[layerslider id=”6″]
Kaj se si bunijo protiv Lejpe naše, a v joj živijo sami poštejaki, tak bar soci velijo: Milči Bandičov je oslobođen, očem reči, neje nikaj kriv, Ivo Sanaderov, oslobođen, Tomek Horvatinčić oslobođen, Robert Ježič neje nikaj kriv, Vidošević je ne nikaj kriv, Božo Kalmeta je ne nikaj kriv, Andro Vlahušić je ne nikaj kriv, Slavek Liničov je ne nikaj kriv, Ivo Čehok je oslobođen, jedino je Zdravkec Mamičov kriv. Pak to je namešteno, to nebre biti, pak kakša je to država v šteroj sam jeden krade. Navek je bilo da jeden krade ,a drugi vrečo drži, a pre Mamičo smo našli sam onoga šteri je jemal, a nemamo onoga šteri je vrečo držal. V temaj našaj presudaj, tu i tam, padne i nekši rešt, ali peneze je još nišči ne vrnul. A Španjolci so čuda spametneši dok nekoga primejo z prstima v pekmezo: oni presodijo rešta i Messijo i Modričo i Ronaldijo, ali morajo vrnuti i peneze. I to ne male. A dok vrnejo peneze unda jim šenkajo rešta i pustijo jif kaj dale služijo peneze, očem reči, kaj i dale plačajo poreze i tak punijo državno kaso. Čuda bole nek da jif hranijo v rešto jerbo od rešta se ne živi.
Nega plači za naše brodare, očem reči, za težake v Uljaniko i Tretjemo majušo i težaki štrajkajo. Štrajkajo protiv sebe jerbo so i oni gazde vu svojimi fabrikami tak da jif bode štrajk dauko dopelal. A dok jeni štrajkajo i to oni meje leni, unda nišči nikaj ne dela tak da niti ono droptije od posla kaj jim je ostalo ne bodo zbavili kak tre i v cajto v šteromo so to obečali. I kak se unda bodo mogli deblokerati? Morete si misliti? To niti z pajserom ne bodo mogli, a čim so blokerani plače morejo sam senjati. Kak zgledi i kak je došel za ministra naš Dobrovčan, Darko Horvatov, državna je kasa zaklejena za privatna poduzeča i neje važno kuliko težakov imajo. Ili je mortik prazna, pak minister Zdravkec Maričov ne vupa otprti kaso kaj se nej zazvedilo da nutri pauki pletejo svoje mreže. Dosti dugo smo si mi šopali debelo gosko (čitaj: brodare) i to ne z malaj plačaj, a oni so sam na posel hodali, radnoga staža nabivali, a kooperanti so delali.
Bunijo se oni levi šteri so na drugoj strani nek je Plenki i jegova Vlada da je ne trelo trošiti tulikše peneze za vežbo naše Hrvacke vojske? Pak moramo i mi pokazati svoje vojničke mišiče ak to delajo sosedi Vučič, Vulin, Dačič i jiv čovek v našemo Saboro Milči Pupovac. Pokazali smo sima nek ne gledijo prek meje k nam jerbo jif bodemo dočakali kak spada ak jim nekaj takšega padne na pamet. Kuliko smo vidli sosedi morejo pozabiti mejo Virovitica – Karlovac – Karlobag štero još navek sejajo sako noč dok je pun mesec. Vežba nas je koštala cirka devet milijoni kuni, a to je čuda meje nek nas košta Uljanik. Mesečno.
Mirando Mrsič si je jako dugo premišlaval i jeno jutro dok se je stal ( ne znati kaj ili pak koga je senjal) i več dok se je podbrival, znači naspani i pre sebi, donesel je odluko da bode zafremal novo stranko – Demokrati. Oče i on negdi biti precednik, a neje se mogel fčakati kaj bi jegov partiski pajdaš Bernardič spraznil foteljo. Rekel je, v prvom redeko spomenuti, Mirando da se je esdepe tak jako skrčil kaj je tua partija premala i prevoska za jega. Dok čovek malo bole pogledne i prelista naše političke karte bode videl da na našemo političkomo nebi sam još demokrati falijo. Nesem v pamet zel je li Demokrati bodo stranka ili pak partija? A ve dok bodemo i demokrate meli unda još jedino preostaja kaj pemo iskat i demokracijo!
Nebrem veruvati da prinas v kuruzi rastejo pucke i to na pol gole. Ne sam da rastejo nek skačejo i vum z kuruze i zastavljajo splašene šofere. Ne znati je li so potrebne ili pak se nudijo i nucajo za peneze, očem reči, ne znati je li so željne, potrebne ili pak se prodavlejo. Mortik jim slabo ide v kuruzi pak hodajo vum iberštunde nabivat? Ili pak so te pucke napravlene od takšega materijala kaj jim je jempot ne dosti, pak iščejo što bode oddelav drugu smeno. Po onoj Fatinoj: dvapot je dvapot. Mortik je bole to nek da odidejo v Osterajh, Nemačko ili Irsko? Ne znati kak se tam plačajo takši posli šteri dohajajo vum z kuruze?
Ve znuom, moj sosed Tonča je rapšicer: lovi i one štere ne bi smel!
Brzčas so došla nekša ne sam teška, neg teška kak vrag, vremena. I na burzi so sfalili težaki. Verjem da se zmislite, kak smo se, več na leta, spominali kak je burza dela nejvekša fabrika v Lepoj našoj i štera se ne mora brigati za svoje režake. Ne da jif je mela dosti nek prekpreveč. A ve i jim sfalili težaki? Rekel sam teci Franci da mi to ne vleče na dobro ak ga ne težakov na burzi, a ona meni veli da je to dobro i da sam tak moremo iti napre. Nekaj si gruntam ak si težaki z burze dobijo posla unda bodo nam zviška ovi težaki šteri delajo na burzi, pak bodemo jiv morali poslati na burzo. Nebrem z toga vum, a niti teci Franci je ne ruon jasno kaj bodemo unda naprajli. Brzčas bodemo zafremali nekše ministarstvo „Spametno“ pak bodo oni rešili to zagonetko.
I plače v Lepoj našoj ido gori, pomalem, ali ido, a naši mladi i dale ido vum. Ne verjem da naši težaki morejo tak čuda zaslužiti kaj bi mogli tak dobro živeti kak tu? Ak bodo tak malo delali kak prinas? I to je još ne se: neje živleje v EU tak fal kak si mi gruntamo? Nebre tam čovek saki den biti v krčmi sam z jenom plačom. A ak još nabivle iberštunde i dela vu fušo unda ne stigne v krčmo. Nebre nikak biti vu isto vreme na dva mesta, negdi mora sfaliti. A lefko si je zrečunati kaj mo je bole? Čuda bole mo se splati da dela vu fušo jerbo unda ne ftegne potrošiti peneze, pak mo unda ostanejo, i to hajdi, za bolše zutra. Pak i prinas bi čuda vejč penez ostalo da nej hodali v krčmo. A z druge strane: kaj ti je živleje brez krčme? Kaj nem spominjal konobarice Juliko i Štefico!
Moramo navek kupuvati ono kaj je bolše i vredneše, a ne škarta! Je li je tak i v krčmi? Je li se bole napiti gemištov po 8 kuni ili pak oni po 5 kuni? Najbrž je sejeno štere gemište čovek pije jerbo se bode sikak napil. Ak pije hude gemište, očem reči , one faleše, unda posle šeste runde počasti se pajdaše za šankom i potroši se ono kaj je do unda zašparal. Drugi den vjutro zazvedi kuliko je pravzaprav potrošil, a još ga i glava boli. Najbrž je itak bole piti one bolše i dražeše gemište, meje jif se spije, isto se čovek napije, isto mo je drugi den lukja v buksi, ali ga bar glava ne boli. Davlem svojega glasa za ovo drugo: pij meje, pij bolše. A piti ili ne piti, je opče ne v pitanjo!
Stranka Spametno išče kaj bi se ovi ljudi pred bolnicom šteri 40 dni molijo protiv pobačaja vugnuli fkrej od bolnice bar 150 metrov kaj nej nikomo bili na zadevi, očem reči, kaj si ove žene štere ido na pobačaj ne bi premislile. Pak zato je i molitva kaj bi si te žene premislile. Pak ne bodo molili v Golobetki de jif nišči ne vidi? Moram reči ovima spametnima da jim je to ne ruon spametno. Po takšemo bi trelo vugnuti i krčme od potni bolničke lese! Pak kakši je to red kaj betežniki idejo iskat zdraviče k doktoro i to ido črez krčmo?
