15 C
Čakovec
Četvrtak, 28 ožujka, 2024

Zakaj Štefek na hoda na posel?

Ne bodete veruvali da je se to odišlo tijam do Brisela. Ve smo zazvedili da nam je korona ne jedina vuteska štera nam donaša nevole i štere se nebremo nikak rešiti, ve se je i Brisel zdigel na zadje noge kaj se Adventa i Božiča dotikavle. Počelo se zametati se kaj je zvezano za Božič, za maloga Jezušeka, za cirkvo… Svetoga Mikloša so poslali v penzijo, a ve hercuje med decom Mamica Mraz, a Japica Božičnjak si več od prvoga dneva Adventa  nabivle iberštunde. Kak smo dobili naputke z Brisela pak si bodemo čestitatli „se nejbolše i nejlepše za praznike“ mesto „srečen i vesel Božič“ ili pak „čestit i blagoslovlen Božič“. Se je to ne lepo i ide kontra Jezušeka, kontra Božeka i cirkve kak da v Briselo još navek hercujejo Marks, Engels i Lenjin. Naši ljudi si ovak gruntaju i premišlavlejo dva-tri dni predi nek genejo na nedelno mešo, a zgovarjajo se z koronom, a kak bode stopram to ve zgledalo dok se je i Brisel odrekel cirkve. Ali, morem vam reči, da se je još nigdar do ve ne pripetilo kaj bi nešterni nezerenoš, rotoran ili pak po štacunski ateist, odbil zeti božičnico.

Pital sam teco Franco što je itak te Deda Mraz šteri sako leto jemle posla svetomo Miklošo? Jožek, pak kaj ti to ne znaš? Pak to ti je mlajši brat svetoga Mikloša šteri je četrdesetprve odišel v partizane.

Ve vidite kakši so cajti došli kaj se dober načelnik ili pak gradonačelnik po božičnici pozna. Čim je par načelniki počelo deliti božičnice penzionerima mam so se i drugi ne dali doli, pak je ovo leto skorom saka opčina nekaj porinula v žep svojim penzičima. No, neso se božičnice jednake, idejo od nikaj (jega i toga pre škrtaj načelnikaj) pak do 200 kuni (takših načelnikov ga nejveč) se do 600 kuni v Revici. Ve se ovi v Revici štimajo kak so zebrali dobro, mlado, fajno i pravo načelnico štera je ne škrta, davle sima pak i penzičima. Ovih 200 kuni je čuda vejč od nikaj, a tripot meje od 600. Što jako šparavno troši more za 200 kuni hajdi toga kupiti, skorom isto kak of za 600 kuni šteri se gavaleri i reshitavle.

Morem vam reči da je i teca Franca dobila božičnico kaj me je ne nekak razveselilo. Nekak sam si furt gruntal kak teca ima vekšo i to čuda vekšo penzijo od ove štere imajo pravo na božičnico. Bil sam siguren da bodem nekaj herbal z tecine štonfe dok jo dragi Božek pozove k sebi na račun, ali ve vidim da to nebre bog zna kaj biti makar i ovo božičnico (kaj ne bodem i uskrsnico spominjal) dene kcoj.

Več hajdi dugo se Čakovčanci, a i Međimorci spominkujo o tomo kak bi trelo naprajti novoga Centra za odgoj i obrazovanje, šteri se negda dok je bil zafremani pred pedeset let zval Specijalna škola, ali to ime se je prestalo nucati dok je Lepa naša stala na svoje noge. Minuli tjeden se je pojavilo kakše takše svetlo na krajo tunela šteri počne v Međimorjo, a završavle v Zagrebo, v Gradeco, očem reči, v Gornjemo grado i to de drugdi nek v Saboro. Naša i esdepeova sabornica Boška Ban Vlahek si je podsukala rokave i zašilila olovko i poslala je Plenkovičo i Jandrokovičo amandman na proračun za 2022. leto  de je iskala malo vekše peneze od onih 1,5 milijokuni n kaj je Vlada ponudila za naš Centar šteroga nucamo bole nek žena zemlja vodo. Naš Centar šteri ve dela kak prvi sosed Treče čakoske pučke škole je negda napravleni za 60 – 70 dece, a ve so nutri natiskali blizo 180. Morete si pregruntati kakša je to stiska, negda nebrejo niti do zraka dojti. V stiski so deca, a bormeš so v stiski i jivi navučiteli, pedagogi, doktori… Plenki je gledal toga amandmana, gledal je Boško, par dni si je gruntal i unda je pamet prevladala i podržal je Boško. Ali dok se je glasalo o Proračuno gde so nutri bili i penezi za naš Centar unda je Boška ne zdigla roko. Sa sreča kaj jo je Plenki, očem reči, Jandrokovič ne zel v pamet jerbo bi brzčas zmenil svojo odluko. Kak bilo da bilo, hadezeovci so zdigli roke, a žnjimi i Pupovac tak da bodo penezi, po fašniko, došli v Međimorje i mogli bomo zbetonerati fondoša. Ali i to je čuda vejč od nikaj. Dok se jempot hapimo unda bodemo i završili.

Saka čast Boški, ona sako malo nekaj na štoha i dovleče nekše peneze v Čakovec, očem reči, v Međimorje. Najgerek sam, jako sam najgerek da bode itak naš sabornik Štef Kovačov dovlekel nekše peneze v Međimorje naše malo ili pak vu jegov Čakovec. Bil sam vam minuli tjeden v belom Zagreb grado malo naluknuti je li je jiv Advent ovo leto lepši i bolši od našega, pak sam se išel malo pospominati z Marijicom pre Vratima od kamena i unda sam si pregruntal da dok sam več tu idem skočim malo do Sabora i poiščem našega sabornika Štefeka. Furt mi je bilo na pameti to ak ga nikaj ne vidim v Čakovco unda je brzčas v Zagrebo. Nesmo ga zebrali za čakoskoga gradonačelnika, ali je sabornik ostal. Pokazal sam korona pasoša i dosmickal sam se do portera. Lepo sam mo rekel, na tečnomo međimorskomo, da iščem našega sabornika Štefeka. Jen čas me je gledal malo čudno, unda je zel nekšo veliko i debelo teko, listal je i nekaj iskal… Na se zadje mi je rekel kak je Štefeka ne videl duže od tri mesece. Štel mi je pravzaprav reči da Štefek ne dohaja na posel. Unda pak sam ja pital je li za neodelani posel dobavla plačo na kaj me je čovek čudno pogledal i zapital me je: A zakaj nej dobavlal plačo? Unda me je hitil v trcko, pak kak more dobiti plačo ak ne hoda na posel? Još sam bil najgerek je li ga je još takših sabornikov šteri dobavlajo plačo, a ne dohajajo. Dok sam videl kak me je pogledal neje mi moral nikaj reči, se sam razmel.Ve vidite kakšega so čoveka Čakovčanci osem let meli za gradonačelnika, a kakšega pak mi Međimorci imamo sabornika!  Rečite mi, prosim vas lepo, kaj bodemo mi z našim Štefekom?

Minuli tjeden je prinas v Čakovco bil negdašji i več pozableni precednik Lepe naše Stjepan Mesičov. Da ga ne novin, da ga ne drugih medijov ne bi niti znal da je bil prinas i da je bil v službenom posjeto. No, nebre mi nikak na pamet pasti koga je on ipak predstavljal kaj je posjet bil službeni? Od da ga je Kolinda hitila vum z Pantovača unda je postal običen čovek i to penzioner i zato sam jako najgerek koga je on tu predstavljal? Ili pak je došel na obed k starim pajdašima?

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE