Nek se zna kuliko nas političari koštajo?!
V Korizmi, očem reči, pred Vuzem, nejvekši naš katolički svetek, i naši penzioneri dojdejo na svoje. V zadje vreme je nekak postalo normalno kaj se opčine, si gradi davlejo svojim penzičima i vuzmeneke kaj bodo i onima šteri imajo nejmenša primanja vuzmeni svetki lepši, a stol malo puneši i kredneši. Znate kak je to, ak nešči ima nejmenšo penzijo, cirka 400 ili pak 500 ojerov unda je to ne dosti kaj bi na stolo za Vuzem bilo se ono na kaj so naši ljudi navčeni. Med penzionerima ga i hajdi oni šteri ne delajo stisko v cirkvi, pak niti ne nesejo vuzmene oblizeke v korpici ili cekero na posvečaje, ali je niti jeden ne odbil vuzmenko. Dok so si penzioneri zdigli svoje vuzmenke novinari so donesli pred nas ono kaj so zazvedili dok se respituvali o tomo kuliko šteri naš načelnik opčine služi, očem reči, kuliko mo ojerov padne v žep saki mesec i kuliko nas oni koštajo? Morem vam reči da so to ne mali penezi, a ruon tak so niti posli štere oni delajo ne tak mali i ne tak prosti. Ne znam komo je to palo na pamet kaj je zračunal kuliko saki naš građanin, saki naš opčinar plača svojega (grado)načelnika ili pak (grado)načelnico. Do ve se navek prinas računalo to što bode kak veliko plačo mel ili kuliko bode zaslužil po tomo kuliko je delal i kuliko je hasna donesel gazdi ili pak onom što ga plača.
Posli sih načelnikov so isti ili pak slični, Najme kaj, nešterni več delajo, a nešterni pak meje. Nešterni imajo vekše opčine ili pak grade, a drugi pak menše. Prinas v Međimorjo je nejvekša opčina Nedelišče, očem reči, ona ima nejveč stanovnikov, a nejvekša je po teritorijo Sveti Juraj na Brego, ona ima nejveč grabi i bregov, nejveč goric i sadovjakov. Ali ne bodemo o tomo jerbo nigdar ne bodemo došli na kraj. Zazvedili smo kak imamo dve vrste načelnikov, jeni so profesionalci i zaposleni so v opčinama kak težaki, a drugi so volonteri i delajo po opčinama i za opčine odvečer, v petek i svetek, dok dojdejo z posla. Prvi dobavljajo plače, a drugi pak nagrade. I morem vam reči kak seposod to čistam dobro klapa jerbo naši ljudi jene i druge načelnike zbirajo drugi ili pak treči pot.
O tomo nišči nikaj ne pripoveda
Dobro kaj teca Franca zalukavle dok ja i moj pajdaš Jožek pišemo ova premišlavanja jerbo joj navek nekaj padne na pamet i to nekaj kaj meni zbegne. Tak je bilo i ve pak me je zapitala je li naši međimorski načelniki dobavljajo božičnice, vuzmenke, cipelarino, gablece, regresline za dopuste i dodatke za minulo delo? Morem vam reči da sam postal i nesam znal kaj reči. Još sam si nikaj ne pregruntal, a teca me zapitala je li so te si stroški štere naši načelniki dobavljajo zračunani vu ove iznose šteri so pred nami ili pak još ido kcoj? Kaj bi došel k sebi moral sam si cugnuti jenoga slivinoga frakleca jerbo brez dopinga je teško odgovoriti na sa ona pitanja štera teca Franca postavlja. Morem vam reči da brzčas načelniki i načelnice dobavljajo se te stroške jerbo ak dobavljajo si naši težaki vu fabrikama, a ruon tak i tažaki po opčinama unda dobavljajo i načelniki. A dok se to dene kcoj k ovim plačama unda je kupček penez šteri saki mesec padne v žepe naših lokalnih političarov hajdi vekši. Napriliko najbrž ne meje od jene penzije!
A zakaj jiv znova zbirajo?
Znate več kakši so novinari pak hajdi toga zvedajo, a pitajo se ono kaj bi mi šteri čitamo šteli znati, pak so tak i pitali načelnika štrigoske opčine, šteri se je kandideral za svoj peti mandat, zakaj Štrigovčanci ruon jega znova zbirajo za svojega načelnika? On je priznal kak je to zato kaj ljudi jemo verjejo, verjejo mo dok je dopolne v školi kak ravnatelj, a verjejo mo i dok odvečer drži cugle vlasti vu štrigoskoj opčini. To je tak lepo dok ljudi jeni drugima verjejo i zbirajo ga znova jerbo so se privčili na jega ,a on i se ono kaj obeča napravi ili pak proba naprajti.
Nekaj drugo vam mene gvinta, a zakaj naši ljudi zbirajo znova i one šteri sam obečuvlejo i nigdar ne napravijo ono kaj obečajo. Brzčas naši ljudi pozabijo kaj jim je bilo obečano pred štiri leti pak ve znova poslušajo se kaj bode se naprajlo pak unda dajo čoveko još jeno priliko. I tak vam to ide od izborov do izborov, a oni šteri se kandiderajo računajo na to kaj bode biračko telo pozabilo kaj je bilo pred štiri ili pak nekaj vejč let.
Tak vam je napriliko v belom Zagreb grado, tam se saki pot pred izbore počne delati novi stadion Dinama, tak je delal Bandič skorom dvajsti let, a taki ve dela i Tomek Tomaševičov. Bandič je dobavljal izbore, a Tomek bode videl drugi mesec kuliko mo ljudi verjejo. Ak dragi Božek da unda bodo jempot i Dinamovci dobili novoga stadiona.
A kaj bode z Prilokom?
Da je Prilok najbole vređeni grad v našemo Međimorjo, da ga tam ne nezaposleni nek v Prilok dohajajo delat i težaki z Čakovca i da se kaj Priločanci zaprdnejo jim jiv gradonačelnik Ljubo Kolarekov napravi. To več i vrapci po našim međimorskim i ne sam međimorskim krovima, znajo. I ne sam to, ve smo zazvedili kak Ljubo za Prilok dela zabadav, a saki pot dok dojdem v Prilok najdem ga v na gradonačelničkomo poslo. Kuliko sam mel za čuti Priločanci se skrivečki dogovarjajo, pripoveda se kak so Cirkovljančani nejglasneši, kak bi ga zmenili i zebrali nekoga drugoga, očem reči, nekšega “bolšega”, bolši ga najbrž ne, a za faleše kaj se ne bodemo spominali. Priločanci bi kruha polek pogače.
A kaj je z našim županom?
Ne zanti što je i de zmogel to plačo župana? Nebrem veruvati da naš župan ima nejmenšo plačo na našemo hataro i da so ga prestigli skorom si načelniki. Po tomo kak so naši novinari zrečunali saki od nas v Međimorjo davle za župana sam tri centa. Ak tak malo davlemo unda nebremo i nekaj preveč očekivati od jega. Pak se unda bode on dim de se pripoveda kak bode naš župan išel za čakoskoga gradonačelnika pretvoril v ogej jerbo je gracki kupček penez čuda vekši, i to duplo, od županiskoga!
Pred nami je nejvekši katolički svetek Vuzem, sima vama mojim i naši čitateljima želim srečnoga i blagoslovljenoga Vuzma uz obilje mira, zdravja, veselja i zadovoljstva vam i vašim familijama. Pazite na oblizeke na vuzmenomo stolo kaj vam ne bode preveč masnoči ostalo vu krvi, očem reči, najte pozabiti na hren i mladi luk, a tu i tam treba i premočiti.
