[layerslider id=”6″]
Šepetuji se kak nešči na ovomo našemo „falačko zemle med dvemi vodami ima nekaj protiv prvoga esdepovca i slakovčara, Mladena Novaka, šteri je još i precednik Županiske skupštine, kak to teca Franca lejpo veli, drugi čovek po snagi v Međimorjo i to tak kaj se jega posluša i jegova reč nekaj znači. Što bi tu med nami mogel biti takši jalnoš? I još nekaj, je li so te strelice puščene sam protiv jega ili pak se one dotikavlejo i jegove žene Ivanke, štera, tak se bar šepetuji, vedri i oblači v opčini Nedelišče. Ne znati komo bi mogel smetati Mladen kak međimorski župan, čovek je v nejjakšim letima, gospodarstvenik je i več ima dosti let prakse v našoj međimorskoj politiki, a ruon tak več dugo odhaja z političkim putnim nalogima i prek Drave, očem reči, v beli Zagreb grad. I još nekaj, ak jega zberemo bodemo po prvič meli župana z mostači. Napravil sam svojo malo anketo, očem reči, anketico med ženskim biračkim telom i skorom se žene so mi priznali kak imajo jako rade moške mostače. Pak mortik je i zato, kak bi policaji rekli, nepoznati počinitelj počel podmetati cepanice pod noge Mladeno i hitati blato jala kak po Mladeno, tak i po jegovi Ivanki. Znate kak je to, naši ljudi, naši Međimorci čudapot tiskajo v sebi ono kaj mislijo, a i dok velijo unda je to z figom v žepo, tak da nigar nebremo znati na čemo smo. Nekaj si gruntam da se Ivanka i Mladen bodo morali doma dospomenuti je li bodo deli svoje slikice na glasačke listeke kaj zazvedijo kaj o jimi grunta biračko telo ili pak bodo predi majuša hitili puške v kuruzo. Da mene pitate, ja bi ftruc išel na izbore, pak ne bode meni vulica, krčma ili pak kum (čitaj: nepoznati počiniteli) odeđuval je li se ja bodem bavil z politikom ili ne?
Nejpredi je Mladenovo zakonito ženo, Ivanko, nešči prijavil, šepetuji se da je to nešterni jalnoš z jive hiže (čitaj: esdepeja) kak ima velikoga utjecaja i da je sakipot dok načelnik nedelske opčine Darko Dania donaša nekšo važno odluko o poslima v opčini, ona mo svečo drži. Pak ljudi božji, pak zakaj načelnik ima zamjenico nek kaj mo bo pomagala. Nigdar nam je ne praf, a posebno esdepeovcima, bunijo se dok nikaj ne pomaže, kak v Prislavco, a bunijo se dok furt pomaže kak v Nedeliščo. Pokažite mi de je te šteri bi sima nama fpetil?
Još navek međimorski župan, Matek Posavcov, i još navek važeči čakoski gracki načelnik, Štef Kovačov, se nebrejo nikak dospomenuti što bi ipak trebal poprajti čakoskoga nadvožnjaka i to ovoga Režekovoga pre Staromo Hrasto? Nadvožnjak je čakoski, a po jemo se vozijo i međimorski auti, a i kamijoni. A nadvožnjak i dale sam stoji, več pomalem prigjeni jerbo ga bolijo staračke kosti i broji svoje zadje cajte pred penzijo. Dok on tuhni i skešči političari se nebrejo nikak dospomenuti što bo ga poslal na operacijo kaj mo zamenijo staračke kosti i ugradijo stende (čitaj: armaturo). Pred štiri leti dok se je Štef Kovačov ravnal u boj za svojo prvo gradonačelničko foteljo lepo mi je obečal kak on bode, čim prime cugle vlasti vu svoje roke, popravil nadvožnjaka i to z ljuckimi penezi: nekaj prek Hrvackih cesti, nekaj prek Fonda, a ono tretjo polovico štera navek na krajo sfali, ono bode dopelal na tačkaj Zagreba ondašji pomočnik ministra v ministarstvo Prometa i veza, Veselin Biševac, šteroga so zbogradi toga i poslai v beli Zagreb grad. Izbori so minuli, Štef je postal prvi čovek Čakovca skupa z svojim kumom Mariom i nadvožnjak je živnul jerbo je čul kaj mi je Štef obečuval v predizborni kampanji. No, kak zgledi, Biševco so se strgale veze v ministarstvo, a i Štefa so jegovi partiski pajdaši v Zagrebo nikak ne mogli razmeti kaj on oče i tak je bokček nadvožnjak i dale ostal na milost i nemilost zobo vremena, a i kamijonima šteri so se saki den vozili gori – doli. Pred nami so novi izbori, Biševca so poslai dimo Zagreba, a z Lepom našom hercujejo nekši drugi klinci v plavaj dresaj z debele vode, a oni v črlenaj so završili v kumrovečkomo muzejo. Štef i Mario se za galendere na nadvožnjako držijo, tožno ga gledijo, a nas prosijo za novi mandat. Oni so svoje rekli, a na redo je biračko telo kaj se i ono izjasni. A biračko telo mora svoje glase dati Štefo i pajdašima (ne sam uspel zazvediti kaj bo z nadvožnjakom) ili pak zebrati Matijo šteri bode nadvožnjaka popravljal z ljuckimi penezi. A si znamo da je čuda leži se naprajti z ljuckim.
Nebrem nikak razmeti kaj so se si zdigli na zadje noge dok so v čakoskomo Ekomo na posel zeli negdašjega pomočnika ministra Veselina Biševca. Mesto kaj bi čoveka pofalili kaj v tem letima oče delati, mi si smo ga dočakali na nož. Što bi nam vpetil, jempot gombamo kaj političari posla davlejo sam podobnima i partijcima, a ve dok so na posel zeli sposobnoga i školanoga pak je ne dobro. Pak ljudi moji, Veselin je završil fakulteta, pet let je bil na specijalizaciji v ministarstvo i to ne bilo kakšemo nego za promet, veze i vezice i ve nam je takši školani i z praksom došel na posel v gracko poduzeče i pak gombamo. Brzčas to nebre biti nikaj drugo nek međimorski jal i to čakoska poslovna jedinica. Ne bodete veruvali, pak nejbole gombajo jegovi črleni. Mortik je to zbogradi toga kaj so Biševco našli posla, a Koraj šteri več duže ne dela je i dale ostal na čekanjo. Pitala me je teca Franca je li je to, te Biševcov novi posel, uhljebljenje ili se to nekak drugač zove? Ne sam znal kaj reči, ali novo reč za te posel još iščem!
Međimorske navučitelice, Irena Levačič i Tatjana Dobošič so tožile državo jerbo jim je dužna nekše peneze. Kakša je itak tua naša država da je furt nekomo nekaj dužna, nigdar se ne bo zvlekla z toga blata kam je došla. Velijo navučitelice da se v Lepoj našoj se počelo rasti i cvesti, a dok je tak unda i navučitelice morajo dobiti svoj dio kolača. Teca Franca me je onak pothmajno pitala, a kaj so navučitelice doprinesle tomo gospodarskomo rasto? Ostal sam brez reči, a tece France se nebrem sam tak rešiti. Brzčas teca ima praf, oni šteri so delali kaj je gospodarstvo počelo rasti oni so još nikaj ne dobili, oni sam služijo peneze kaj se puni kasa z štere se plačajo ovi drugi šteri trošijo te peneze. Trelo bi to jempot spremeniti kaj bi i oni šteri služijo peneze dobili nekaj vejč, a ne sam oni kaj jif reznašajo. Velijo navučitelice, država jim je dužna, a nekak mi moj črvek neda mira i spituvle je li so navučitelice se dale i sima kaj so trebale, očem reči, je li so ne i one nekaj ostale dužne našoj deci?
Otkak je došel na svetlo dneva esdepeov slučaj Sauča z putnaj nalogaj prek šterih so se naši penezi pretakali v privatne žepe, ali se još točno ne zna čije. Jeni so dali svoje ime i prezime, drugi so pisali i potpišuvali putne naloge, a tretji so hasnuvali državne, očem reči, naše peneze. Pomalem bode ves te zmazani veš „kukuriku“ Vlade došel na svetlo dneva. Počelo je nejpredi z onim kulturnim i inim karticama prek šterih so si ministri, zamjeniki i pomočniki posojavali peneze (štere so nigdar ne vrnuli), kak da je državna kasa jiva kasica prasica, a ve vidimo da se je i čuda putuvalo. I to na se strane. Pak nema svet zabadaf štiri strane. No, te se nevole i te se roke štere so ostale zmazane od rivaja v državni pekmez nam je još jempot pokazal i dokazal da so v esdepejo si poštejaki (tati so na drugoj strani), a kradejo sam čistačice, kuriri, podvorniki i tajniki!? I to ne si…?
V denešje vreme da si si mi stareši gruntamo kak bi deco zvlekli vum z hiži i fkrej od mobitelov, kompjutorov i televizorov i dok to napravimo, na kup naberemo rokometašice, unda dojdemo v dvorano Graditeljske škole i tam so vrata zaklejena. Deca vuni na zimi čakajo i štrpčejo, a z druge strane glažovnati vrati podvornik stoji i gledi na vuro jerbo nesme predi nek je ravnateljica Srebrenka Pongrac rekla otprti vrata. Nebrem veruvati da se to more pripetiti prinas v Međimorjo vu ovom dvajstiprvom stoletjo. A pripetilo se jerbo športaši morajo školi (čitaj:ravnatelici) platiti sako sekundo kaj so v dvorani i to ne važno je li so v ganjko, zahodo, slačionici ili pak v dvorani. Furt si gruntam i pitam se: čija so to deca ta štera igrajo rokomet. Pak to so se naša deca. Naša deca dopolne idejo v Graditeljsko školo i unda morejo v dvorano, a navečer dok dojdejo na trening ili pak v soboto na utakmico unda se morajo držati novoga režima šteroga je ravnateljica posložila. Pripovedal mi je pajdaš Đura ,šteri je v dvorani duže od tridesti let, da so nigdar ne meli nikše probleme niti z jednim ravnatelo se do ove zadje ravnatelice. Brzčas ravnatelica ne zna, ne so joj rekli, kak smo mi Međimorci 2003. leta dali z županiske kase 15 milijonov kuni kaj se je poprajla i zlišpala tau šporcka dvorana. Unda so ovi v školi ne pitali čiji so to penezi, a ve se je več to se pozabilo. A si športaši šteri nucajo dvorani bi za 15 milijonov mogli biti nutri duže od šezdeset let. Lepo je to kaj se ravnatelica Srebrenka briga za dvorano, kaj oče kaj bode se štimalo, ali nesme zabiti da je ne bilo Međimorcov dvorana bi več bila na pol kolena i več bi jo trava prerasla. Se se zna, zna se čija je škola, čija je dvorana, čija je ravnatelica, a i čija so deca. Isto tak se zna čiji je klub i što plača dvorano ženskomo rokometnomo klubo šteri igra v Prvoj ligi i zato tre pustiti deco v dvorano navek da dojdejo jerbo ak ne bo tak bodo se rezišla, a tak čuda cajta smo potrošili kaj jif odvlečemo z krčme, z dima i od kupice, kaj ne bodem mobitela spominjal, a unda jif ne pustimo nutri.
Pred nami so novi izbori, još nam je bliže predizborna kampanja tak da se bode znova pripetilo da bodo ljudi z fakultetom raznašali i kelili plakate na šterima bodo političari z pučkom školom!!?? Ljudi moji, pak nebrejo plakati biti bilo kak zakeljeni!
Fašnik je čistam blizo, a ponorevanje je več zdavnja počelo. Počne da komo dojde, a si skupa završimo na fašnik. Tu se vidi što duže zdrži i što duže more. Navek je tak bilo!
ZADJA VEST: Matek Posavcov se je na vse zadje ipak odlučil: i dale se bode bavil z politikom i to v Čakovco, sam sam ga ne nej bole razmel je li to bode vu vulici Kralja Tomislava ili pak Ruđera Boškoviča!
