15 C
Čakovec
Četvrtak, 28 ožujka, 2024

Je li smo ve kaj spametneši?

Kak smo rekli minuli tjeden v minulo nedelo je bič počil i mi Međimorci i naše  Međimorke smo zebrali novoga župana. No, ne ruon novoga nek smo zebrali malo ponucanoga, očem reči, Matijo Posavca, šteri je bil zebrani na prtuletje, v majušo, dal je ostvko v septembro tak da smo si mi na falačko zemle med dvemi vodami morali iti na popravni i znova sima neverovanim tomašima reči da očemo kaj nam bode i da le Matija župan. Kak i navek nejspametneši so oni šteri so ne išli glase davat. Oni se zgovarjajo da so znali kak bode zišlo pak kaj bodo fratili svoje vreme.

Za te šteri so ne išli so naši stareši ljudi, več zdavnja, zmislili jeno lepo izreko jerbo kaj bodo oni hodali glase davat unda bodo si znali komo so ga dali, očem reči, si bodo znali kaj si oni vu svojim glavama gruntajo: Lepa naša je slobodna država pak smo unda i mi Međimorci vu našoj županiji ruon tak slobodni. Nebre nas nišči (precednik, ,premijer, stožer, politika) natirati kaj bi premišlavali svojom glavom ak mi to nečemo!

Kaj smo mi Međimorci ve dobili z temaj novaj izboraj? NIkaj, čistam nikaj! Župan Matija Posavec je došel nazaj vu svojo foteljo štera se je pravzaprav još niti ne prehladila. Naše međimorsko biračko telo je, na se zadje, niti ne zazvedilo kaj je bilo z temaj deset jezer kuni mita ili pak donacije z Draškovca? A ruon tak smo ne zazvedili kaj je z onom puckom štera je dobila posla prek reda ili kak so uskoki rekli, prek župana. Ve se niti ne zna je li je došlo teh deset jezer z županovoga žepa v državno kaso ili pak je Uskok sam zdigel praha po onoj prapraprastaroj: stepali so se bregi, a skotil se je miš? Kak mi je rekla teca Franca, nesmo niti kaserali teh deset jezer kuni mita ili pak donacije kaj so Matiji spočitavali, a potrošili smo cirka dva milijone kuni da bi nazaj dobii svojega župana. Prosim vas lepo, de je tu i kakša računica i što jo je delal? Ali kaj se koga dotikavle kuliko kaj košta, kuliko koštajo novi izbori, dok mi mali ljudi (čitaj: porezni obvezniki)  to se plačamo? Kak dugo se bodo te cirkusi delali na naš račun – to te ja pitam?

Evo kaj vam nek rečem, zvala me je soseda minoli tjeden dok je bil mraz vjutro da joj auto neče vužgati i prosila me nek dojdem kaj joj ga porinem… Nesam išel, makar je ne lepo ne pomoči bližnjemo svojemo i to fajnoj sosedi, ali sam se prepravlal za izbore!

Mel je Darko Zverov prav, Međimorke i Međimorci očejo novoga župana, ali ne je ruon točno znal da je to vreme za promene još ne došlo jerbo mi čakamo kaj se Matija zavoli politike pak bodemo unda zebrali nekoga drugoga. Ne znati je li Darkec more tak dugo čakati?

Sako jutro dok se stanemo si gruntamo da bode ipak toj koroni, tomo covido več jempot došel kraj. Ali vrag neče crknuti. Kaj se mi bole nadjamo da bode hejala, da se bode zdošla korona je se jakša i jakša, očem reči, se vejč ljudi je cepleno z jene strane, a z druge strane je se vejč ljudi betežno. I ne sam betežno nek jako betežno jerbo nigdar so bolnice širom Lejpe naše, pak i naša v Čakovco, ne bile tak pune betežnikov i to ovih od korone. Teško, jako teško je tu biti spameten, saki den so se oštreše antikorona mere šterih se mi ljudi pridržavlemo: nosimo maske, nikam nejdemo, a dok idemo držimo se fkrej jedni od drugih, cepili smo se i vcepili i nikak da se ta vuteska sfonda.

Ne šepuri se tua vuteska korona sam prinas v Lepoj našoj, v lepom našem, makar malom, Međimorjo nek i si naši sosedi nebrejo dojti žnjom na kraj. Saki se bori protiv je onak kak si grunta da je nejbole. Napriliko, naši drugi sosedi Austrijanci  morajo biti furt doma, nesmejo iti v krčme, nesmejo iti na utakmice, v kina, kazališta, nesmejo hodati k pajdašima na gemištece, kartanje… isto kak niti ja od da sam se oženil!

Ve se je pojavila nekša nova sorta omikron, to je več štrta ili pak peta pasmina toga kineskoga betega. Nekak mi je te omikron bil poznati i iskal sam ga po svojim pametnim kišticama vu glavi i na se zadje sam ga našel. Pak vuro Omikron sam dobil pred šezdeset let od fermanoga kuma na dar dok sam išel na fermo. Ve me je korona natirala kaj sam išel poiskati to fermano vuro i našel sam jo na najži v kutiji z slikami, odnesel sam jo vurmaharo i ve znova kaže točno vreme. Kaj reči, čim se je omikron pojavil na svetlo dneva mam so naše bolnice pune, a doktori i sestrice imajo pune roke posla. Ka veli teca Franca: sam vrag je zmislil toga omikrona. A morem reči da vu zadjih dve leti te vragi kajkaj toga zmišluvlejo z čim mi posle nebremo dojti na kraj!

Štel bi nekaj reči onima šteri drukajo za Dinamo. Si znamo da Dinamovci imajo svoje suvenire: majce, kape, zastavice, sjedalice… i zato očem reči drukerima Dinama nek se ne špancerajo z dinamovom majcom ili pak kapom okoli čakoskoga  soda vu šteromo pravico deli sutkinja Renata Višoševič jerbo saka majca ili pak kapa ima grb  Dinama na šteromo je prvo pole belo, a si znamo kak to sutkinja Višoševič nebre videti i takše prestupnike pošilja v rešt na mesec dni. Nejmeje. Ak več nebrete zdržati kaj nej nosili kapo Dinama i unda dok Dinamovci zgubijo unda vas prosim kaj se nej motali okoli čakoskoga soda.

Morem vam reči da je sveti Mikloš prebolel korono, vcepleni je i ima covid pasoša tak da se naša deca i vnuki morejo nadjati da bodo nekaj dobili za ovoletno Nikolinje sam morajo počistiti šolce i deti jiv v obloke jerbo sveti Mikloš ne ftegne, a niti nesme (zabranil mo je stožer), hodati po hižama. Si oni šteri ne bodo šolce ili pak čižmice, i to čiste, zboksane i naglancane, deli v obloke dobili bodo sam šibe. Sveti Mikloš nosi dare dam dobri deci, a dobra deca si saki den čistijo svojo obutel. Deca, kaj se čaka, kefo i boksa v roke i na posel!

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE