[layerslider id=”6″]
Istanbulska konvencija se je potpišuvala v Turskoj, a Turki so jo ne potpisali jerbo jive žene igrajo v drugi ligi i nebrejo nigdar, pak niti unda, jednake z moškima. Pital je pajdaš Tonča jenoga našega sabornika kaj itak piše v toj konvenciji. Otpovedal mo je kak se žene nesmejo biti i ne sam da se nesmejo biti nek se na jif niti ne sme roka zdiči, a i sa druga nasilja (bajanje, krič, mobing, ritanje…) so na črnoj listi. Tonča je ftihnul jeden kratek cajt i unda je sam jempot rekel: Pak ne muoči navek zdržati kaj ne buš toga vraga copil, mortik ne po piško, ali po gopco negda moraš. Bar negda. Dok pretira. Te spominek je bil pred tri-štiri mesece i na kaj je to došlo, Tonča je ne mogel zdržati pak je klopil svojo Mariniko, unda so policaji meli posla, a posle i socijalno tak da je Tonča odišel od hiže i preselil se je k svojemo pajdašo Imbrijo na šteroga sme roko zdiči ak mo nekaj ne paše. No, neje odišel sam, sobom je zel i svojega Štefeka, a pucko je Mariniki ostavil. Znate več kak se pre hiži kajkaj pripeti pak je tak i mali Štefek nabasal v kupaonico dok se je Tonča tušeral. To je bilo prvič kaj je Štefek videl Tončija gologa. Došel je nutri i zagledal se je v Tončijovo meštrijo, nejpredi je ostal brez reči, ali je črez jeden kratek cajt ipak pregovoril: Joj, tata, kak ti imaš velikoga pimpeka! – Neje to nikaj – otpovedal mo je Tonča – a da vidiš kakšega stopram ima mama, tak je Štefek zval Imbrija, Tončijovoga pajdaša.
Nikak se nebremo rešiti Iveka Todoriča i jegovoga Agrokora, a ne zato kaj je to jako veliko poduzeče nek zato kaj ga v tomo poduzečo jako čuda problemov. De gud pehneš, šteroga god romara otpreš vum curijo stare kosti, očem reči, stari problemi, a penez nigdi. Penezi seposod falijo tak da se z penezima šteri so ostali nebrejo zakrpati niti se lukje štere so ostale, očem reči, štere je Ivek ostavil dok je on hercuval v Agrokoro i Konzumo. Verjem da znate kak smo Iveka dopelali z Londona, Englezi so nam ga dali nek se mi žnjim muočimo, kaj je i red jerbo je (ako je je) pokral naše peneze. Iveka smo dopelali i dali smo mo kvartelja v Remetinco i to onoga nejbolšega. Ak je Ivijo Sanadero bil dober unda bode i Ivek Todoričov zadovolen. Ve mi se je vužgala moja albanska svečica z čuda kesnešim paljenjem i mam mi je bilo jasno zakaj je Martina Daličova tak na fletno pisala svojo knigo o kapitalizmo v Agrokoro i zakaj so joj morali pomagati Vladek Šeks i Drašek Plenkovičov, štela je kaj kniga dojde na svetlo dneva predi nek se Ivek Todoričov dopela z Londona. Štela je kaj mi bodemo predi čuli jeno pričo, jeno istino, a unda nam bode Ivek pre sodo povedal svojo. Kaj ne bi zišlo kak je ona, Martina, nekaj kriva ili pak nedaj Božek kaj bi i Plenki bil nekaj kriv. Kak veli moja teca Franca: tat i lopov je on šteri krade kak i oni šteri vreči držijo. A v Agrokoro hajdi milijonov, kaj ne bom rekel milijardi, fali, a to je ne mogel pokrasti jeden čovek sam (kak god on bil sposoben), očem reči, nešči mo je moral vrečo držati. Čim se je Ivek dopelal k nam v Lejpo našo, čim se je prijel za kvako „apartmana“ v Remetinco počelo se šepetujiti, i to na velikom, kak gazda Ivek ima „črno teko“ v šteroj so zapisani si šteri so mo vreče držali. Ono kaj je Dalička vu svojo knigo napisala smo vidli, a ve pak so si najgerek što bode de završil dok Ivek otpre svojo črno teko. Čim bodemo čuli što nejvečpot hoda v posjeto Iveko v rešt mam bodemo znali da so te zapisani v črno teko i da se hodajo pogajat kuliko čega i komo morajo dati kaj teka ostane zanavek zaprta i kaj se ne bode zazvedilo što je se nutri zapisani. Ili pak mortik hodajo kak z križecom kaj bi bar nešterne listeke vum strgal tak kaj nešterni „dioničari“ Agrokora šteri so sam dobičke, štere so ne zaslužili, vum nosili nej došli na svetlo dneva, a oni drugi nek dojdejo. Kuliko vidimo, na se zadje, gazda Todorič ne bode nikaj kriv jerbo i on koja za trko ima. A to je tua „črna teka“. Ak je Daličkina kniga ne donesla svetlo v Agrokor unda bode Ivekova „črna teka“? Što zna! Mortik! A mortik je odnavek bil veliki gospon!
Otkak smo dali Kinezima kaj nam bodo delali Pelješkoga mosta mam smo si žnjimi veliki pajdaši. Ve se moremo i faliti kak ga nas i Kineza prek milijardo tristo milijonov. Si znamo kakši bi to veliki kup bil da bi se si zišli na jeni mesti. Naš minister je došel v Kino kaj potpiše ugovora za most, pak so ga pitali kuliko ga nas Hrvatov? Minister je otpovedal, cirka štiri milijonov. A kinezi so mam zapitali: – Pak kaj ste ne si došli? Dok si malo bole pregruntam, dobro je kaj smo Kinezima dali toga velikoga posla jerbo jim ne bodo sfalili težaki i oni so preveč veliki kaj bi jif nešči splašil. Dok sam rekel nešči, na pameti sam mel Bosance šteri se bunijo da jim naš most bode zaklanjal sunce, a oni nečejo furt živeti v hlado. Imam pajdaš Štefa šteri furt nekaj gomba nad tem Pelješkim mostom. On je ne protiv mosta, sam veli da bi čuda bole bilo da bi delali vijadukta prek Neuma. Veli da bi te most bil krajši i faleši od ovoga šteroga smo naručili. Mortik Štef ima praf i ne znati zakaj je jega nišči ne nikaj pital?
Školarci čakoske Gimnazije i Graditeljske škole so fljučnuli v šake i počeli so čistiti smetje po zelenim placima i počeli smo farbati igrališča štera so zapuščena. I ne sam igrališča nek i moste prek Trnave. Otkak se je zdošla voda v našemo potoko prestali smo se brigati i za moste. Ak ne teče voda ne znači da ne nucamo moste? Pak nekak moramo prejti prek kanala? Za to so mosti, moste nucamo tekla Trnava ili ne. Kakši smo mi, mi bi i kanale zadrbali jerbo so skorom celo leto suhi, a unda dok padne malo vejč dežđa unda bi pak plavali. Odnavek se zna de je vodi mesto zato so mladi spametno naprajli kaj so zlišpali moste, kaj so jif malo pomladili tak kaj bodemo z voljom hodali po jima.
Grad Čakovec, očem reči, čakoski gracki oci so se počeli brigati kak bi ljude vrnuli nazaj v center grada jerbo so se ljudi razbežali po štacunima okoli centra i nikaj ne dohajajo v Čakovec. Treba nekaj zmisliti kaj ne bode centar Čakovca furt prazen, očem reči, kaj bode živnulo i nekaj drugo, a ne sam krčme i jive terase. Spametno je kaj se je to počelo sam si nekaj gruntam da je Evropa dala premalo penez ak se oče nekaj spametno naprajti. Mortik bode drugo leto poslala još nekaj jerbo 50-60 jezer ojerov bode preveč malo kaj bi se nekaj poštenoga naprajlo.
Z jene strane deca čistijo zelene place i farbajo stare moste i stara igrališča, z druge strane gracki oci očejo vrnuti Čakovčanke i Čakovčance, Međimorke i Međimorce nazaj v Čakovec, a z tretje strane čakoski gradonačelnik oče prodati Macanovo igrališče Mekdonaldso kaj bode on tam cmaril olje i pekel hamburgere i se druge burgere. A si znamo da je to igrališče tu več skorom sto let i trelo bi ga dati nazaj mladima za štere je i napravleno i oni bodo znali kaj žnjim naprajti. Ne znati kaj nam to treba kaj nam bode celi grad, očem reči, centar grada smrdel po osmojenomo oljo. Centar grada je z jene strane, a bolnica z druge i ne verjem da nam tu treba duha po presmojenomo oljo. Malo dale, cirka dvjesto metri, je prazen Merkator, pak nek se tam smodijo hamburgeri. A tam ga i dosti placa za parking. Igrališče treba tu ostati jerbo je zdravo se baviti z športom, a ne kaj nas bodo navlekli na burgere šteri spadajo v nezdravo hrano. Tak nam i doktori velijo: v zdravomo telo je i duh zdrav. A sam zdrav čovek more vleči Čakovca i Međimorje napre!
