-1.7 C
Čakovec
Nedjelja, 5 veljače, 2023

De so vekši poštejaki?

Kaj bom vam rekel, nesam mogel veruvati dok sam to čul? Najme kaj, zazvedil sam prek javnih medijov (nejso to ovi lički) da bode od ve nadale plina prodaval HEP mesto INE. Mam sam se pital, a to me je zapitala i teca Franca, pak kaj so v HEP-o vekši poštejaki nek vu INI? Još ne tak zdavnja dok je haenesovec Ivo Vrdoljakov koaleral z Hadezeovcima v HEP-o i dok so on i jegova „šefica“ Vesna Pusičova tu uhljebljivali svoje haenesovce se je pripovedalo kak je to bankomat za kajkoga. Verjem da se zmislite kak so na tapeti bile vetro i sunčane elektrane sam za zebrane i za one z pomaranđastaj knigicaj i da je hepov med i hepovo mleko teklo sam za „poštejake“ i neje ruon saki mogel dojti med te zebrane kak god je štel. A ve čujem, da se je, posle korone, to se spremenilo i oni šteri iščejo kruha prek kolačov i pogače so se preselili med plinače. Kuliko vidimo prinas je teško biti spameten i teško je potrefiti na šteroj strani i v kakšaj majcaj so poštejaki, a šteri so oni drugi? Nikaj se nej čudil ak bodemo zutra dok se stanemo zazvedili kak bodemo dobavljali jenoga računa za plin i strujo tak da nikak ne bodemo mogli zazvediti kuliko nas košta struja, a počim je plin? Najte me nikaj čudno gledati, pak več hajdi dugo plačamo plina v kilovat vurama kak i strujo tak da nam to ne bode nikaj novoga!

Denes trebate meti celi pušelj paperov ak očete na škedjo ili pak hižici meti sunčane ploče, ali papere so vam ne dosti, morate meti i nejbržešega prsta ak očete kaj vam bode sunčana sekirka v hepov med pala.

Ve se stopram vidi kak je Zdravkec Mamičov srečen kaj je moral pobeči prek Save v Bosno, očem reči, Hercegovino jerbo tam je čuda leži došel do sunčani elektrani i črez leto – dve bode glavni strujač pre našim sosedima, a o tomo bi v Lepoj našoj sam mogel senjati. Kuliko vidimo sako zlo za nekše dobro tak da si bode črez par let povrnul se one peneze kaj mo je Lepa naša zela i štere je tobož vrnula Dinamovcima. A zakaj bi i dala Dinamovcima ak so oni ne niti za kuno terjali Zdravkeca!

Zakaj  je  Magdica  v  rešto?

     Najte me krivo razmeti, ali nikak nebrem razmeti zakaj je Dovečerova Magdalena završila v rešto? Znuom, štela je svojemo vujčijo Tihomo pribaviti nekšega posla prek jenoga poduzeča, ali je na se zadje to ipak ne uspela naprajti. No, makar je ne uspela ali evropske roke pravice so jo sejeno zaprle v rešt, najbrž očejo zazvediti zakaj je ne uspela ili pak se čudijo zakaj vujči, Ak nema strica, a nema, unda joj je vujča prva vekša rodbina.

Ne sam da je završila v rešto nek so Magdico hitili vum z Hadezeja. Nesam ruon do kraja vpučeni je li so i se ove z plinskoga „biznisa“ hitili vum z stranke? Da se razmemo tam je bila v pitanjo milijarda štero so dečki sranili na privatne (i penzionerske) račune, a tu je vujča trebal odelati posla za milijon kuni. Još nekaj, pak kaj se čudimo kaj je posla trebal dobiti vujča, šteri je mel nejnižešo ceno jerbo znuamo da je ponuda z nejnižešom cenom ne nejpovoljneša ponuda. Teca Franca mi je pošepetnola da ona razme to kaj so zaprli Magdico za te drobne peneze, ali ne razme zakaj so zaprli vujčo? Pak je on ne niti nikaj delal, kaj bi rekli, niti je luka jel, a niti podehaval? Kaj reči, malo nam je čudna tua Evropa, nek se ona ne čudi, ali nam je čudna!                                                 

Još bi nekaj pital, je li so Hadezeovci shitali vum se one šteri so rivali roke v naše državne žepe, od Sanadera, Vidoševiča, Kuščeviča, Gabike Žalac, Pepice Rimac pak nadale, kaj nem nabrajal… Ili pak si i to tre zaslužiti? Nebrem niti sam sebe razmeti kaj i komo se tu čudim, pak so niti haenesovci ne hitili vum z stranjke Anko Mrak Taritaš posle „velikih poslov“ v obnovi  Gunje!

Od  čega,  itak,  dobavlamo  bučino  olje?

Več sam hajdi pot pisal o tomo kak se naše međimorsko črno olje dobavlja od koščici i to ne bilo kaši koščici nek tikvini koščici. Veruval sam da je spametnomo par sto reči dosti, ali kuliko vidim i tu sam v kmico vritnol. Najme kaj, ve kak je došla jesen tak so došle i jesenske bratve, tak da beremo se kaj nam je zraslo pod ovim sunčekom nebeskim. Pobrali smo kalampera, kuruzo, grozdje pak so i tikve došle na red. Tu, med tikvami se pripetilo kaj sam se nigdar ne nadjal. Najme kaj, naši ljudi, naši Međimorci, šteri rovlejo v zemlji, sejajo tikve i tikve zrastejo, pobirajo i zbirajo tikve tak da jim koščice ostanejo. Te tikvine koščice tiskajo, očem reči, prešajo i žjiv vum ide črno koščično olje. I se je vredo tak dugo dok to koščično olje ne počnejo prodavati jerbo unda prodavlejo bučino olje. Prosim vas lepo, rečite mi, da je što i kak od buči dobil koščično olje?

Den  oslobođenja  Međimorja

Pred dva tjedne smo preslavili Den oslobođeja Međimorja. Bilo je hajdi ljudi, bilo je jako svetešje. Došli so skorom si šteri so morali makar je dežđ curel. Kak veli teca Franca, mora se preslaviti i po dežđo jerbo so i naši branitelji ratuvali po dežđo. Donesli smo vence, vužgali sveče pre spomeniko v čakoskomo parko i zmislili smo se kak je to bilo pred nekaj vejč od tridesti let na Svetešjoj akademiji v Kulturnomo centro. To je se bilo dopolne i okoli polneva, a meša se je za naše branitelje, Međimorje naše malo i Lepo našo služila navečer v starešoj čakoskoj cirkvi. Verjem da ste čuli ili prečitali kak je po zadjemo popiso pučanstva na Falačko zemle med dvemi vodami (2021.leta) bilo cirka osemdeset procentov katolika, a na mešo jiv je došlo meje nek imamo prsti na rokami. Ne znati je li je meša v krivo vreme služena (navečer je več ne dežđ curel) ili pak je nekaj drugo v pitanjo? Pak so braniteli i dragi Božek zaslužili kaj jim se zafalimo za se kaj so za nas i naše Međimorje dali!

Ostavi komentar

Povezani članci

Ostanimo povezani

0FanoviLajkaj
3,695SljedbeniciSlijedi
14,700PretplatniciPretplatiti

NAJNOVIJE