309[layerslider id=”6″]
De ga jega dima tu bode, za kratek čas, buknul i ogej. Tak bi se mogla tua stara pučka izreka ponucati i pre ovim spominkima da se naši političari spominajo kaj bode i kuliko podražilo. Več dugo se pripoveda kak bode plin podražil, posle plina bode se to pripetilo i z strujom, pak je ne ona nikaj hujša od plina jerbo strujo nucamo celo leto, a plina sam po zimi. Več so nam ve naši državni cestari pošepetnoli kak bode i cestarina odišla gori kaj se ne bodemo sam tak vozili. Kuliko prešparamo na benzino i nafti tuliko vejč moramo dati za cestarine. Ak nam v jenomo žepo ostaja nekaj vejč penez to tre vejč dati z drugoga žepa, pak se skompenzera. Seposot cene idejo gori, a kak nam se ve kaže bodemo morali plačati i nekšega poreza, prireza za Todoriča kaj ga zvlečemo vum z dreka (bokček mali) v šteri je opal jerbo je bil preveč pošlokjeni. Se ide gori sam plače stojijo na mesti i ne mrdajo. Pak bodemo stali jeden korak nazaj (mesto napre) od države vu šteroj teče med i mleko, a kakšo nam naši političari več dvajsti let obečuvlejo. Med se još navek najde jerbo ga čmeli štere ga delajo i to furt, još navek vejč od bumbarov šteri sam lenguzajo i deblajo se, ali mleka nikod. Pak kak bodemo do mleka došli da so nam se krave zdošle, a biki još navek ne dojijo.
Na međimorskoj burzi dela ga još navek prek štiri jezere onih kaj čakajo posla, a naši gospodarstveniki i dale iščejo težake. Ne znati koga i kak dugo bodo te na burzi još čakali, težaki se iščejo, a težaki dremlejo na burzi? Brzčas so na burzi jedni, a za posel se iščejo drugo formo težaki. Dosti Međimorki i Međimorcov je odišlo prek meje za poslom i to za čuda vekše plače nek so prinas, a dosti težakov dohaja k nam na posel i to z Bosne i Mađarske. Znate kak se to veli, dok je vrag v sili i muhe žere, pak so tak i naši poslodavci počeli jemati na posel i Rome kaj ne bodo doma hmajikovali i kaj ne bodo tam želi de so ne sejali, kopali, orali… Mi furt gombamo na Lejpo našo kak je teško živeti, kak so plače male, kak so režije velike i kak ne muoči prešparati nikše penez makar čovek dela celo leto, ali kuliko vidimo ak je čovek dale bole vidi, tak Bosanci i Mađari dohajajo k nam, jerbo je prinas bole nek prijim doma, očem reči, i Lejpa naša (a stopram „Falačec zemle med dvemi vodami“) je nekomo obečana zemla. A naši ljudi to vidijo stopram dok vum odidejo.
Več hajdi dugo si gruntam zakaj naši ljudi odhajajo vum za poslom i penezima, a mogli bi oditi v Doljnje Međimorje. Priločanci, očem reči, priločki gospodarstveniki furt iščejo težake, nekak tak i je i Doljnjemo Kraljevco, a pomalem i v Kotoribi. Znate de je Kotoriba? To vam je zadja opčina predi Mađarske sam nebrete dojti z Kotoribe v Mađarsko (a niti z Mađarske v Kotoribo) jerbo je most na Muri još ne napravleni. Več duže od dvajsti let je nacrtani, a po nacrtanomo mosto se ne muoči pelati, bar ne brez kompjutora. No, kuliko vidimo v Kotoribi se drugo imajo sam nemajo mosta za Mađarsko, ali i o jemo se navelikom spominajo. Kotoripski političari štere vodi načelnik Grgec se o semo brigajo: zrihtali so i zlišpali igrališča za deco, brigajo se za ogjogasce, branitele, športaše i se udruge štere nekaj delajo v opčini. Ne tak zdavnja so dobili novo školo i šporcko dvorano, ne plačajo komunalno naknado. To je još ne se, gospodarstvenikov ga tuliko kaj so popunili sega placa šteroga so jim opčinari ponudili tak da v Kotoribi si delajo i sa je sreča kaj je most za Mađersko ne gotov jerbo bi brzčas i Mađari (čitaj: Mađerke) v Kotoribo hodali na posel. Nek se zna, v Kotoribi so i zabavišta puna, očem reči, Kotoripčani najdejo cajta kaj i deco delajo. Opčinari se brigajo za svojo deco, vrteci delajo kaj se se praši, a načelnik Grgec i opčinari se brigajo i za študente tak da so si študenti ovo leto dobili i stipendije. Kuliko vidimo ona pesma v Kotoribi sam se rodil, v Čakovec (a i dale) sam v školo hodil još navek vredi, ali nek se zna da se Kotoripčani, posle škole i faksa, vrnejo nazaj v svoje mesto i tam si slažejo svoja gezda skupa z svojimi grlicami. Načelnik Ljubo je pokazal da se se more dok se oče, očem reči, dok de zna kak i z kim!
Sam se za dobrim kojom praši, veli stara pučka izreka, a to bi se moglo reči i za grad Prilok. Hajdi dugo se več za Priločance spominamo ne z malim jalom, a ve so gracki oci došli na RTL televizijo kak imajo velike, ak ne i nejvekše plače v Lepoj našoj. Ne znati što je RTL-ovoj kvočki podlečil kukavičje jejci, ali z toga jejca se je ne zvalil picek nek je ostal šlaprtek. Najme kaj, priločki načelnik, Ljubo Kolarek, je bil jako tožen kaj je to kaj so na televiziji rekli ne istina! Sa sreča kaj si je Ljubo zdobra z ženom drugač bi ga žena mogla na red pobrati, de so penezi jerbo dimo čuda meje nosi nek so na televiziji rekli. Znate kak naši Međimorci velijo: kaj so na televiziji rekli to je resnica. Tua vremena, kak zgledi so navek minula i težaki v grado Priloko još navek dobavlajo čuda menše plače nek so ovi rekli. Kuliko znamo Priločki gracki oci so čuda bolši od Čakoskih i to v semo jedino se v plačaj nebrejo meriti žnjimi. Ipak je Čakovec glavni grad cele županije, pak tak i Doljnjega Međimorja i red je da bar po nečemo bode na prvi mesti. Bar dok se ne plača po učinko!
Doktorice pomalem jemlejo v roke cugle vlasti v čakoski bolnici. Novi ravnatel, doktor Robi Grudičov je postavil nove šefe i šefice po bolničkim odjelima tak da bode pomalem došlo na to kaj bodo doktorice držale tri vogle v bolnici, a doktori sam dva. Si znamo da je naša bolnica velika, tri-štiripot smo jo zidali i dozidavali, tak da ima nejmeje pet voglov. V šefovskaj fotelja sedi „slatka doktorica“ Andreja Marić, na jenoj kirurgiji šefuje Renata Čulinović, a očna šefica je Mirna Belovari. Kaj god bode nešči rekel, ali nam moškima je čuda lepše dok nas v roke primejo doktorice, a to nam čuda bole paše dok smo betežni. Brzčas je i z ženami tak jerbo je šef na ginekologiji ostal doktor Nino Škvorc. Lepo je to od novoga ravnatela kaj se on briga za betežnike i kaj dela onak kak betežnikima paše. Ak bode tak i dale delala bode tu i penzijo dočakal!?
Lepo je to čuti kaj ga na čakoskomo Jugo tuliko dece kaj ne bodo v školo zišli, očem reči, da i mladi ljudi nekaj drugo delajo, a ne kaj bi sam drkali po mobitelaj i Fesbukaj. Ali je ve v nevolo došel ravnatel škole, Vinko Grgičov, jerbo nema kam deti deco. Što bi rekel, nova škola, stopram deset let je tu i več je premala. No, kak bilo da bilo, leži bodo gracki oci dozidali školo nek da morajo deco delati!?
Da so lokalni izbori v pitanjo nejveč praha se navek zdiguvle v belom Zagreb grado i okoli jega. Znate kak je to, to je nejvekši grad v Lepoj našoj i tu so unda i nejvekši penezi v gracki kasi, a de so penezi tu se nejveč ljudi mota. No, ovi zagrebečki izbori so rešeni i več se ve zna da bode HDZ pobedil tak da si drugi morejo hititi puške v kuruzo. Kaj se dotikavle gospe Mrak ona bode morala čekati nekšo drugo priliko, makar bi to bila velika promena za grad Zagreb da mesto slaboga i kosmatoga Bandiča dojde za prvo zagrebečko damo jedna tak jaka i lopošnata persona kak je gospa Mrak. Ruon tak mi je žal kaj gospa Švaljek ne bode zebrana jerbo mi je ona čuda lepša od gospe Mrak, a kaj ne bodem spominjal kosmatoga Bandiča. No, malo sam zglajzal, štel sam vam pravzaprav reči da bode v Zagrebo HDZ sigurno pobedil jerbo ima tri svoje kandidate: jednoga so zebrali hadezeovci v Grackom odboro, a to je doktor Dragec (pravo zagrebečko ime i brzčas bi to ime nejbole pasalo novomo gradonačelniko) Prgomet, druga hadezeova kandidatkinja je fajna plavuša (bole kak precednica) Bruna Esih štero so zebrali oni v hadezejo šteri zagovarjajo žensko kvoto, a tretji kandidat je stari, makar još navek živahni, gradonačelnik Milan Bandičov. I ve vi meni rečite je li nešči drugi ima kakše šanse protiv zagrebečkih hadezeovcov? Ak nešči misli drugač nek dene jezero kuni v kladionico!
Kuliko vidim neje sam v Zagrebo tak, i naši međimorski gradi so rešeni. Nejpredi je se rešeno v Priloko, tam je hadeze malo ojačal koalicijo štera je do ve hercuvala tak da očejo i dale biti glavni i kaj napravijo se ono kaj so splanerali. Dok so Čakovčanci vidli kak to Priločanci delajo, pak so i oni malo pojačali koalicijo, očem reči, fondoša prek šteroga bodo došli do pobjede v prvom krugo. Koalicija je dosta široka, a se si gruntam je li je i dosti jaka? Serjančari so v minulom mandato naprajli skorom se kaj so splanerali, a ve jim jedino ostaja još jeden most prek Mure za kamijone. Ne znati je li bodo delali novoga ili bodo zlišpali železnoga i to tak kaj bodo mesto cugi (šteri več ne vozijo) se prek Mure vozili kamijoni. No, kak bilo da bilo, serjanska ekipa štera je pobeđivala v minulom mandato se nadja da bode i dale, bar za prsa, naprej pred semi i da bode i dale držala v rokaj cugle vlasti v nejsevernešemo grado v Lepoj našoj. Kuliko vidimo se se zna sam još biračko telo to treba potvrditi!?
Čuda bi bole bilo kaj bi lokalni izbori bili sake dve leti jerbo bi se čuda vejč toga napravilo po opčinaj i gradaj. Kak seposot tak i v Čakovco. Do ve je čakoska kasa bila prazna, još je nekaj i falilo, a ve so se negdi našli penezi, mortik je opal bingo v kladionici, i se se znova lišpa. Tak je to navek bilo, pak je unda nikaj ne čudno kaj je i ve tak!?
