Kaj se dotikavle novoga župana ili pak županice nesmo nikaj spametneši jerbo se od zadji pot neje nišči novi prijavil, očem reči, kandideral. Za ve so v izborno knigo zapisana sam dva slova: Darko Zver za župana i Sandra Herman za županico tak da ve žene morejo dati glasa svojemo kandidato, a mi moški bodemo nabrž svoje dali Sandri. No, ne verjem da se ne bode još nešči spravil v trko za prazno foteljo (i to kožno) međimorskoga župana. Kak zgledi si čakajo je li se bode naš dofčerašji župan Matija Posavcov kandideral ili pak se ne bode tak kaj bi borba mogla biti malo ravnopravneša. Ne znati što se još kani kandiderati, ali smo zazvedili da naši međimorski esdepeovci ne bodo meli svojega kandidatlina nek bodo sve svoje glase dali Sandri Herman. Ruon tak so se dospomenuli i naši međimorski „seljaki“. Oni bodo drukali za Sandro i to ne sam zato kaj je ona jako fajna i fajneša od sih drugih kandidatlinov nek zato kaj je glavni međimorski „seljak“ Zoran Vidovičov na listeko skupa z Sandrom, očem reči, on bode jeni zamjenik, jena leva ili desna roka ako oni bodo zebrani. Kuliko sam mel za čuti na predstavljanjo na čakoskomo glavnomo trgo Sandra (Reformisti), Zoki (HSS) i SDP (šteri puše „svojim“ kandidatima v hrbet so dobitna kombinacija. Ak bode tak mislilo i naše preštimano međimorsko biračko telo. Malo mi je čudna i teca Franca kaj se dotikavle teh izborov za novoga župana jerbo ona ve najempot druka za Sandro, a do ovoga leta je bila protiv ženi v politiki. Tua korona je donesla jako velike promene i to ne sam v zdravičo, v medicini nek i v politiki, a kaj nem ljude i žene spominjal.
Posle čakoske gradonačelnice Ljerke Cividini kaže nam se i Sandra Hermanova kak županica. Na se zadje žene so došle i v politiko kaj je do ve bila privilegija nas moških, ali kuliko vidimo i tu bodemo mi moški odišli po riti k meši. Dok so žene v politiki bar ne bodo nam moškima delale stisko v hiži, pre usisivačo, pegli, sudopero ili pak v kuhji. Dok bodemo praha po hiži brisali mogli si bodemo popevati pesme štere bodemo šteli i nišči nam ne bode bajal. A i gemišteci bodo tekli v naše navek žene požerake bez bajanja, jamranja i režečih pogledov. Na se zadje bode zišlo da i ja bodem mel nekšega hasna od politikeo, očem reči, ženi v politiki.
Labodoritaši Hajduka so pak dobili novoga trenera. To je Hajdukovcima četrdeseti trener vu zadjih petnaest let. Kuliko sam uspel zazvediti to je svecki rekord i zapisali so ga v Ginisovo knigo rekordov tak kaj se bode znalo i ne sam kaj se bode znalo nek i kaj se ne bode pozabilo. V zadjih petnajst let Nemačka je mela sam jeno precednico Vlade, Angelo Merkel, Ameri i Francozi so spremenili po štiri precednike, a Hajduk, kak sam več rekel, četrdeset trenerov. Morem vam reči da je jako malo trenerov na sveto šteri so do ve ne bili treneri Hajduka. Novi trener Hajduka je z Litve, a zove se Valdas Dabardouskrsa. Kaj bi mo ve čovek mogel reči predi nek je počel delati, predi nek ga je Hajdukova trenerska klupa počela žuljati i Torcida na red pobirati. Nek mo naš dragi Božek da zdraviče i nek mo da snago kaj bode zdržal duže nek zadji tri skupa. Ne razmem niti ove Hajdukovce, pak ne postoji trener šteri furt pobeđuvle. I još nekaj, ako Hajdukovci očejo furt pobeđuvati, ak očejo biti nejbolši v Lepoj našoj unda morajo meti i labodoritaše šteri bodo bolši od drugih. Nebre Marko Livaja sam igrati i sam gole zabivati. Ovi v Bajerno imajo Roberta Levandovskog kaj jim furt gole zabivle, ali imajo štiri – pet labodoritašov šteri mo labode dodavlejo.
Naš i još nečiji glumac Rade Šerbeđija je štel održati koncertlina vu Vinkovcima 15. novembra, ali mo je gradonačelnik ne dal viziperta i moral je svoje gostovanje odgoditi za dvanajsti mesec. Rekel je gradonačelnik Ivica Bosančić da je ve ne ruon pravo vreme kaj bi se Rade pojavil vu Vinkovcima v tjedno dok se obilježavle obletnica Vukovara i našega Domovinskoga rata. Mam so skočili si levi novinari šteri drukajo za Šerbeđijo kak je to ne vredo i da je to omalovažavanje velikoga glumca i umetnika. Morete si sami pregruntati kak se mi v Lepoj našoj zbrčkavlemo i omalovažavlemo Rade Šerbeđijo da smo mo dali nejlepše naše otoke Brijune kaj on tam dela se kaj mo na pamet padne, kaj se on tam šepuri i brusi svojega glumačkoga i popevačkoga talenta. Nebrem to razmeti dok Rade nekaj oče v Lepoj našoj, a pazimo ga kak malo vode na šaki unda bi to za nas trebal biti zakon, a dok je naš pjevač i branitelj z Domovinskoga rata Marko Perkovič Tomson štel popevati v Areni v Puli i dok so mo ne dali (a neso ga pustili v Pulo niti den denes) unda so novinari ne skočili kak je to ne vredo nek so si počeli kritizerati Tomsonove pesme. Neje bilo tak zdavnja, pred tri leti dok so naši labodoritaši, naši Vatreni, donesli srebrno želencijo z Sveckoga labodoritaškoga prvenstva v Rusiji i dok so došli v Zagreb, de jiv je dočakalo prek 500 jezer ljudi, nešči je isključil rasglasa dok je Tomson popeval svojo nejlepšo pesmo „Lepa li si…“ Nigdar se je ne zazvedilo (makar se šepetuji i to dosti glasno) što je to napravil i što nebre čuti Tomsona i jegove domoljubne pesme. To so oni šteri još navek živijo v Jugi. Ruon tak se je još ne zazvedilo što je nacrtal svastiko na Poljudo v Splito dok so naši labodoritaši igrali protiv Italije, a od toga dneva je minulo nekaj malo meje od sedem let. Prinas se se zna, a nikaj se nebre pravzaprav zazvediti. Nega reda v Lepoj našoj.
Pitali so soseda Janeza kak so oni uspeli kaj je Dežela nejčisteša zemlja v Evropi? Otpovedal nam je Janez: dojde nam žena dvapot na tjeden i počisti nam Deželo!
Moj tretji sosed Tonča je pak v nevolama i poslal je pismo našemo korona ministro Vilijo Berošo vu šteromo ga je pital: Ve dok smo pomeknuli vuri nazaj je li bode korona napadala jeno vuro predi ili bode delalal po staromo radnomo vremeno.?Štel bi znati kaj se znam ravnati?
