Doček zlatnim vaterpolistima v Zagrebo!

Miting i prosvjed na Markijovomo trgo

Ve je točno ne znati je li je to na Markijovomo trgo v belom Zagreb grado i to pred cirkvom, štera na svojemo krovo odnegda ima hrvackoga grba z prvim beli kvadratičo i to hajdi let predi nek so postojale ustaše na ovomo našemo hataro, bil miting ili pak prosvjed. Jeni velijo da je bil miting levičarov: Peđe Grbina, Sandre Benčič, Davora Bernardiča, Kate Pejovič, Dalije Oreškovič, Anke Mrak Taritaš, Krešija Beljaka… i kaj nem dale nabrajal, a ovi šteri so bili se falijo kak so bili na prosvjedo. Najbrž je saki bil na svojemo. Kuliko vidimo nikaj bez prvoga beloga kvadratiča na negdašjemo hrvackomo grbo, a ruon tak nikaj bez Anke Mrak. Nikaj i bez beli lajni za grmom. Se ima svoje mesto v ovoj novoj modernoj politiki.

Nek se zove kak se oče, nek bode prosvjed ili pak miting kak komo bole paše. Morem vam reči da so to ovi naši levičari dosti spametno spelali jerbo so pozvali ljude na Markov trg jerbo je on čuda menši od Jelačič placa, tak da je te dvjesto – tristo ljudi (jeni velijo da ga jiv bilo čuda vejč) šteri so došli na Markijov trg zgledi čuda i to tak čuda kaj zgledi kak da je Markijov trg čistam pun i još je nekaj bilo po vuličkaj štere so polek, a da so te si došli na Jelačičov plac unda bi se tam vidlo da je skorom nišči ne došel. To so se jako spametno zmislili makar so nam drugo nikaj ne rekli kaj bi oni novoga i bolšega naprajli od hadezejovcov šteri, kak smo čuli, nikaj ne vredijo, kradejo, lažejo i nejvekša so nevola za Lepo našo. Naši levičari so pokazali kak jim noge drfčejo pred Ivekom Turudičem i kak jim nikak ne paše kaj bode on držal cugle vlasti v Dorho i kaj bode vedril i oblečil z državnom pravicom v celoj Lepoj našoj. A da se to ne bi pripetilo naši jugonostalgičari predlažejo kaj bi se išlo na izbore i kaj bi oni došli na vlast, a unda bi se bilo drugač, očem reči, bilo bi onak kak oni očejo i stoprocentno je sigurno da unda Ivek Turudičov ne bode mel vu svojimi rokami cugle vlasti naše pravne države. Kuliko vidimo pravna država kakšo so naši levičari slagali dvajsti let je ne onakša kakšo na pameti ima Ivek Turudičov, a to unda znači da mora oditi ili takša pravna (leva) država ili pak Ivek Turudičov. Ve je Ivek tu i ve bode Lepa naša takša za kakšo so se od 1991. 1995. leta borili naši braniteli (i Ivek žnjimi), a ne onakša kakšo, još navek, očejo oni šteri još dendenes živijo v Jugi.

De so se itak zmogli?

Si šteri so pratili kraj Juge, države vu šteroj smo živeli i mi Hrvati pre kraj devedesetih, očem reči, predi nek so nas Srbi i Jugosoldateska napali, predi Domovinskoga rata, znajo da ga v Jugi ne bilo nigdar vejč od 12 procentov komunistov, očem reči, članov partije, a ve pak mi v Lepoj našoj imamo cirka, okoli tridesti procentov oni šteri još dendenes živijo v Jugi. To sam pravzaprav kanil pitati vas, makar sam pital i teco Franco, deso so se ti drugi zmogli? Di so se zmogli te kaj so pred nekaj meje od četrdeset let ne bili v Partiji, a ve još navek živijo v Jugi? Kaj reči, od stoletja sedmog molimo, prosimo i štečimo Lepo našo i unda dok dojde do je, i to prek štiriletnoga krvavoga rata, unda nekaj meje od pol naših Hrvatov živi i dale v Jugi. Ne da živi i to onak stiha kaj nišči ne bi znal, nek cendra i to tak glasno kaj jiv si čukejo?

Javila se i Vedrana Rudan

Kaj se mitinga ili pak prosvjeda dotikavle javila se i Vedrana Rudan kaj nam, onak kak to več ona zna, pojasni kaj si o mitingo, prosvjedo i Turudičo ona grunta. To je ne nikaj novo i bilo bi najbrž jako čudno da se je ne javila. Prepovedala je o semo kaj je na Markijovomo trgo vidla i rekla kaj si o tomo grunta, očem reči, kaj si grunta o Iveko Turudičo, Andrejo Plenkovičo, HDZ-ejo, korupciji, našemo hrvackomo jeziko, ZDS, ustašama, Stepinco… i kaj ne bodem dale nabrajal. Bilo bi čudno i ne bi jo prepoznali da je ne se svoje komentare davala z venim vu zobima. Kak god steška, ali mi se to zišlo na to da nikaj nebre reči ak se ne drži za venoga ili pak joj je veni vu zobima… Rekel je pajdaš i sosed Tonča, bar znuomo kaj joj nejveč fali vu živlejo. Ili joj fali ili pak ga nega dosti? Nebrem reči da je bil jeni pogled na miting tožen, ali je to bil komentar i pogled prek venoga.

Nesam znal da SDP-e ima tak čuda partijaca vu svojoj stranki?

V soboto na mitingo v Zagrebo na Markijovomo trgo ga bilo nejveč esdepeovcov. Saki drugi je mel velikoga črlenoga bedža na šteromo se je šepuril natpis SDP. Nekaj sam si gruntal, pak ako SDP-e ima tak čuda partijcov pak unda bode on pobedil na izboraj? Morem vam reči da mi je moj politički črvek v glavi ne dal mira i furt me mučilo to pak od da ga tuliko esdepeovcov v Lepoj našoj. Da sam ne bil sam svoj vidla je i teca Franca pak me je došla pitat kaj me itak muoči. Priznal sam jo lepo kak je v pitanjo nejvekša partija na zagrebečkomo poslefašinskomo mitingo. Nejpredi se slatko nasmijala, kak to več stareše žene znajo, unda mi je lepo pojasnila da so to bili jednodnevni esdepeovci. Nesam razmel pak sam mam zapita: kakši so to jednodnevni partijci? Lepo mi je teca pojasnila: pak to so oni kaj so došli na špancer jerbo je bilo lepo vreme, a unda so jim partijci dali bedževe, jesti i pijačo, a i nekšo dnevnico tak kaj so celo dopolne delali stisko na mitingo. Malo me je bilo sram kak si je to teca Franca spametno pregruntala, a meni je to, kak vidite, ne palo na pamet.

Miting je kriv kaj so naši zlatni vaterpolisti ne meli dočeka

Što je kriv našim vaterpolistima, sveckim prvakima, kaj so nejbolši na sveto vu vreme dok je “miting istine” v Zagrebo pak partija ili pak stranka Možemo, štera je na vlasti vu belom Zagreb grado nebre v isto vreme delati na dva fronte: i biti na mitingo i naprajti dočeka vaterpolistima. A i nekaj se šepetuji kak grad nema dva razglase za dve tak velike fešte. Ve so zagrebečki gracki oci ne ftegnuli organizerati doček zlatnim vaterpolistima, ali bodo to ispravili čim se naše “baracude” vrnejo s zlatnom želencijom z Olimpiski igri!

Ostavi komentar

Povezani članci

Ostanimo povezani

49,208FanoviLajkaj
608SljedbeniciSlijedi
0PretplatniciPretplatiti

NAJNOVIJE