Još negda dok sam bil mali, kaj mali, jako mali, v zabavište sam hodal, stari ljudi so rekli da se čovek treba splakati dok mo je teško i dok ne zna kaj bi napravil. Rekel sam vam kak je to zdavnja bilo, a denes to ne vredi jerbo dok je bivšemo čakoskomo gradonačelniko, Štefo Kovačo, bilo teško, dok je senjal kak bode zgubil zadje izbore kaj se je na se zadje i pripetilo, očem reči, spunile so mo se senje, i jegove plave okice so spustile suzice. I to ne po skrivečki nek na glavnomo čakoskomo trgo i to pred očima svojega partiskoga šefa Peđe Grbina, EU parlamentarke Ljiljane Borzan i državne telvizije. Kak znuomo suze so mo ne pomogle, jegovo biračko telo je hitilo puške v kuruzo i zebralo Ljerko Cividini. Kuliko sam mel za čuti, čakoske puce i žene so mo ne dale svoje glase jerbo jiv libling ne cmizdri. A kuliko vidimo plave suze z plavih oči so se ne dopale niti ovim dečkima i pucama z Uskoka, pak je ve Štef moral nesti dokaze otkod so došle te plave suze i zakaj jiv je nucal!
Istoga dneva, pred tjeden dni vjutro Uskoki so došli i po našega župana Matijo Posavca. Spituvali so ga za nekših deset jezer kuni štere je jenoga lepoga dneva nešči dal nekomo, a nišči ne zna zakaj točno. Niti ja vam tu nebrem nikaj pomoči i nikaj reči kaj je tu pravzaprav v pitanjo. Niti teca Franca mi je ne znala reči zakaj je župan podnesel ostavko. Kuliko se ve kaže najbrž bode završilo po onoj (prapra)staroj; stepali so se bregi rodil se je miš. Ne znati kaj je to Uskoko trelo kaj je uznemiril nas mirne Međimorce i još mirneše Međimorke, šteri sam delamo i živimo od svojega dela, a nikaj preveč ne iščemo od politike. A deset jezer kuni zapijemo jeno večer, a pogotovo ak je naš labodoritaški klub to odvečer pobedil i ak se zide cela pajdašija, očem reči, ak i ogjogasci dojdejo.
Tri mesece je minulo otkak je naša nova gradonačelnica Ljerka Cividini, prijela cugle gracke vlasti vu svoje roke i nova gracka metla je, na se zadje, ipak počela pometati i reda delati v gracki upravi. Što bode ostal, a što bode moral oditi najgerek so si grado, a nejbole ovi v gracki upravi, ali vam morem reči da se o tomo još nikaj ne zna niti pre čakoski gracki vuri. Čim nekaj zazvedim morete biti sigurni da bodete vi to prvi znali.
Več so pomalem počele berbe grozdja po našim međimorskim goricama. Kuliko sam mel za čuti, a tak mi je i teca Franca rekla, da bode zutra i v nedelo hajdi Međimorcov, saki tretji, v goricaj. Tre pobrati i v lagve posprajti se ono kaj je Božek dal i kaj nam je suša stajla. Ovo leto ga, fala dragomo Božeko, ne bilo toče tak da bode se ono kaj je tua nevolja ne odnesla završilo v lagvima naših vinogradarov, a posle i v našim navek suhim požerakima. Veseli me to kaj se bode znova čula pesma z goric i da nam Međimorcaj niti korona nikaj nebre dok beremo grozdje i da se za te posel prepravimo kak Božek zapoveda. A kak nam to Božek zapoveda? Saki berač/beračica mora biti prepravljeni za te posel, nesme biti pod nikšim dopingom, mora se nazajtrekovati, a predi zajtreka dva fraklece domače međimorske žganice. Jeden fraklec protiv korone, ak bi ona, nedaj Božek, nosa porinula v naše gorice, a drugi fraklec za podiguvanje radne temperature. Dok so berači tak pripravleni unda je stoprocentno sigurno da bode se pobrano i to na vreme i da bodo lagvi puni. Na jutrašnjim pripremama morajo biti i putari i dečki pre gveždri i na preši. Ruon tak se zna da beračice berejo ozadi, a berači na pre jerbo ak šteri berač padne, zbog radi škliskoga terena, kaj ga beračica prime v krilo. Berba goric je takši posel kaj si morajo biti zadovolni, si od gazdi do beračici. Tak je bar do ve bilo, pak nam ne bode valjda korona zatrla te nejlepše naše običaje i šege!?
Jedno leto se je brnulo i naš dober čovek z Cirkovljana, Tonči MIkecov i jegova zaklada pak so pozvali mlade spametne ljude, očem reči, študente kaj se prijavijo vu jegovoj zakladi Zakladi Mikec kaj dobijo stipendije. Verjem da znate, ali ne bode preškodilo ak vas zmislim, Zaklada Mikec davle stipendije spametnim študentima šteri čuda znajo, a nemajo dosti penez kaj bi se mogli školati na visokim školama. Tonči Mikec več hajdi let pomaže naše spametne študente i tak pomaže kaj bodemo i mi Međimorci školani, a ne kaj se bodemo držali sam za lopate. On zna da smo ne si jednaki i da si nemamo iste uvjete i zato oče da oni šteri se očejo školati i šteri posle škole očejo pomoči Lepoj našoj i našemo malomo Međimorjo kaj bode bolše i vredneše nek se javijo. Fala gospono Tončijo i Jegovomo sino Neveno na jegovoj dobroj volji i na jegovoj pomoči za našo međimorsko spametno mladost.
Na denešji den, pred tridesti let, je oslobođeno Međimorje naše malo, naš falaček zemle med dvemi vodami. Sedamnajstoga septembra 1991. leta smo mi Međimorci z čakoske kasarne pretirali jugosoldatesko i kasarna je postala vojarna i to prva frajska v Lepoj našoj. Posle so naši dečki, naši branitelji pomogli Varaždincima i Zagorcima kaj se jugosoldateska pretira z Varaždina, a tenki i ostalo oružje, štero je bilo pod bregom pre Varaždinskim toplicama, se posle nucalo po sim bojištima Lepe naše, od Vukovara, Osjeka, Lipika, Karlovca, Gospiča, Maslenice, Škabrnje, Zadra, Drniša, pa sve do Knina i Dubrovnika, a i v Oluji i nejveč je pomoglo kaj smo se uspeli rešiti pobunjenih Srba i četnika i osloboditi Lepo našo od sih onih šteri so jo šteli priključiti Srbiji. To moramo sako leto obiležiti jerbo sam tak ne bodemo pozabili se one naše branitelje, a neje jiv bilo malo, šteri so se borili po celoj Lepoj našoj a nikak nesmemo pozabiti oni 78 herojov šteri so svoje mlade živote ugradili v našo neovisno republiko Hrvacko i tak ostvarili senje naših japeki, japici i praprapra japici šteri so senjali Lepo našo od stoletja sedmog. Trinaest stoletja je trelo kaj bodemo jo meli i ve moramo se naprajti kaj jo ne bodemo potepli.
