Čim nam bliže dohaja 5.augustuš mam so strke z jende stane, a nevole z druge strane. Bar dva tjedne predi počnejo spominki, gruntanja i premišlavanja kak se bode preslavil nejvekši svetek v Lepoj našo, a to je Den pobjede i domovinske zahvalnosti i Den hrvackih branitelov, kratko, jasno i glasno rečeno Den „Oluje“. Nejpredi so spominki što bode išel v Knin, a što ne bode išel, očem reči, je li bodo išle nacionalne manjine, je li bodo išli predstavniki Srbijancov ili pak ne? Je li bode precednik Zoki mel čas i voljo kaj dojde? Što bode na bini, a što polek, što bode v prvomo redo, što v drugomo, a što pak v zadjemo. Što bode igral, a što pak popeval? Se to vam zgledi kak droptije, a o tomo premišlavle celi šereg ljudi i sakefele maherov. Tak je i ovo leto bilo, spominki so trajali dobrih deset dni, počeli so mam čim se je zafremal novi Sabor pak do Dneva pobjede.
Ovo leto so se premijer Drašek Plenkovičov, novi saborniki i novi ministri dospomenuli da bode Srbin Boris Miloševičov, zebrani za potprecednika hrvacke Vlade, išel v Knin kaj ne bode zgledalo da Srbi imajo nekaj protiv Oluje. Se je to nekak zgledalo tak dugo dok je potprecednik Miloševič ne počel govoriti. Istina Božek da je on mel sedemnajst let 1991.leta dok so jegovi zemljaki prešli Dunava z tenkima i počeli gaziti Lejpo našo i to sam zato kaj so šteli kaj bi bila jiva. Boris je govoril kak da nikaj ne zna, kak da ne zna kaj so Slobo, jegova rodbina po prezimeno i jegovi kompanjoni Karadžič, Šešelj, Mladič, Arkan, Matič, Šlivančanin, i drugi generali delali po Lepoj našoj. Nekak bi još mogel razmeti Srbe kaj oni govorijo sam ono kaj smo mi Hrvati zahuzali, ali ne razmem zakaj mi i naši novinari furt to za jimi ponavlamo kak papige. Furt nam pod nos rivlejo Grubore de je stradalo šest Srba i nišči je do dneva denešjega ne za to odgovarjal. Da se razmemo, ne sam ja za to kaj bi se zločini kakši god i čiji god skrivali, za saki zločin šteri je zločin treba odgovarjati on šteri ga je napravil. Ali ne sam na našoj strani nek i na onoj drugoj, agresorskoj. Srbi kak da so pozabili da je još nišči ne odgovarjal za Plitvice, Borovo Selo, Škabrnjo, Vukovar, Ovčaro i kaj ne bom dale nabrajal. Još se za hajdi naših ljudi ne zna de so jim kosti i jiva rodbina nema de svečo vužgati. A več je prešlo 29 let otkak so pale prve žrtve. Ak se oče naprajti red unda ga tre naprajti i na drugoj strani, a ne sam prinas. Još so naši sosedi niti jempot ne priznali da so oni započeli rata, da so oni došli k nam i šteli so kaj bi jim mi prepustili svojo zemljo. Ne sam kaj so ne priznali nek jim ne padne na pamet kaj bi platili ratno odšteto za se ono kaj so rezrušili i za več od 15 jezer naših branitelov šteri so dali svoje živote v Domovinskomo rato.
I ovo leto so v Knino ne meli svoje mesto na fešti Hosovci. Žnjimi se naša Vlada zbrčkavle kak da so se ne borili v Domovinskomo rato. Od 1991. – 1995. so nam ne smetali jerbo smo jiv nucali, neso nam išle na živce jive črne majce i jiv pozdrav „za dom spremni“, a ve posle 25 let nemajo svoja mesta na feštama kak da so se borili za nekoga drugoga. Kak zgledi, navek je to tak bilo, jeni so se borili dok je rat trajal, a ve posli so kcoj došli nekši novi klinci i oni vodijo politiko.
Malo, malo pak nam sosedi Srbi pod nos rivlejo kolono traktorov z šterima so 1995. odišli z Knina i okolice za vreme „Oluje“. Ne tak zdavnja, pred 75 let so Hrvati bežali pred partizanima i četnikima, šteri so si preslekli obleke i četničke kokarde zamenili z petokrakaj, šteri so jiv pregajali po „križnomo poto“. Probajte si pregruntati kak bi to se zišlo da so Hrvati unda meli traktore? Najbrž bi jiv čuda vejč ostalo, a ovak jiv je, predi ili posle, v majo ili pak junjušo pod zemljom završilo nekaj vejč od pecto jezer.
Nekaj sam mel za čuti, bar se tak pripoveda, da saki moški v Srbiji mora položiti ispita kaj bode znal voziti traktora. Ne bi vam znal reči je li je to tak ili pak se nešči heca z naših sosedov, ali kuliko znamo čuda je sosedov šteri još den denes sejajo mejo Virovitica – Karlovac – Karlobag i tak dugo dok si to ne bodo zbili z glave bodo se morali vučiti i traktore voziti. Verjem da so ne zabili kak je to zgledalo pred 25 let, a nikaj bole ne bodo prešli ak jim pak padne na pamet kaj bodo selili meje!
Kak je i red, i mi smo prinas v Čakovco i Međimorjo, preslavili Den pobjede. Vence smo položili i vužgali sveče pre spomeniko v čakoskomo parko den predi svetka, a meša za Lepo našo i za poginule branitele se je služila 5. augustuša. Meša se je služila v čakoski stareši cirkvi, ali je nišči od onih šteri so naručili mešo ne došel k meši. Ne bi štel nikaj reči, ali so si si oni šteri so dali svoje živote za Lepo našo zaslužili kaj jim se zafalimo za jivo žrtvo!!!
Ne znamo koga se mi bojimo i pred kim se skrivlemo. Kak sam več rekel, pred deset dni smo preslavili nejvekšega svetka v Lepoj našoj, Den pobjede. Na te den smo mi, očem reči, so naše braniteli, naši heroji v „Oluji“ pretirali četnike prek meje i tak omogučili Lepoj našoj da dojde „do zraka“ i počne gospodariti sam z sobom na svojemo hataro. Je bilo tak? Bilo je! I zato vas pitam zakaj mi na te den ne denemo na svoje hiže trobojnico kaj bi si, šteri dojdejo k nam, znali da je prinas državni svetek. Koga se mi bojimo? Pak smo one šteri so nas napali pretirali pred 25. let. Malo sam se prepelal po međimorskomo glavnomo grado pak sam primetil da niti oni šteri držijo cugle vlasti vu svojimi rokami, šteri bi nam morali biti primjer ne mečejo trobojnice na svoje hiže. Nekši čudni smo ljudi mi Međimorci, očem reči, Čakovčanci.
