Izbori so minuli, jeni so veseli i zadovolni (to so oni šteri so bili pobedniki), drugi so napuhjeni i srditi (to su oni šteri so zgubili) i ve imao čistam nekaj drugo kaj nema nikše veze z izborima i politikom. Najme kaj, mi Međimorci smo se počeli drogirati (jeni, jeni), a oni drugi so počeli krasti. Ve dok nas je korona ostajla doma, dok nas je zaklenola v hiže, pelnice i kleti ostajali smo doma i postajali smo odgovorni, a čim se je to (čitaj antikorona mere) malo razhlebentalo i korona je „hejala“ mi smo genuli zdoma i to v krčme na pijanke i drogeranje ili pak po hižama krast. Veli teca Franca da mortik to jeno te isti kradejo i drogerajo se jerbo je droga malo podražila i nikak brez penez nebreš dojti do droge. Znate kak je, nega droge brez penez i nejde na kartice.
Od sih šteri so zgubili izbore nejbole so si to k srco zeli drugovi z esdepeja, kak da jim je to bilo prvič. Sejeno malo so mi čudni te SDP-eovci, zgubili so izbore v Čakovco, a Čeda Grbin je restiral županiske partiske čelnike i močnike. To da bode zgubil izbore v Čakovco je napre znal jerbo mo je to sabornik Štef Kovačov, negdašji čakoski načelnik, povedal par dni pred drugim krugom z plačnim očima. Verjem da ste ne pozabili kak je to zgledalo dok so soze levale plave oči i to pred kameraj državne televizije. Peđa je to se videl, ali je mortik Štefa ne nejbole razmel. Znate kak je to navek, nigdar pes ne laja zbog radi sela ili pak grada (Čakovca) neg zbog sebe (i gradonačelničke fotelje).
V županiji so SDP-eovci čuda huje zišli, tam jiv je Matija potukel do nogi, ali so posle (dok so se delili rezoltati izborov) dobili potprecednika Skupštine. To jim je Matija malo pomogel kaj ne bodo tak preveč črno gledali. I to vam je tak zišlo, bole da potprecednik Skupštine bode SDP-eovac makar so si to ne zaslužili neg nešči drugi. Zmislite se sam kuliko pot se je Matija svadil z dofčerašjim precednikom Županiske skupštine i prvim čovekom međimorskoga SDP-eja Mladenom Novakom v minule štiri leti dok so „puhali v isti rog“, a ve ga je nagradil dok ga je potukel na izboraj? A se to sam kaj ne bi moral nekaj (čitaj: potprecednika Skupštine) dati HDZ-ejo. Ne bi se štel mešati, ali kuliko se ja razmem v politiko ključa državne kase (još navek) držijo v svojim rokama HDZ-eovci i to bi trebalo furt meti na pameti ako kanimo od jiv nekšega hasna (čitaj: državne peneze) meti. Ne bodete veruvali, ali v tem se je i teca Franca z menom složila.
SDP-eovci so zgubili i v Zagrebo i to v kvalifikacijama (ispali so v prvomo krugo), i drug Peđa je odma respustil zagrebečko partisko udrugu, a unda se je kotač sreče počel malo fletneše obračati i strelica sreče se je obrnula prema drugovima tak da so SDP i Moremo potpisali pakt o suradnji (i to v Kumrovco) tak da bodo ve skupa drmali s Zagrebom. To je čistam normalno kaj se Moremo dotikavle jerbo kam bode suza nek na oko, ali se čudim drugovima z SDP-eja kak so oni ne znali da bodo zebrani, a još so se državne tajne službe v jivim rokama. A i drug Joža jim ej to mogel reči ili pak „šaka z Pantovčaka“!
Ali Peđa je čovek od reči, rekel je da bode respustil zagrebečke SDP-eovce makar so posle (v sucovoj nadoknadi) došli na vlast v belom Zagreb grado (precednik zagrebečke gracke skupštine je jiv Joža Klisovič) respustil je i ove drugove v Sisko, makar je teca Ikača osvojila vlast v rezrušenom grado, a ruon tak je respustil v Međimorjo Mladena i drugove makar so posle zebrani za prvoga pratitelja mistera precednika županiske skupštine. Morete vi misliti ili pak reči kaj očete, ali Čeda, očem reči, Peđa Grbin je malo pre nagel čovek, a politika je nigdar ne bila za nagle ljude.
Nesam kanil, ali moram vam reči da so SDP i Moremo potpisali sporazum kaj bodo skupa drmali i hercuvali v Zagrebo od 28 dodirni točki. Ve vidite kak so prefrigani te levi i stari političari, oni so se dospomenuli okoli jene točke i to kaj bodo skupa meli večino v zagrebečkoj skupštini, a dodali so još 27 točki kaj ne bodemo mi mislili kak so se našli i zišli sam zbog radi toga kaj bodo na vlasti i blizo gracke kase.
Ve vidite, Moremo so osvojili vlast i unda so zazvedili da nebrejo tuliko vlasti potrošiti kuliko so osvojili jerbo nemajo dosti ljudi, očem reči, nemajo dosti ljudi šteri bi držali ili pak šteri znajo držati v rokaj cugle zagrebečke vlasti. Ne znati što jim je itak unda tuliko glasi dal? Da je Trump zagrepčanec on bi rekel kak so ne pobedili glasači nego brojači!?
Najte me krivo razmeti, ali nekaj si gruntam je li bode nedelski opčinski načelnik se to zdržal kaj so mo narivali na jegova još mlada pleča. Si znamo da je on bandista šteroga smo hajdi pot čuli i vidli, si znamo da je on profesor šteri vuči naše mlade kaj si bodo igrali i popevali dok ido črez ovo naše teško (ve i koronerano) živleje. Ruon tak nam je poznato da so ga jegovi meštani zebrali za opčinskoga načelnika posle kak je stažeral kak donačelnik. I to je se ne bilo dosti nek ga je drug Peđa Grbinov zebral i za poverenika međimorskoga SDP-eja. Nebrem a kaj se nej zapital je li je to ne mortik preveč za toga mladoga, fajnoga (tak nedelske puce i žene velijo) i sposobnoga čoveka? Kak god on bil spreten i prepravleni za se te nevole(?), štere so pred jim, ali jegovi dnevi, ruon tak kak i naši, imajo sam 24 vure i teško bo to se mogel zbaviti vu tak kratkomo cajto.?!.
Pred nami je glavni den antifašizma i pak bodemo meli priliko poslušati teto Ikačo v Brezovici i Sisko kak so oni pred osemdeset let zafremali prvoga partizanskoga odreda v šesti vuri vjutro i to sam jeno vuro posle kak je Hitler napal Rusijo. To mi nikak nejda v glavo kak se je to moglo pripetiti, a denes, šest meseci posle potresa, još so ne uspeli prebrojiti kuliko hiži je potres zrušil?
