[layerslider id=”6″]
Ne bodete veruvali, ali „zidari“ z Lejpe naše (čitaj: Živi zid) se vejč vredijo med biračkim telom. Nekaj si gruntam kak bi nam polek sih ovih nevoli štere imamo v Lepoj našoj sam to trelo kaj bi oni prijeli cugle vlasti vu svoje „zidarske“ roke. Najte me krivo razmeti, ali kak bi to bilo da bi cugle državne vlasti vu svojimi rokami držali Pernar, Sinčič, jegova žena Beličanka i cela družba Pere Kvržice. Ak bi se to pripetilo unda smo pravzaprav nekša čudna država z posebnaj potrebaj. Najme kaj, „zidari“ govorijo ono kaj biračko telo oče čuti, oni so protiv ovrhi naših ljudi jerbo, kak se pripoveda pre čakoski gracki vuri, i oni imajo zajme štere jako teško povračajo. No, neje to nejvekše zlo štero bi nam se moglo pripetiti, još vekše zlo bi nas zahačilo da cugle vlasti zemejo v roke ovi z stranke Spametno. Kak so oni prekpreveč spametni to bi bil kraj sveta za Lejpo našo. Čim so se nazvali Spametno moremo si sam gruntati kuliko vredijo. I Big Brader je z stranke Spametno. Sa je sreča da ak bi Živi zid ili pak ovi Spametno, nedaj Božek, došli na vlast to bi bil kraj za te stranke i jive političare. Najte me nikaj gledati i to čudno, probajte se sam zmisliti kak so zišli Lesarovi Laburisti. Dok jiv je Lesar vlekel fkrej od vlasti se je bilo vredo, meli so šest sabornikov i jako so dobro živeli, ali čim jim je počela dišeti izvršna vlast nejpredi so Drageca zmenili, prijeli so se za cugle vlasti i zdržali so do prvih izborov. To je bilo pred štiri – pet let, a ve se več nišči ne zmisli da so postojali. Niti Dragec neče priznati da jif je on zafremal. A Živi zid je od Drageca prepisal to kak se nova stranka „zida“ i za ve se ide dobro. Ali v lonco izvršne vlasti počelo je nekak navelikom burkati, a to znači da bi se moglo i presmoditi ono kaj se kuha ak se redovito i dobro ne meša. Dok politika, i to državna, nekoga zove neje lefko ne poslušati, ali ak nemaš školo za kuhara unda se zgubiš v političkomo lonco.
Več je pol meseca majuša minulo, a još je polovica ostala. Morem vam reči da je to jako lepi, ali i jako teški mesec. Počne z Prvim majom, z težačkim svetkom, šteroga feštamo z tajerima punim bažola. A kaj so težaki ne nikaj bole zaslužili od bažola? Čim mesec ide dale saki den se nekaj slavi, obiležavle ili pak spočitavle. Jeni slavijo Tuđmanovoga rođendana vu Velikomo Trgoviščo, drugi Titijovoga v Kumrovco, a tretji se zmislijo da je v majušo i Tito odišel k Božeko na račun. Tu je i Den oslobođenja, unda pak i Den pobjede. Posle se zmislimo za partizane šteri so vejč od 500 jezer ljudi natirali v Blajburg, a nazaj so išli po Križnomo poto tak da jif je jako malo ostalo. Kaj malo, malo vejč kak nikaj. Niti deset procentov. Neje lefko zdržati celoga majuša, a velijo da je majuš mesec zaljubljenih?
Najgerek sam, jako sam najgerek kak bode pak to zišlo ovo leto v Kumrovco? Pak bodo letale črlene petokrake okoli hižice vu šteroj se nengda narodil Jožica Brozov. Ne sam kaj hičejo črlene zvezde nek i mašejo s zastavom negdašje države. Mašejo z istom onom zastavom z šterom so četniki i jugosoldateska vudirali vu Vukovar 1991. leta. Kaj je posle bilo, kak je Vukovar zišel, a kak so Vukovarci zišli to si znamo, ali nešterni od nas još navek nedajo zrok niti črleno petokrako, a niti pak zastavo negdašje Juge.
Dugo se je plelo kolo okoli Martine Dalič, ministrice gospodarstva v Plenkijovoj Vladi, ali na se zadje so joj poruke prek mobitelov i emajli došli glave. Jako dugo je uspela držati glavo ober vode i Plenki jo je ne dal, ali to kaj so se skrivečki spominali (čitaj: dopišuvali) to je prelijalo kupico strpleja Drašeka i oporbenjakov. Čim se je to pripetilo mam so počeli spominki što bode došel na jeno mesto. Počeli so zestanki v Živomo zido, ovi Spametni ruon tak bi nekaj šteli, a neje niti ovima v Mosto ruon sejeno otkod se bode dotepel novi minister. Bernardič i esdepeovci bi šteli tu pomoči kaj dojde nešči što je jim po volji jerbo oni so nejduže i nejglobleše rovarili protiv Daličke. Kuliko sam mel za čuti i Pupovco so počele teči sline. Brez zamere, ali i on drži lojtrico vlasti i jegove roke se brojijo.
V Lepoj našoj saki den nekomo sunce presveti, a nekomo pak smrkne, očem reči, saki den se nekaj novoga pripeti. Nejpredi smo zebrali novoga šefa DORH-a, a ve bomo pak zbirali ministra, a tu je još prazna fotelja trenera Dinama. Za sakoga po nekaj tak da se nišči nebre žaliti kak ga za jega nega nikaj. Dinamo je pravi labodoritaški klub, on na leto spremeni bar tri – štiri trenere tak kaj si morejo dojti na red. Nešterni i po dva – tri pot, a ne kak ovi Englezi kaj imajo jenoga trenera i duže po dvajsti let. Tam mladi nigdar ne dobavlajo šanso.
Učitelica je spituvala Štefeka: Imaš ti Štefek rad svojo mamo? Nemam! A zakaj? Zato jerbo me bije. A imaš rad japo? Ne! A zakaj? Jerbo me i on bije. A imaš rad brata Iveka? Ne! A zakaj niti jega? I on me bije! A koga unda itak imaš rad? Dinamo! A zakaj? Jerbo on nikoga ne bije!
Hajdukovci več hajdi let nebrejo biti prvaki Lejpe naše. Več jiv je i Reka prestigla, a „Beli ftiči“ nikak da dojdejo na red. Kak je to nejvečpot v nevoli Ajdukovci i Torcidaši so počeli hodati v cirkvo. Nejpredi tu i tam nešterni i to po skrivečki, a ve jiv je če duže se vejč i vejč. Zakaj? Sam tam morejo videti čoveka v belomo (čitaj: velečasnoga) šteri zdiguvle v zrak pehara.
Monsinjor Vlado Košič je biškup v Sisko, v grado de je gradonačelnica „Teta Ikača“, mlada partizanka štera još navek pozdravlja svoje biračko telo z pozdravom „Smrt fašizmo“. Ne bodete veruvali, ali biškup Košič je uspel v tomo partizanskomo grado postajti kipa blaženomo Alojzijo Stepinco jerbo je kardinal Stepinac v jegovi biskupiji 1938. leta vodil Euharistiskoga kongresa, a v Čakovco je kardinal Stepinac vodil Euharistiskoga kongresa 1935. leta na Fratarskomo trgo i nikak nebre dobiti svojega kipa na te mesti. A si velijo da so čakoski gracki oci čuda liberalneši od „Tete Ikače“? Kaj se kardinala Stepinca dotikavle se se zna, Gestapo i Ozna so mo priznali da je on bil na strani malih ljudi, dece, ženi i nigdar je nikoga ne pital štere je nacionalnosti i da je on sima pomagal v nevoli i šinfal je vlast štera je bila protiv malih i onih šteri si nebrejo pomoči. Ali to je ne dosti kaj bi mo to i mi v Čakovco priznali. A nešterni od nas so se niti ne rodili dok je blaženi Stepinac živel, očem reči, dok so ga komunisti zaprli v hižni rešt i tam mo pomogli kaj je odišel k Božeko na račun čuda predi nek je moral.
Kuliko vidimo Serjančari šprintajo za Prilokom v semo kaj se dotikavle živlenja v grado. Prilok je več zdavnja ostavil Čakovca dauko v megli, a kak se ve se kaže brzčas bode Čakovec za kratek čas na odličnomo tretjemo mesti kaj se dotikavle gradov v Međimorjo. To je po onoj staroj pučkoj: pes je nejbolši čovekov prijatel, a žena je na odličnomo tretjemo mesti!
Zabadav se špinčijo ovi Serjančari i Priločanci kak so čuda sega lepoga i dobroga naprajli v svojimi gradi, kak so sema našli posla i još jim falijo težaki, ali Čakovčanci bodo ve, ipak, prestigli i jene i druge. Čakovec bode mel Mek Donaldsa, a ovi ga nado meli. Istina je da bode moral dati Macanovo igrališče, ali ak očejo meti tuste i debele ljude unda se športašov morajo odreči. Da ste vidli tustoga i debeloga športaša?
Pred nami je Vrbanovo. Dva tjende bode v prinas v Međimorjo teklo sam med i mleko, očem reči, naši vinari nam nudijo svoja vina štera so nejboša na ovomo poznatomo sveto. Kaj ne bodete rekli da sam vam ne rekel. Ljudi so celo leto delali, vina so tak dobra kaj bi ga i angeli pili i zato vas prosim najte se dati nagovarjati, dojdite sprobati kaj se nudi i bodete vidli da vam ne bode žal. Kaj se policajov dotikavle ne morate biti strahom i oni so pozvani! Skupa smo nejjakši!
