(U)krajina
To se razmem i to mi ide v glavo da srpski precednik v tretjemo mandato, Aleksander Aca Vučić, v ovomo rato šteri več skorom dva mesece traje navija za Ruse jerbo on nikak nebre podnesti kaj Ukrajina počne z slovom U i nikak mo ne paše ak U, štero ga vleče na ustaše, hiti fkrej unda mo ostane sam Krajina, a i tua Krajina je ne jegova nek je Dodikova. Ve vidte na kaj so ljudi došli v politiki kaj je sam jeno slovo važno i to slovo odlučivle za koga bode čovek navijal i to nigdi drugdi nek v rato. Čovek još more Vučiča razmeti, ali nebrem razmeti naše levičare, kaj nem rekel antifašiste, šteri so ftihnoli dok je rat počel, očem reči, dok so Rusi genuli na Ukrajino i nikak si nebrejo pregruntati za koga bi navijali. Pak tu je bar se jasno, ak so Rusi prešli prek ukrajinske državne meje, ak ratuvlejo v Ukrajini, ak očejo državno mejo preseliti dale nek je do ve bila unda so oni agresori, napadači i nikak nebremo za jiv navijati. Ukrajinci imajo pravo na svojo državo i to jim nišči nebre i nesme zeti. To kaj bi Rusi šteli biti vekši i kaj jim se Ukrajina vidi kak jiv prva soseda to si nek denejo za škrlak. Saka država, saki narod, pak i Rusi, nek se širijo i šepurijo po svojemo hataro kak zagorski puran i ak očejo prejti prek meje unda moraju pitati onoga čiji je to hatar. A ne kaj se sednejo v tenke i vozijo se kud očejo. I ne sam kaj se vozijo nek rušijo se do čega dojdejo i strelajo se šteri jim se na poto najdejo.
Tak je to bilo pred trdesti let?!
Verjem da se još zmislimo kak je to bilo prinas pred malo vejč od trdesti let dok so naši sosedi z istoka (i unda z istoka) počeli halositi na naš hatar i to z puškama, topima i tenkima. Nekaj čistam slično kak denes Rusi delajo v Ukrajini. Nesmo mogli k sebi dojti dok so počeli strelati po nami, nejpredi so nam zeli oružje kaj mi nej strelali po jimi, ali jako fletno smo vidli da je vrag zel šalo i da moramo zeti puške v roke, makar i lovačke ak druge nemamo, jerbo bodemo ostali brez Lepe naše štero smo sam leto dni predi zafremali. Verjem da se zmislite kak so naši antifašisti ostali brez reči, kak i denes, jerbo so srpski antifašisti, preblečeni v četnike, genuli na Lepo našo i rivali državno mejo, prek Vukovara, do Virovitice. Naši dečki v Lepoj našoj so se zdigli i genuli so kaj natiramo četnike nazaj jerbo je nišči ne znal zakaj se je to pripetilo. Dok so se dečki z HOS-a prijeli puški i genuli kontra četnikov unda se je zazvedilo da so to ustaše jerbo so se oni pozdravlali z starim hrvackim pozdravom ZDS. Sosedi četniki so nas prekrstili v ustaše i rat je mogel početi. Kakši je to rat v šteromo ne ratujejo četniki i ustaše. Makar je naš Domovinski rat trajal štiri leti to je bilo prekratko kaj bi se i naši antifašisti uključili?
Kam je zginula korona??
Duže od dve leti smo čakali i senjali dneva da se bodemo vjutro zbudili, da se bodemo stali, a korone ga ne bode. Verjem da se zmislite kaj sam vam govoril kak so si svecki rati, pak i oni drugi, menši, do ve trajali štiri leti, a si veliki betegi od kuge, kolere, gripe, ptičje gripe, kravljega ludila…, trajali dve leti i to se pokazalo točnim. Posle dve leti korona je počela hejati, a unda so jo Putin i Rusi stirali v ropotarnico povjesti. Najbrž so oni sam malo pomogli kaj se o koroni več ne spominamo. Morem vam reči čim je korona odišla od nas i to brez potnoga naloga, čim je odišla i z naši cirkvi mam so se ljudi vrnuli v cirkve. Ne sam ljudi nek so se vrnula i deca, vrnul se je i Vuzem, vrnule so se i prve pričesti i ferme. No, neje to se, posle dve leti vrnul se je v cirkve i mir, šteroga je Božek donesel med nas ljude, očem reči, znova si ljudi, vjerniki, pod mešom davlejo jen drugomo „mir z tobom“, a toga ga dve leti ne bilo dok je hercuvala korona. Se bodemo to uspeli dopelati na to kak je to negda bilo jedino se pitam što bode popravlal ljude kaj bodo isti ili bar jako slični kak so negda bili? Mladi ljudi to fletneše pozabijo, ali nam starešima treba za to malo vejč cajta. Ali verjem da se bodemo i mi stareši počeli jeni z drugima pariti i jeni k drugima hodati kak je to negda bilo.
Kaj bodemo z antikorona oružjom?
Z koronom so odišle maske, covid pasoši, dezinfekcija, sakefele soponi i testi i kaj bodemo ve z tem jerbo to ve več ne nucamo. Najte me zbočki gledati dok vam bodem rekel kak smo se na maske privčili i kak so nam dobro došle dok smo šteli kaj nas ne bode nešči videl ili pak prepoznal. Ve si bode pak saki od nas naheznul svojo masko i dale bode po sveto hodal z svojim obrazom. Dok bodo oni od šterih si si posodil došli k hiži terjat penez več si ne bodeš mogel naheznuti masko i reči kak te ga ne doma i nek dojdo drugoč.
Jedino kaj bodemo mogli ponucati, a bil nam je glavni lek protiv korone, je naša domača međimorska žganica. Nesmo si preveč zbirali je li je slivna, črešjina, hruškina ili pak tropica bilo nam je glavno da je domača. Kaj naprajti? Pak ne bodemo valjda domačo žganico hitili fkrej sam zato kaj nas je korona ostajla i odišla od nas, a nese je niti pozdrajla? Pital sam doktore, oni se slažejo da još jen čas trošimo žganico kaj nej korona znova došla, prek noči, kak nam je to naprajla pred dve leti. Čuda je bole da mi bodemo cepleni ili pak vcepleni z domačom žganicom pak makar korona i ne došla. Preventiva je odnavek dobro došla!
Vuzem je pre vrati
Kak smo rekli, čim je korona pete meknula se pomalem dohaja na svoje. Vrhuli so nam se križni poti po selima-župama, vrnuli so se i gracki križni poti, pak i of na čakoskomo Jugo „Od pileka do pileka“. Za dva dni bode i nejvekši cirkveni svetek Vuzem. Pak bodo znova nedeljne jutrašnje stiske z korpicaj i cekeraj, z šunkami, jejcima, hrenom i zdiganim kolačima. Još važneše bode to kaj se mi ljudi bodemo znova zišli v cirkvama i to brez maski, z čestitkama i dobrom voljom. Sima vama, vašim družinama i pajdašima želem srečnoga Vuzma i kaj dragi Božek pomore kaj postanejo tenki, fčuhnejo topi i kaj se te Ruski rat završi. Još ga navek dosti mesta na sveto za se nas i nek se saki pretegne i šepuri na svojemo. Kuliko placa ima i nek Rusi pustijo sosede na miro. I v miro ga dosti posla za one šteri očejo delati.
