309[layerslider id=”6″]
Što dela ne boji se kaj bi bil lačen, tak so nas to vučili naši stareši, ali što preveč dela more se poškodovati i ruon to se pripetilo zagrebečkomo gradonačelniko Milano Bandičo. Si znamo da on dela šezdeset minot na vuro, dvajstištiri vure na den i tristošezdesetpet dni na leto i još mo je leto prekratko kaj bi se napravil kaj je splaneral. A stopram ovo izborno leto da oče zagrebečkim purgerima pokazati da je on jedini čovek šteri je zaslužil još jenoga mandata. Dok čovek preveč dela unda more i nastradati v deri. Tak se je pripetilo i Bandičo kaj je bil prefleten i zdigel je 8o- liternoga lonca z prvomajskim bažulom pak mo je počil fuk-feder, očem reči, bruh mo je skočil vum i to na nogi. Ve vidite, si šteri so došli v maksimirsko šumo so uživali v bažolo jedino je gospon Bandič nastradal. Ali to je ne Bandiča otiralo z fešte, podvezal si je bruha i dale je punil porcije z bažolom jerbo zagrebečki težaki nesmejo ostati niti lačni, a niti ženi. Kaj bodem vam rekel, još se je bruh niti ne celi vum dorival več je gospon Bandič dogovoril operacijo i to ne predi dok ne podeli sega bažola i dok se i zadji zagrebečki klošar ne naje. Kak je rekel: zagrebečka politika je takša kaj gradonačelnik mora nejpredi služiti svojim građanima, a unda misliti na svoja zdraviče. No, to je još ne se, gospon Bandič je navečer več bil tak zmočeni kaj je mam zaspal čim so ga deli na operacijski stol tak da so mo niti narkozo ne morali dati. Kaj bodo trošili nekaj kaj ne tre, tak da je tua operacija bila čistam fal, pak ve on niti stoprocentno ne zna jeli je bil opereran ili so mo staroga bruha nazaj nutri porinuli. Kuliko sem uspel zazvediti Bandiča je opereral profesor Baltazar jerbo sam on more to operacijo tak zbaviti kaj je betežnik več drugi den mogel iti na posel. Ali drugi den je išel odvečer delat, dopolne je još ne k sebi došel makar so mo dali eliksir života, kola-loka limonado pojačano z kanabisom, očem reči, konopljom štero je kupil v Evropi jerbo je naše apoteke nemajo, kak bi se se ono kaj se je po dnevo pohabilo prek noči i poprajlo. Takšega vam i ja imam mehaničara kaj mi v nočnoj šihti auta popravla, a ve si nekaj gruntam da si bodem premenil doktora i zapisal se bodem k ovomo Bandičovomo jerbo jedino tak bodem mogel saki den biti čistam zdrav i ne bodem moral hodati na sod de me soci čakajo. Pak sod, ruon tak, mora biti na uslugi čoveka i zvati se grešnike dok oni imajo čas. Pak što pravzaprav jif plača? Nekaj si gruntam da bi gospon Bandič sikak trebal dobiti državno nagrado za režijo svojega betega ovo leto jerbo ovi Frljiči i jemo slični nemajo pojma kak se dajo sklepati prave drame. Ipak je živleje navek napre pred kazalištom. I Jakov Sedlar nam je sklepal kaj kakše filme, ali se je složil z menom da je ipak gospon Bandič čuda bolši od jega. A to sam čovek more ak dela dvajstištiri vure, jedino unda mo to se ftegne pasti na pamet. Bandič je predizborno kampanjo napravil onak kak je splaneral i ve more ovak zdrav čakati na svoj novi mandat. Kak je i sam rekel, jeno vreme mo je v noči curel mrak (Taritaš) na oči, ali ga je to več zdavnja minulo tak da mo niti Dragec (Prgomet), a niti Bruna (Esih) nikaj nebrejo. Ak ga je niti bruh ne mogel vništiti, očem reči, hititi z nogi unda bode brzčas živel se do svoje smrti.
Božo Petrov nam je več ne problem. Kak se meni vidi, Božo je zbetežal od čistam nekšega drugoga betega nek Bandič, najbrž je to moral biti proljev ili pak drišlja jerbo ga je sam nekaj takšega moralo potirati kaj je tak fletno i brez reči hitil državne puške v državno kuruzo i vrnul se je nazaj v Metkovič, raj zemaljski, de rastejo mandarine i to celo leto. Božo je doktor i ima leka za se betege i zna kaj tre naprajti ak ga ovak naglo nekaj nekam pretisne. Ak Bandič najde leka za se svoje betege, a neje doktor nego coprjak, unda bi bilo čistam normalno da Petrov bode sam sebi doktor, a i sima ovima z Mosta šteri so se k jemo zapisali. Videl je Božo da je vrag zel šalo i da je državna politika kruh z sedem kori i da ak čovek (čitaj: političar) je takšega kruha saki den unda more dojti do zatvora i ostati brez stolice, očem reči, stolca. Da bi preživel i zbegel se betege šteri so mo krjili zdraviče, Božo se je vrnul v svoj kraj, njegov premili zavičaj, a tam je zdraveši zrak, a i košta je zdraveša. A i fotelje se ne nušejo saki den!
Ne znati kaj nas v Lepoj našoj itak čaka? Jeni bi znova išli glase davat i to sam zato kaj zberemo nove sabornike, a oni bodo zebrali novoga precednika, a of bode poiskal nove ministre, a nišči nam ne zna reči je li nam posle bode bole. Drugi prepovedaji da tre naprajti veliko koalicijo kak je to bilo negda pred nekaj vejč od dvajsti let. Ne bodete veruvali, ali ne bi vam znal reči kaj je nejbole za nas. Da smo ve kak negda, unda bi rekli da smo na robo ponora, ali moramo stati koraka naprej. Ali kuliko vidim provalija je ober nas kaj znači da smo več stali koraka naprej i ve smo nutri. A kaj se dotikavle velike koalicije, to vam je kak da vam ja dojdem dimo malo bole alkoholno zmočeni posle cele šihte v alkoholni radionici, unda nemam nikše velike probleme sam me mali močijo. Najme kaj, hižo navek najdem sam ključanico nigdar nebrem! Tak i velika koalicija rešavle velike probleme, a jezere i jezere ovi menših moramo i dale sami. Moremo si zbirati: ili bodemo drukali za veliko koalicijo ili pak se bodemo uzdali use i v svoje kljuse?
Dok jenomo smrkne, očem reči, vgasne v pipi, drugomo svane. Tak je precednik sabornikov, Božo Petrov, odišel po riti k meši, a ponovo je v sedlo splazil i pak jaše Vladek Šeksov. To je čovek šteri ima sto (nejmeje) životov tak da se ga ne bodemo sam tak lefko rešili. Niti mi, a niti naša državna politika. Istina Božek da troši vejč od pet litrov na sto kilometri, ali si i to moramo zamagaditi ak nebremo nikam dojti brez jega.
Kak sam vam i zadjipot rekel, Božo je prek noči spraznil foteljo precednika Sabora, a mam drugi den se je v jo zarival Goran Jandrokovič. Goran je več dugo v politiki i on zna kaj tre naprajti, a to je i dokazal, kaj jegov guzica, očem reči, ritica dojde tam de joj nejbole paše. Zna on od čega muhe crkajo tak da je ve on prvi sabornik, prvi med jednakima. Kak je se to lepo da se čovek spunijo senje. Ali ne so si te sreče!
Naš župan, Matek Posavcov, je dugo obečuval, ali kak zgledi bode se došlo na svoje kaj se dotikavle Staroga Grada. Najme kaj, ipak je uspel natentati celi kupček evropskih penez kaj se naš „starec“ pomladi. Dugo se je na to čakalo, ali penezi so se našli tak da naši građevinski težaki morejo pomalem prepravlati lopate, krampe, žlice, fandline, mortarke, mešalice, plajbe jerbo sam dok izbori minejo mam se bode zapičila prva lopata i mejale se bodo „staračke kosti“. Kuliko sam mel za čuti dok bode delo počelo došel bode i Mikloš Zrinski ili bode poslal svojega obligata kak to si delajo dok tre v Međimorje iti.
Naše i Međimorsko veleučilšte več deset let vuči našo deco, očem reči, naše študente. Se je počelo nekak stiha kaj bi rekli po skrivečki, a denes se, v negdašjoj kasarni, vuči vejč od jezero dece. Kuliko sam mel za čuti, deca se bodo mogla vučiti i ono kaj naši gospodarstveniki nucajo, a to so železni meštri, očem reči, inženjeri, a ruon tak se se prepravla za to kaj bodo i vinari, podrumari, vočari i povrtlari hodali k nam po se ono kaj ne znajo. I za te mlade se je župan pobrigal, pak se bode delal i Študencki dom. Ak mi Međimorci bodemo tak i dale delali, bodemo se meli kaj nucamo tak da se bodo unda i naši sosedi Hrvati štimali kaj so polek nas i kaj so si dobri z nami.
Prvomajski bažolj se je pojel seposod de je bil skuhani. Sa je sreča kaj so naši međimorski kuhari navčeni na velike lonce i velike porcije, pak je nišči ne dobil bruha. Kakši je te bažol bil i kuliko je vredil bode se zazvedilo črez nekaj vejč od tjeden dni. Tam de je bažol bil dober, tam bode se čulo, a tam de so bažolja nabavili prek Agrokora tam se bode sam po duhi poznalo.
Mi Međimorci se furt falimo kak smo si zdobra z Hrvatima, a oni se zbrčkavlejo z nami. Poglednite fabriko Meiso z Gorčana štera se več na leta bori kaj bode ostala na ovomo našemo tržišto i to im ide od roke več cirka deset let i ve je nekšemo jalnošo z Lejpe naše zapela za oko i štel bi zmeniti našo direktorico Snežano Dominič i dopelati nekoga drugoga kaj to se zahuza kaj so naši ljudi na leta stvarjali. Prosil bi naše sosede nek nam ne pomažejo jerbo navek da so nam pomagali se ono kaj smo mi naprajli je odišlo po riti k meši, tak da ga več ne naših velikih poduzeča: GeKaja, MTČ-eja, Metalca, Jelena, Paneksa, Modeksa, Agromeđimorja… i zato je čuda bole da nas pustijo na miro kaj bodemo i dale delali onak kak najbole znamo, jerbo jedino tak bodo ovi težaki z Meisa, a nega jif malo, to je v pitanjo štiristo familiji, mogli i dale hodati na posel i služiti si kruheka kak god trdoga. Pustite nas kaj bodemo delali kak znamo i očemo i sima nam bode bole na ovomo sveto! A i vam!
