Zoki Milanovič je prisegel pred ljudima pred pet let za svoj prvi mandat, za svoji prvi pet let na Pantovčako i dok mo je popevala, očem reči, delala se norca z naše himne “Lepa naša”, Josipa Lisac i to je tak grdo bilo za čuti kaj je moj pajdaš, profesor na varaždinskoj Muzičkoj školi, mam ostavil posla i odišel je v penzijo. Nekak sam si gruntal, a i dosti mojih pajdašov kak nam Milanovič na ovoj drugoj inauguraciji (čitaj: prisegi) nebre naprajti vekšo spačko nek nam je napravil pred pet let. Ali to smo se mi sam nadjali jerbo vrag v Milanovičo nigdar ne spi tak da je ovo leto na inauguracijo dopelal nejstarešo partizanko v Lepoj Našoj 101-letno Spličanko, Vjero Andrijič, štera je ne zdržala, kak sam vam več i zadji pot rekel, pak se je pofalila kak so ona i jeni pajdaši sfondali fratre vu Širokomo Brego. No, to je još ne bilo se, Zoki je klapi naše Ratne mornarice “Sveti Juraj” zabranil popevati Thompsonove pesme, a posebno ovo zadjo “Ak ne znaš kaj je bilo”, a Thompson je bil branitelj i on je jeden od onih šteri je polagal kameje (Geni, geni kameni) vu fondoš Lepe Naše. I na se zadje Zoki je prisegel za precednika Lepe Naše sam pred ljudima, a ne i pred Božekom jerbo je na Ustavu držal levo roko. Morem vam reči da mo je hajdi Međimorcov i Hrvatov to zamerilo, ali sam onih z desne strane vulice. Ako je Zoki štel prisegnuti i pred Božekom unda je to moral napraviti z desnom rokom jerbo si oni šteri se spominajo z Božekom se križajo z desnom rokom, a po zadjemo popiso pred štiri leti prek osemdeset procentov građana v Lepoj Našoj je priznalo kak verje da Božek postoji. A Zoki zna kaj je moral naprajti ak oče biti i jiv precednik, a ne kaj si je Ustava podlečil pod levo roko! Levo je roko držal na Ustavo, a dok je nekaj štel naprajti kak “Šaka z Pantovčaka” unda je v zrak zdigel desno pesnicom i žnjom je vudril po stolo! Dobro on zna od čega muhe crkajo!
Čovek šteri je ne mogel biti tiho…
V zadje vreme je hajdi praha zdigel kratki film Nebojše Slijepčeviča šteri je bil kandidat za američko filmsko nagrado Oskara, a predi toga je osvojil Zlatno palmo v Canu. Film govori o oficiro agresorske JNA Tomi Buzovu šteri je dve leti bil stiha i neje niti zucnul o strahotama štere so jegovi pajdaši, skupa z četnikima, delali zločine nad Hrvatima i Lepom Našom. Dve leti je bil stiha i unda se je v cugo z šterim se je pelala z Beograda v Bar, na železničkoj postaji v Štrpcima, v Bosni, pobunil protiv četnikov šteri so pljačkali, močili i ubijale se one šteri so ne bili na jivi strani, očem reči se Muslimane i kak je na filmo pokazano Tomo je to ne mogel zmagaditi i suprostavil se je četnikima, a oni so ga ne šparali nek so ga strelili dok so ga zvlekli vum z cuga. Nišči ne zna kaj se je točno pripetilo v cugo, što je kaj komo rekel, a režiser Slijepčevič je napravil filma kakši je jemo pasal i kaj ga bode čim bole prodal. Istina Božek neje uspel dobiti Oscara, ali je bil čistam blizo. Sam vu Vukovaro ga bilo hajdi oni šteri so ni mogli biti stiha i govorili so za celo vreme dok je rat trajal. Napriliko Zdravko Vladisavljevič – Edi se je prijavil četnikima mesto brata pak so jega likviderali, Milan Turkalj – Mičo, branitelj Vukovara, je ruon tak ne mogel biti stiha i zbil se z četnikima sam kaj bi spasil ranjenoga suborca. Celo vreme borbe za Vukovar i Lepo Našo, so ne mogli biti stiha hrvatski branitelji i heroji Domovinskoga rata Blago Zadro, Marko Babič, Tomislav Merčep, Mali Jastreb, Siniša Glavaševič, dr. Juraj Njavro, dr. Vesna Bosanac i drugi, pak so ne zavredili nikšega filma? Hajdi je bilo oni, kak v Lepoj Našoj tak i v Međimorjo, šteri so doma ostajli ženo, deco i familije i odišli so vu Vukovar, Pakrac, Škabrnjo, Dalmacijo…, nigdar so ne bili stiha i nigdar so se ne vrnuli. Za hajdi jiv nišči nikaj ne zna kak i za jezere oni šteri so dali svoje živote za ovo Lepo Našo, neovisno i samostalno v šteroj se mi ve šepurimo…
Demencija je ne nikaj strašnoga. Od početka dela nekše probleme, ali se to jako fletno pozabi.
Kak bode itak završila svaja z čakoskim kirurgima?
Kaj se toga dotikavle, očem reči, kaj se dotikavle naših čakoskih kirurgov šteri so na bolovanjo, dopusto ili pak so odišli z čakoske bolnice tu vam nebrem nikaj reči jerbo se premalo razmim v doktore, a još meje v kirurgijo. Morem vam reči da se furt spominajo o šefovskim mestima i stranačkim kirurgima, a nišči je ne potegel pitanje plače pak si nekaj gruntam, a z menom se slaže i teca Franca, da so plače ne v pitanjo kaj znači da so doktori zadovoljni z plačami, ali problemi so v poslo jerbo ga v poslo nega reda. Furt se si spominajo o doktorima, o kirurgima šteri so na bolovanjo ili pak na dopusto, a nišči je niti reč ne rekel o onim kirurgima šteri furt delajo i mejajo ove šteri falijo? A morali bi jiv spomenuti, morali bi se i jima zafaliti kaj posel ide kak god to teško bilo. Tu bi mogli spomenuti i Hipokratovo zakletvo, a posebno ak je nišči ne ostal bez kirurga šteri ga je nucal. Kaj velite?
Na Interneto sam prečital: – Zadji malo ozbiljeneši prosvjed v Lepoj Našoj je bil 1573. leta. Ali je ne ruon dobro završil!
Kam itak plava Dinamov brod?
Več duže od pol leta si Dinamovi kibici, čakajo kaj se pobjede vrnejo na maksimirsko igrališče. I to čakanje počne znova posle sake utakmice štero so Dimamovci ne pobedili. Več so se zmenili tri treneri, a nikaj novoga jerbo so Dinamovci i dale na tretjemo mesti i to ne čistam sigurno jerbo jim Varaždinci furt pušejo v hrbet. Zeli so Dinamovci novoga trenera Fabia Canavara šteri je bil nejbolši igrač obrane, a ve mo v obrani furt škriple, a odnavek je on zgubil šteri je dobil vejč goli nek je zabil. Ve i Canavaro vidi da je čuda leži dobro igrati nek dober trener biti. A najbrž to vidi i Velimir Zajec: čuda je leži igrati nek voditi klub šteri ima željo kaj bi bil prvak Lepe Naše i igral v Evropi. Teca Franca veli da ak bodo Dinamovci i dale tak igrali unda ne bode niti Dinamo prvak, a niti pak Ajduk jerbo so i jeni i drugi preslabi kaj bi prestigli Reko. A navek je tak bilo, dok jenomo padne mrak na oči drugomo sunce presveti… Kuliko vidimo, Reka na to i računa. Neje lefko biti Dinamovec, Hajdukovcima je čistam lefko, oni več dvajsti let čakajo kaj bodo prvaki, pak so se privčili.
Zišla je nova kniga Velimira Zajeca i Dinamovoga prtuletja: „Kak sfondati dobroga kluba za leto dni!”
