[layerslider id=”6″]
Još navek je prinas labodoritanje v prvomo plano, još navek se seposod mi Međimorci spominamo kak je to bilo v Rusiji, kak so dobro, lepo i spametno igrali naši labodoritaši, kak je naš sosed prek Drave, Zlatko Daličov, se to posložil i kak ve si v sveto znajo za Lejpo našo i morejo jo z prstom pokazati i to ne sam na karti sveta nek i na kugli zemaljski, očem reči, na globuso. Probajte se zmisliti kuliko pot se je vrtela na radio ili pak televiziji pesma „Nek se grize koga smeta, Hrvacka je prvcak sveta… I ne bodete veruvali, si nas poštuvlejo, si pred nami jemlejo kape i škrlake doli z glave tijam do zemle sam naši jugonostalgičari nebrejo to prežvekati. Nebrejo k sebi dojti kak je to nišči ne uspel predi restirati i kaj se ve naši labodoritaši i si šteri imajo radi Lejpo našo tak veselijo i štimajo z dečkima i z srebrnom sveckom želencijom. Dečki, saka vam čast. Naši ljudi šteri putujejo furt po sveto se falijo da kam god dojdejo seposot nam si čestitajo i poznajo naše kockaste drese, našo trobojnico, našo precednico, znajo za Modriča, Rakitiča, Perišiča, Lovrena…, Daliča. Kak je najempot svet postal mali.
V Zagrebo je našim Vatrenima popeval Tomson šteroga so si dečki dopelali. Na Jelačič placo, pred sto jezer vatrenih navijačov je spopeval pesmo „Lepa li si…“ štero so si naši labodoritaši zeli za svojo himno v Rusiji, a unda so si dečki još poželeli pesmo „Geni, geni kameni“, ali je Tomson to ne mogel spopevati jerbo je nestalo struje i to sam tam de je bil razglas zaštekani. Morete si to zamisliti, nestalo je struje, a HEP je bil glavni sponzor našim labodoritašima?
Luka Modrič je nejbolši igrač na sveto makar ima sam nekaj vejč od šezdeset kil i par centimetrov ober 170 centimetrov. Ve so, na se zadje, i naše žene priznale da je ne se vu veličini. Ovo svecko labodoritaško prvenstvo je pokazalo da i v nogometo vladajo tehničari. Ali neje sam Luka nejbolši na sveto, FIFA je predložila i našega Daliča za trenera leta tak da se zna da i trener nekaj vredi jerbo zabadav imaš dobre labodoritaše, zabadav oni jako dobro igrajo ak nemaš nikoga što bi jif posložil kaj bi se i pobjeđivalo. Jako sam najgerek kak bode to se zdržal Čiro Blaževič, trener sih trenerov, jerbo neje ruon lefko zdržati to kaj ga je nešči zamenil na večnoj listi trenerov. Si znamo da je Čiro z našim Vatrenima pred dvajsti let bil tretji na sveto, seposod smo ga falili, a i sam se je falili, kak je on nejbolši zanavek, a ve je došel nekši „šmrklivec“ i se to pokvaril. Verjem da se bode Čiro prifčil kaj bode i dale nejbolši, ali posle Daliča.
Nebremo mi v Lepoj našoj biti na miro, nebremo se veseliti i uživati kaj smo nejbolši labodoritaši na sveto nek moramo furt nekaj rovariti. Ve so nam labodoritaši vredo, ve nam je izbornik vredo, ali nam ne paše Davor Šuker kak precednik labodoritaškoga saveze tak da ve jega mejamo. Ne bi vam znal reči šteri so jegovi grehi, (osim kaj ga je Mamič postavil), kaj je on zahuzal, ali navelikom se prepoveda i pre čakoski gracki vuri kak so mo precednički dnevi odbrojeni. I to je ne se, več smo i našli što ga bode zamenil. Ne bodete veruvali, to bi moral biti z glavom i bradom, Čiro Blaževič, naš trener sih trenerov šteri je premazani sim maščama. I on i Dalič bi se morali dale brigati za naše Vatrene kaj bi oni čim duže ostali na vrho labodoritaške lojtrice da smo več došli gori. Ve nam je ne dosti kaj so naši Vatreni skorom nejbolši na sveto nek bi mi šteli kaj bi oni, črez dve leti, bili i nejbolši i v Evropi. Znate kakši smo mi več je, ve posle svecke srebrne želencije se kaj bi osvojili meje od zlatne evropske želenicje bila bi labodoritaška katastrofa, očem reči, špot-sramota. Kajpak ste si vi gruntali, ve je došlo naše vreme, ve smo mi na štiho i očemo čim duže ostati na krovu sveta i Evrope. Pak smo dosti dugo čakali.
Još je pravzaprav ne završilo labdoritaško svecko prvenstvo več je počelo Evropsko prvenstvo vu vaterpolo. Verjem da znate kak so naši vaterpolisti svecki prvaki v tem športo i da smo se si nadjali kak bi morali biti i nejbolši vu Evropi. Ali vrag nigdar ne spi i pobedili so nas Srbi, oni so postali zlatni, a mi smo dimo došli z brončanom želencijom. Nebrejo Hrvati v semo i seposod biti nejbolši, a za to so se pobrigali soci. Morete si v pamet zeti to da si je nišči ne mogel pregruntati za koga bode navijal ruski sodec dok igramo mi Hrvati z Srbima? Znajo oni šteri vedrijo i oblačijo vu sveckomo i evropskomo vaterpolo od čega muhe crkajo.
Dok smo mi feštali zbogradi srebrne labodoritaške i brončane vaterpolske želencije, dok smo mi Međimorci v Čakovco obslužavali glavno proščeje, Prcinkulovo, stiha, kak je živel i popeval, odišel nam je Oliver Dragojevič. Ve vidite kak je živleje nejvečpot nepravedno, stopram dok je hmrl Dragojevič unda smo si mi pokazali kuliko nam je on vredil i kuliko smo ga radi meli. Nebrem reči, si smo ga radi meli, jako rado smo poslušali jegove pesme teh pedeset let kuliko nam je popeval i kuliko nas je zabavlal, ali smo mo nigdar ne pokazali da nam tak čuda vredi. A ve več to nebremo poprajti. Jedino kaj moremo kaj ga nebodemo tak fletno pozabili. Mortik jega i bodemo, ali jegove pesme stoprocentno ne bodemo nigdar.
Celi minoli tjeden Čakovec je feštal. Si znajo da je čakosko Prcinkulovo nejvekša fešta v Međimorjo i to več hajdi dugo. Ruon tak se zna da čakoski fratri Prcinkulovo obslužavlejo več 359 let jerbo je unda fratre v Čakovec dopelal Mikula Zrinski Čakovečki. Čakoski turistički težaki to delajo nekaj vejč od pedeset let tak da moremo reči da so fratri čuda stareši i da so čuda duže v Čakovco i v Međimorjo od turizma. Morem vam reči da ga v Čakovco bilo sega kaj si je što poželel jedino ga ne bilo ptičjega mleka. Tak mi je teca Franca rekla. Nejveč so se ipak jeli langoši makar so ne bili nejfaleši, a nejveč se je pilo pivo jerbo se je točilo na sakomo voglo. Ne bodete veruvali, ali i oni ljudi šteri navek pijejo gemište so ve pili pivo jerbo je pol litra čuda vejč od dve deci.
Morem vam reči da je Čakovec bil pun mladih bandistov i to sake fele. Na sakomo voglo so igrali i mogli ste si zebrati pesmo štero očete poslušati. Ali ak ste si zebrali to je unda nekaj i koštalo. Kaj vam nek rečem, te mladi bandisti so dosti penez nabrali kaj znači da so lepo igrali. Obišel sam štiri-pet teh mužikašov i nudil sam 50 kuni kaj mi odigrajo jeno od Tomsona. Ne bodete veruvali, ali niti jeni so mi ne zeli peneze. Ve sam najgerek je li so ne znali ili so ne smeli?
Na čakosko proščeje je došel i negdašji precednik Vlade i negdašji prvi čovek državnoga esdepeja Zoki Milanovičov. Verjem da je ne sam tak došel i da ga je nešči pozval. A to ga je mogel pozvati sam čakoski gracki načelnik, Štef Kovačov, jerbo je on ceremonijal mešter na ovomo grackomo proščejo. Ve si nebrem nikak pregruntati je li bode Zoki zamenil Bernardiča, šteromo so več dnevi odbrojeni ili bi to šteli naši čakoski i međimorski esdepeovci? I još me nekaj gvinta: zakaj v Čakovec dohajajo sam negdašji? I došel je pred večer, kak daj se pred nekim skrival!?
