvacko, se je to ustaško, jedino mo ne smetajo naše „ustaške“ kune štere hajdi potroši na leto.
Ak bode Mile Pupovac određuval de bodemo i komo postajli spomen ploče, de bodemo i komo postajli spomenika v Lepoj našoj unda bodemo mi zebrali Zlatkija Hasanbegoviča kaj bodo jega morali pitati ak Srbi očejo komo postajti spomenika ili pak spomen pločo! To bi bilo po pravici kaj ne bode zišlo kaj Srbi imajo v Lepoj našoj vejč spomeniki nek mi Hrvati šteri smo branili svojo zemlo od srpske i četničke agresije. Nekšega reda treba i tu naprajti. Dok mi očemo nekšega spomenika ili pak spomen pločo postajti unda bi morali Pupovca pitati, a jegovi zemljaki sam postavijo i špinčijo se z onima šteri so gazili našo zemljo i streljali naše ljude.
Mile se buni protiv naši spomen ploči, a nikaj ne čuje dok ga pitamo nek pove de so još i dendenes posejane mine v Lepoj našoj, a kaj mi domaći još to niti ne znamo. I ne sam to, kuliko ga još naši braniteli za štere se još ne zna, i to dvajstipet let posle, de so završili jerbo se još navek vodijo kak nestali. Mile zna de so, kam so jif jegovi zemljaki natirali ili pak de so jif sfondali, ali se to nebre nikak zazvediti. Još smo ne se našli, a oni još navek sejajo mejo Virovitica-Karlovac- Karlobag!
Sa je sreča kaj je Severna Koreja sprobala svojo hidrogensko bombo, pak je spomen ploča poginolim branitelima v Jasenovco z pozdravom za dom spremni jen čas pala v drugi plan.
Velijo oni kaj se borijo za spolno jednakost da oni moški šteri v sebi imajo nekaj ženskoga i nosijo kikljice morejo, brez se brige iti v ženske hiže, očem reči, hiže za žene. Ak je tak unda morejo iti i v ženske šekrete, ženske rešte. Kaj reči, kaj naprajti? Kak tu biti spameten? Kak prepoznati te ženske gene i ženske osječaje? Da je Dostojevski živ znova bi napisal Idiota!
Čuda praha je zdigel čovek šteri je polek Tomislavgrada streljal na Zdravkija Mamiča. Ne znati je li je ciljal v glavo ili pak nekam drugam, ali pogodil ga je v nogo. Dok sam to čul nejpredi mi je na pamet opal Mišo Kovač. On se je negda štel sfondati i preslonil si je pištola na glavo, a pogodil se je v nogo. Kuliko smo zazvedili na vreme mo je roka zadrhtala. Neje dugo trelo kaj so prijeli toga čoveka šteri je roko (i pištolja) zdigel na Zdravkeca, očem reči, Mamič ga je sam prijel i prodal ga je v Mančester za dvajsti milijoni euri. Sako zlo za nekše dobro!
Mladen Grdovič je znova pokazal kaj je to za čoveka i kakši je on pravzaprav je. On je čistam vredo sam ima jeno malo vekšo falingo, a to je kaj rad pije. A što od nas Međimorcov ne pije? Dok mi Međimorci pijemo spametno, Mladen spije vejč nek jegovo telo more podnesti. Kak bilo da bilo, Mladen je lejpo rekel da bi rajši skupljal flaše (i to prazne) po smetju nek kaj bi popeval v Srbiji. Mam so mo vic maheri otpovedali na Fejsbuko: sam daj prodal svoje prazne mogel bi si kupiti novoga auta!
Titijov trg v Zagrebo je odišel v ropotarnico povjesti, očem reči, odišel je Tito z trga. Zlatko Hasanbegovič i Bruna Esih so to obečali svojemo biračkomo telo i to so naprajli. Škoda kaj se je to ne pripetilo 23. augustuša na Evropski den sječanja na žrtve totalitarnih i autoritarnih režima, ali se je pripetilo par dni posle. Nekaj si gruntam kaj bode z našaj međimorskaj vulicaj, kak z onaj štere još navek ima Maršal tak i z onima štere so od Jožija Broza. Treba Maršalo i Jožijo dati ono kaj so si zaslužili kak so to ovi v Zagrebo naprajli!
Što zna kaj se se kuha vu ovomo našemo političkomo lonco? Nejvečpot se niti ne zna što kaj meče v lonec, što kuri i na ogej meče, a što pak meša kaj se se ono kaj je nutri ne osmodi. Ne znati kaj si naš župan Matek Posavcov grunta v svojoj glavi i kaj je itak senjal, očem reči, kaj mo se je zamerilo v Haeneso kaj kani oditi vum. Mortik je došlo na svetlo dneva da je HNS- hrvacka nepotrebna stranka i to ga je tak potrefilo kaj je odlučil napustiti broda šteri pušča na se strane. Več niti sam ne znam kuliko ga te stranki HNS? Kuliko je ljudi odišlo, a kuliko jif je ostalo? Nešterni (Čačičovi) so priznali da so odišli, a Vrdoljakovi i Pusičkini so sam stiha i saki si misli kaj oče. Kaj ne bodem Štromarove spominjal jerbo so oni ve na vlasti i jima je čistam dobro. Nekaj si je naš župan pregruntal i samo on zna kaj i kam plava jegov politički brod, očem reči, kam bi on štel kaj bi plaval. Pital sam jegovo fajno gospođo Petro je li kaj govori v noči dok spi, ali je rekla da ne, brzčas se stiha som sobom spomina. Kaj reči, bode se zazvedilo ak bode kanil kam oditi. Neje štel biti minister dok se je Vlada preslagala, ali bode si moral najti nekše mesto pod ovim našim političkim suncom. Ili se mortik ravna v Brisel? To sam dragi Božek zna? A mortik je to niti jemo ne dopuščeno? Božek nejvečpot se zna, ali more zdržati pak nikomo ne pove!
Otkak je Milan Kujundžič postal minister za zdraviče nas Međimorcov i naših prvih sosedov Hrvatov, a Robi Grubičov ravnatel bolnice čuda sega se je naprajlo v naši bolnici, a još se hajdi toga bode naprajlo. Lišpajo se zgrade, dobavlja se nova vredneša oprema, očem reči, minister Kujundžič nekak jako štima nas Međimorce i neje škrti, očem reči, ne obečuvle preveč nek se ono kaj veli to i napravi ili pak za to pošle peneze. Se je to lepo i dobro, sam bi štel kaj bi se mi si skupa z ministrom pobrigali i za doktore jerbo se ovo kaj bodemo naprajli ne bode nikaj značilo za zdraviče nas Međimorcov ak ne bodemo meli i doktore. Znate kak je to, kaj značijo lepe hiže, nove postele, nove mašine, klime, leki ak ne bode z tem mel što delati i ak ga ne bode pravih doktorov. Nekaj moramo stvoriti kaj ne bodo doktori odhajali. Znate kak je to, navek odhajajo oni šteri nejveč vredijo. Ili kaj bode nam značilo kaj bodemo se meli, a na red za doktora bodemo čakali pet-šest meseci? Nešči bode tak dugo zdržal, a nešterni bodo se predi preselili v Miholjane. Se ovo kaj se dela v bolnici je zbog radi toga kaj bodemo mi zdraveši i kaj bodemo duže živeli jerbo sam dok je čovek zdrav unda mo je važno kakša je fasada na bolnici, a dok je betežen unda ima sam jeno željo, kaj ozdravi i to čim predi!
Pred nami so berbe grozdja. Ovo je več tretja ovo leto, dvapot je toča svoje pobrala, a ve bodo vinogradari došli na svoje. Škvorci so ne nikaj pozobali jerbo so pravi gazdi za Rokovo postajli klopoce. Kuliko sam mel za videti, a i čuti, toča je pobrala nekaj malo (kak de?), dosti je ostalo tak da bodo lagvi pak puni i meli se bodemo z čem krepiti črez celo leto. Znate kak pravi gazdi goric velijo: nabere se tuliko kuliko je Božek dal, a napreša se tuliko kuliko gazda lagvi ima. Tak delajo pravi gazdi. A teca Franca je rekla, navek je tak bilo, pak niti vezda ne bode nikak drugač! Da teca Franca navek ima praf to vam, najbrž, ne moram govoriti.
Nebrem veruvati do čega so došli te svecki znanstveniki? Najme kaj, zazvedili so kak jedino alkoholna pijača ima v sebi sih 13 mineralov brez šterih čovek nebre živeti. Dok sam to zazvedil mam mi se rezbistrilo i ve znam zakaj moja pajdašija (skupa z menom) tak dobro i tak zdravo zgledi. Ali nekaj drugo me gvinta, de zmorejo te minerale oni šteri se vugiblejo pijače i nigdar so ne pili kak napriliko moja teca Franca. Negdi jif ipak zmorejo i živijo jerbo moja teca je več prešla 90 i šprinta prema stotki i to tak flatno kaj jo niti nebrem dostiguvati!
