[layerslider id=”6″]
Napisal je jeden američki novinar kak je on videl Lejpo našo, a bil je prinas sam mesec dni:
- Jeje jedna zemlja na Balkano, štera graniči sama z sobom:
- Tam živijo nejlepše žene na sveto, a imajo se meje i meje dece,
- Tam nezaposleni i penzioneri nejveč delajo, a na nejbolšoj zemli živijo ljudi šteri so lačni
- Tam cugi kesnijo po redo vožnje
- Tam se si žurijo na posel, a nišči ne dojde na vreme
- Tam radno vreme od osem vur traje dvanajst vur
- Tam je zdraviče zabadav, a lečenje jako čuda košta
- Tam je svecka kriza dobila državljanstvo
- Tam ratuvanje i rati nigdar ne minejo
- Tam so nejbogateši oni šteri so nigdar nikaj ne delali
- Tam ljudi svetkujejo i v cirkvo hodajo, a kunejo Božeka
- Tam nepismeni pišejo povjest
- Tam sucki procesi trajejo duže od živleja
- Tam se sam za vreme poplave zemla navodnjavle
- Tam si ne normalen ak ne ponoreš
- Tam si ričejo labodo, a pobeđuvlejo v rokometo, vaterpolo ili teniso.
Još je hajdi toga napisal, ali dok sam došel do tenisa tu sem postal. Znate zakaj? Pak smo minuli vikend mi z Lejpe naše, očem reči, naši tenisači so postali svecki prvaki. Verjem da smo si gledali Marina Čiliča, Borno Čoriča kak so sredili Francoze i to na jivi zemli, na jivomo hataro i pred jivom publikom. Na se zadje smo i mi z Lejpe naše došli na svoje. Ne moram vas zmišluvati kak so nas pred štiri mesece ruon Francozi potukli v labodoritanjo i to v Rusiji da smo šteli postati svecki prvaki. To je još ne se, kuliko pot so nas Francozi potukli i v rokometo? I tam smo se pobedili sam Francoze smo nigdar ne mogli. Kak je teca Franca rekla, saka rit dojde na šekret, pak so tak i Francozi nam naleteli i mi smo ruon jif pomeli i jim pred nosom smo odnesli nejvekšega i nejdražešega pehara na sveto. Makar ga na igrališčo bilo prek dvajsti jezer Francozov, šteri so drukali za svoje, ipak je Božek bil na našoj strani i drukal je on za nas makar ga mi kunemo navek da nam nekaj nejde onak kak smo si mi splanerali. Još nekaj sam vam štel reči, otkak je naša Međimorka i Čakovčanka, Nikolina Babič, zela vu svoje roke cugle vlasti v teniskomo savezo Lejpe naše se je genulo na bole. Dečki čuda bole igrajo i furt pobeđuvlejo. I kaj je nejglavneše niti Marin Čilič je več ne nervozen i živčani kak je to znal biti i brzčas zbogradi toga pobeđuvlemo. Nebrem zdržati kaj ne bi rekel, ali kaj god naša Nikolina prime v roke se to ide na bole i v semo nam rože cvetejo. Nikolini je vu Francuskoj pomagala i naša precednica Kolinda. Vidla je i ona da dok ona dojde drukat za naše športaše unda navek osvojimo nekšo želencijo i nigdar ne dojdemo dimo z praznimi rokami. Lepo je to, zadovolna je precednica, zadovolna je naša Nikolina, zadovolni so Igrači, zadovolni je publika štera je drukala vu Francuskoj, a zadovolni smo i mi šteri smo drukali doma pred televizijom. A dok so si zadovolni unda i pozabimo na se ono kaj nas drugda muoči. Morem vam reči dok so naši dečki igrali vu Francuskoj nišči se je ne spominal za Agrokor i Todoriča i skorom nišči je niti ne primetil kaj je „gazda“ Ivek došel vum z rešta. Znali so sam oni šteri so peneze posodili. Malo sam zglajzal, ali nejsam pozabil kaj moram čestitati našoj Nikolini i našim dečkima šterima želem kaj čim duže ostanejo na krovo sveta. Ipak je tam nejlepše, nejdale se vidi, a i jif si vidijo.
Kotač sreče ili pak nesreče počel se je obračati v drugo strano otkak je Ivek Todoričov došel dimo, očem reči, nazaj v Lejpo našo, a čuda bole se vrti otkak je Ivek došel vum z rešta. Ve se spominajo ovi šteri se v politiko i peneze razmijo čuda bole od mene, kak je pravzaprav Ivek ne nikaj kriv, kak je on ne spokral Agrokora nek so vu tem pekmezo svoje prste meli Plenki, Dalička i financ minister Zdravkec. Što bi rekel? Ve mi se je žarulica presvetila i ve znuom zakaj je tak velika sila bila kaj Daličkina kniga čim predi dojde na svetlo dneva. Pak trelo jo je resprodati predi nek Ivek dimo dojde, očem reči, kaj Daličkina istina dojde ljudima predi pred oči nek se dotepe Ivek z Londona z svojom istinom. Brzčas niti istina i pravica ne znajo na čijoj so strani. Najgerek sam, jako sam najgerek, de se bodo itak zišle te dve istine, ova Ivekova i ova druga Daličkina i Plenkijova i što jif bode odvagnul? I još mi nekaj neda spati: A de so penezi šteri falijo. Te deset , dvanajst milijardi? I je li bodo i oni došli dimo jenoga dneva kak je Ivek došel?
Pajdaš Tonča mi se pofalil kaj je jegova žena minuli tjeden preslavila četrdeset let otkak je došla k jegovi hiži za sneho. Priznal je da je on preslavil dvajstiletnico jerbo je pol cajta ne bil doma. Ali to je ne se, priznal je Tonča, dok so bili z decom pre svetešjemo obedo žena ga je pofalila i to prvič kak so četrdeset let skupa. Rekla mo je: – Znaš kaj Tonček, (ona ga tak zove dok so deca pre hiži) več si hajdi dugo gruntam, ali morem ti reči da ti imaš nejbolšo ženo na sveto!
Se bodemo pomalem dobavlali dimo. Do ve so nam nosili sam čeke i ovrhe, a ve po hižaj hodajo, tati, maserke, bokci šteri prosijijo i vatrogasci dojdo jempot na leto kaj jim platimo članarino. I to jim platimo sam kaj jif ne bodemo nucali. Ne znati je li so tati naprajli nekšo udrugo ili pak si hodajo v isto (večernjo) školo jerbo si kradejo jednako: par dni se motajo okoli hiže i unda dojdo dok ga ne nikoga doma. To tam de so mlajši ljudi pre hiži, a tam de so stareši tam se nebrejo fčakati kaj bi si odišli od hiže, pak hodajo krast dok so sam stareši doma. I unda si zemejo se kaj najdejo, iščejo zlatijav i peneze, a ak jiv stareši najdejo na deli i ak se nekaj bunijo unda jif zbijejo. Ve vidite na kaj je to došlo. Čovek mora platiti se čeke i se drugo, a ono kaj si je privredil ili pak zašparal to mo tati odnesejo. Na te peneze so plačeni si porezi i doprinosi, a ovi šteri jif odnesejo na svoj „obrt“ nikaj ne plačako jerbo je to posel na črno. Več hajdi dugo te tati hercujejo po ovomo našemo falačko zemle med dvemi vodami, a nišči jim nebre stati na kraj. Dojdo odnikod i odidejo tua de jif nišči nebre najti. Kak jif bodemo našli ak jim ne ftegnemo niti sol deti na rep?
Štel sam sam reči da moramo paziti i na te maserke štere puščamo v hiže jerbo niti jim na čeli ne piše da so poštene i da sam delajo svojega posla. Si znamo da prilika dela lopova od čoveka, dok jempot dojdo k hiži unda se kajkaj toga more pripetiti. Pazite koga puščate v hiže i kam jif puščate. I ne sam to, najte jif stavljati same i najte bukse stavljati tak kaj se vidijo. I to pune. I najte plačati ono kaj ste dužni z punom buksom. Mortik ostanete i brez bukse i brez penez, a i brez maserke. Nejso sam maserke takše i bokci negda nebrejo zdržati pak cuknejo bukso i zginejo. A dok mi dojdemo k sebi več ga ne nigdi niti bukse, a niti bokca. Negda so tati, maserke, a i bokci bili čuda pošteneši. Kaj velite?
