309[layerslider id=”6″]
Još navek se obslužavlejo Dnevi Međimorske županije. To svetkuvanje je počelo 18. aprila, a svoje skončaje bode melo 9. majuša. Ve vidite tri tjedne svetkujemo i štimamo se z sem kaj smo naprajli, kaj imamo i kaj znamo (cirka 110 priredbi sakefele), a mi smo nejmenša županija v Lepoj našoj. Da smo malo vekši i da ga nas Međimorcov i Međimorki malo vejč trelo bi nam, nejmeje, dva mesece kaj bi se pokazali kaj znamo i kaj moremo. A da je tak to bil veliki problem jerbo med tem dohajajo i drugi svetki i to bi se rezvleklo tijam do Prcinkulovoga i unda bi počele gracke fešte. Pak da bi unda pravzaprav i delali? Čim se rešimo Dnevov županije mam nam bodo na vrata ranjkali Dnevi vina, a si mi znamo da se teh dnevov ne muoči tak fletno i lefko rešiti jerbo i tu imamo kaj pokazati i z kim se poštimati. Probajte si v pamet zeti kak bi svet, a posebno Lejpa naša bila boga da ga ne nas Međimorcov?
Med sim tim feštama pak smo se zmislili na to kak so naši međimorski štrekari, pred 157.let, pustili v promet prvo štreko od mađarske Kaniže prek međimorske Kotoribe, Doljnjega Kraljevca, Čakovca, Dunjkovca do Pragerskoga pre našaj sosedaj v Deželi. Nek se zna da smo mi Međimorci meli prvo štreko v Lepoj našoj i da se je hrvacki ban, dok je hercuval vu Varaždino, z kočijom vozil na cug v Čakovec. I ne sam to, Čakovec je prvi v Lepoj našoj mel strujo i vulično lektriko, tak da smo i po tem prestigli Zagorce (kaj nebom spominjali Dalmoše), jedino kaj Varaždino nikak nebremo zeti je to kaj se črez njega več 830 let putuvle za Čakovec i Međimorje. Ve vidite kaj je Čakovec se negda mel i kak je dalko došel, a v zadje vreme so nam (mladi) gracki oci preskrbeli to kaj nas je i Prilok prestigel!
Rekli smo več da je v Kotoribi cug mašina fučnula, pred 157 let, a saka svega je dva-tripot kušnula i Kotoripčanci so cug mašini pesmo spopevali. Verjem da ste čuli i za ono drugo pesmo: V Kotoribi sam se rodil, v Čakovec sam v školo hodil, a unda sam se vrnul nazaj, tu sam si napravil svoje gezdo i tu živim z svojom grlicom, a z nami so i naša deca, vnuki… Tak je to negda bila, a tak je i denes jerbo se opčinari brigajo za se šteri živijo v Kotoribi. Ljubo i Roberto skupa s Zokijom furt negdi nafeftajo peneze i napravijo se kaj splanerajo, a negda i vejč od toga, očem reči, se kaj tre. Delajo zabavišta i igrališča za deco (još da bi i deco delali kaj bi Kotoripčanov vejč bilo), naprajli so novo školo i šporcko dvorano, poprajli i zlišpali Kulturnoga centra, pomažejo labodoritašaj, košarkašaj, ogjogascaj, tamburašaj, študentaj, ženaj, branitelaj, lovcaj, velečasnomo, očem reči, nega nikoga za koga se ne brigajo. Ne bodete veruvali i Romi jif posluhnejo i poštuvlejo. Brigajo se i za gospodarstvenike i obrtnike tak da ovi ostajajo i delajo v Kotoribi, a dok so oni tu unda Kotoripčani imajo hodati kam na posel tak da jif nebrete najti na burzi dela, a i za vreme radnoga cajta i krčme so prazne. Jedino se Mađerke bunijo kaj se preveč dugo ravnajo delat mosta prek Mure jerbo sam to fali kaj bi se gosteše parili Međimorci i Mađerke. Zazvedil sam da so si to stajli za glavni posel mam posle dok jif Kotoripčani znova zberejo. Najbrž Kotoripčani znajo kaj morajo naprajti ak očejo kaj jim bodo dnevi ribe i šibe trajali celo leto.
Nekak v zadje vreme se gosteše gledim v Doljnje Međimorje jerbo se tam dale vidi, nega bregov. Tak sam i spazil se kaj je gospon Đurek Horvatov napravil z Doljnjega Kraljevca. Verjem da si znamo za jegovo fabriko Tehnix i da on i jegovi težaki živijo od smetja. Đurek je sima pokazal da se od smetja more jako dobro živeti sam tre znati kak. Najme kaj, si mi saki den delamo se vejč smetja i naš Đurek je to videl i pregruntal si je da to smetje bode moral nešči posprajti kaj se ne bode seposot reshitavalo. I tak je to počelo. Nejpredi mala fabrika, malo težakov, a unda se vejč hali, se vejč težakov, ve jif ima vejč od pecto. Denes delajo po celoj Evropi i celomo sveto. Leži bi bilo nabrojiti zemle v šterima ne delajo nek one v šterima delajo. Lani je naš Đurek bil zebrani za jednoga od nejbolših i nejspametneših gospodarstvenikov na sveto. A morate priznati da je to ne ruon tak malo priznanje. No, ali ga je naš Đurek zaslužil jerbo se ovima vu sveto šteri pratijo gospodarstvenike nebre nikaj podlečiti. Ne sam da Đurek i jegova fabrika dobro delajo nek se on briga i za svojo opčino i svoje težake. Pomogel je svoji opčini (dal je jenoga vekšega pušleka penez) kaj zazidajo zabavište kaj bodo jegovi težaki meli de deco ostavljati dok so na poslo. I to je još ne se, jegovi težaki imajo nejvekše plače v Međimorjo i med vekšima so v Lepoj našoj tak da v prosjeko imajo cirka jezero ojerov, a to je ne za fkrej hititi. Đurek i jegova fabrika Tehnix pobira i pospravlja sake fele smetje i otpada seposot sam v Čakovco i Zagrebo mo preveč ne verjejo, ali on je strpliven i jednoga lepoga dneva bode mo i domače sunce presvetilo. Znate kak so rekli naši stareši: Što je i da bil prorok vu svoji seli? Of mesec je bil v Zagrebo Međunarodni sejem o tomo kak se pobira smetje, kak se prebira, kak se sortera i kak se čim vejč toga smetja more nazaj ponucati., a v tomo je naš Đurek pravi maher. On je na te Sejam dopelal prek dvjesto sakefele stručnjakov šteri so se rekli kaj znajo o otpado i smetjo, a Đurek je pokazal svoje mašine štere čoveko pomažejo kaj more se ono naprajti kaj si zamisli. Teca Franca je lepo rekla, to ti je, preštimani moj Jožek, teorija i praksa na jeni mesti, a takši ljudi šteri to morejo naprajti ga malo na sveto. A vidite, naš Đurek je to napravil i unda se najte nikaj čuditi ak bode i ovo leto nejbolši gospodarstvenik na sveto. Ve ili ga v sveto malo tak spametnih ili je naš Đurek tak jako dober, očem reči, vum spameten. Ne da je dober nek je jako dober, ak ne verjete meni pitajte Donjokraljevčance i jivoga opčinskoga načelnika. I to je još ne se, ak nešči oče delati nek dojde v Kraljevce tam ga dosti posla za se. I ne tre iti prek meje, a muoči se i z peciklinom na posel voziti, a plača je duplo vekša neg v Čakovco.
Lepo je rekel vaš i naš glavni urednik Međimorskih novin, ali je ve ne znati je li ga bodo naši političari posluhnuli. Rekel je: dosta nam je več betona, cigli, cevi, asfalta i sega drugoga, skradja je vura kaj se političari počnejo brigati za ljude. Tre se naprajti kaj naši ljudi ne bodo hodali vum kruha iskati i kaj bodo mogli kredno živeti v Lepoj našoj. Ne bi se štel faliti, ali tak je to lepo napisal kak da je mene pital.
Nebrem veruvati zakaj tre v sim našim gradima i opčinama promjene na vlasti. Razmim da tre tam mejati de je slabo išlo i de so gracki oci ili pak opčinari zahuzali, ali tam de je bilo dobro tam tre stajti one kaj so dobro delali. Razmim da tre v Čakovco spremeniti gracke oce jerbo Čakovec zaostaja, ali ne razmem Priločance zakaj bi oni svoje mejali, a tak jim dobro ide?
Škoda je kaj se je gospon Dražen Blažekov, ravnatel čakoske Tehničke škole, ne kandideral za čakoskoga grackoga načelnika jerbo bi jega najbrž Čakovčanci zebrali v prvomo krugo makar nema črleno parstijsko knigico. Najme kaj, on je lepo pozval se mlade, kak dečke tak i puce, nek se zapišejo v jegovo školo jerbo dok jo završijo bodo mam dobili posla i to posla šteri je jako dobro plačeni i od šteroga bodo mogli dobro živeti, a ne kaj bodo morali plačo rasteguvati ak bodo šteli kaj jim bode trajala celi mesec. I Đurek z Tehnixa je pofalil gospona Blažeko kak dobro i spametno dela, a ak je Đurek to rekel unda je to sigurno tak!
Nikak se pravda i pravica nebrejo ziti. A kaj drugo nek čovek veli dok čuje kak je negdašja ravnatelica Ekonomske škole, Duška Novak, dobila, još lani, presudo da jo morajo vrnuti nazaj na mesto ravnatelice i nikak da se to pripeti. Sam da vas zmislim da je gospo Duško zmenil negdašji „kukuriku“ minister Željkec Jovanovič, pred pet let, i to sam zato kaj je deco zapisala v školo prek reda. Željkeca se kak ministra več nišči ne zmisli, neje trajal niti celi mandat, a jegove grehe još navek rešavlemo. Nebrem to nikak razmeti, pa ak sod nekaj donese unda to tak mora biti, a ne kaj se z sodom špotarijo. Vidite kak sam ja ne plačal strujo i elektrači so mi nejpredi drota precvikali kaj sam ostal v kmici, a posle sam završil na sodo i čim je sodec meni rekel da sam dužen mam so elektrači došli po peneze. Nikaj so me ne fermali kaj sam ne mel, moram sam si posoditi pre sosedi ak sam štel kaj si bodem znova svetil vu hiži i kaj mi se ne bodo piceki pokvarili v škriji. Moral sam dati Božeko jegovo, caro carevo, Elektri jivo, a i soca sam platil makar je ne za mene sodil. Što zna da bode našoj Duški sonce pravice presvetilo i kaj dobi ono kaj je Željkec zahuzal. Ne znati kak so zišli Duškini pajdaši štere je Željkec ruon tak zmenil. Najbrž i oni imajo presude i žnjimi se morejo slikati.
Si znamo da mi Međimorci imamo svojega koja za trko, to je naš „jahač“ Filip Fičo Ude. No, ne znati kaj je to žnjim v zadje vreme? Se je vredo dok jaše našega domačega koja, a dok dojde nekam drugam koji se zritnejo i našega Fičija hitijo z „sedla“. Brzčas bi Fičo moral spremeniti ovoga svojega koja kaj bi se privčil i na druge ili bi tu doma v Nedeliščo moral meti bar dva – tri koje kaj bi na jimi vežbal i unda bi bil privčeni na se. Tre probati!
Ne znati kaj smo se mi zamerili dragomo Božeko kaj nam je i ovo leto, očem reči, ovo prtuletje poslal mraza. Lani je mraz dosti toga poparil, a ono kaj je lani ostalo je letos došlo na red. Ne znati je li mraz dohaja preveč kesno ili pak mi Međimorci nekaj sadimo prefletno. Znuom, ovo kaj raste po drevjo i po goricaj tu nebremo nikaj pomoči, jedino ak bi kurili po noči dok nam Vakula mraza prepravlja, ali brzčas v zemli ne tre preveč fletno rovati. Kalamper, paradajz, paprika, bažolj nam nej bili zmrzli da smo jif ne posadili ili pak posejali!
