Naši ljudi, naši Međimorci, biračko telo našega novoga župana se pomalem prepravla kaj bode črez mesec dni išlo znova glase davat. Istina Božek, još se neznajo si oni šteri se kanijo ponuditi za župane, ali pomalem bodo i te kosti (čitaj: te želje) došle vum z romarov. Do dneva denešjega se nam nudi jeden župan (Darko Zverov) i jedna županica (Sandra Herman) i to djevojčica Anka, a i k tomo Beličanka. To je čuda premalo i za of falaček zemle med dvemi vodami. Tre biti strpliven jerbo se drugi župani i županice imajo čas prijaviti do Martinja. Nejpredi se prijaviš i unda odideš na krštenje mošta kaj se malo okrepiš i kaj k sebi dojdeš predi nek geneš v predizborno kampanjo. Čital sam prošlotjedno anketo v ovim našim črlenim novinama i nesam nikaj zazvedil koga naši ljudi, naši Međimorci i Međimorke kanijo zebrati, očem reči, komo kanijo svoje glase dati? Neso nikaj točno rekli, niti moški, a niti ženske, komo bodo svoje dali samo velijo da nečejo kaj bi znova HDZ došel na vlast. Pitam vas pitam, pak da je to bil prinas v Međimorjo HDZ na vlasti? Da je bil? Nigdar! A ve očemo kaj niti ve nej bil. Si drugi so probali dotirati Međimorje naše malo v red i to brez HDZ-a, ali so ne uspeli, a ve mi napre povedamo kak ne bodemo svoje glase dali kaj HDZ-e nej znova došel na vlast. Nekaj tu ne razmem. Zakaj mi Međimorci situacijo štera je v državi, vu Vladi, v Saboro pretačemo na of naš falaček zemle. Dok hodamo glase davat za naše lokalne močnike, za naše lokalne političare unda motramo zebrati nejbolše, makar ga jiv ne čuda i nek nas oni vodijo i nek nam oni krojijo političko kapo bez obzira na to v kakšemo dreso igrajo, očem reči, v kakšemo god so dreso došli na izbore. I naši lokalni močniki se morajo nasloniti na našo državno Vlado, na naše ministre šteri imajo peneze i šteri morajo i našo županijo, naše grade i naše opčine pomagati. Bez državni penez, bez penez z EU bodemo teško naprajli se ono kaj bi šteli, očem reči, kaj bi nucali. Dok se mi, točneše rečeno, naši političari svadijo z HDZ-ovcima unda penezi s državne kase odhajajo onima šteri so si zdobra z Vladom, ministrima i sabornikima. Morem vam reči da smo mi Međimorci preveč preštimani, navek nam je teško hoditi v Zabreb ministrima štečit peneze. Nama je teško, a si drugi hodajo. Teško nam je bilo iti dok so bili hadezeovci na vlasti, teško nam je bilo dok so bili esdepeovci na vlasti, teško nam je bilo dok so bili narodnjaki, Mostovci, Živi zid, a ve so znova hadezeovci i pak nam je teško. Još se je ne narodil što bi nam Međimorcaj ugodil. Verjem da se zmislite kak je Štef Kovačov osem let bil čakoski gracki načelnik i niti kune penez je ne dovlekel iz Zagreba, a još meje z Brisela, a za to vreme so Dražen Srpakov i Ljubo Kolarekov izgradili celo Središče na Muri i celoga Priloka. A mi v Čakovco i v Međimorjo još cendramo i borimo se z rokami i nogami kaj nam hadeze ne bo došel na vlast? Ne gruntam si i ne pripovedam da so hadezeovci cvetje, ali oni imajo peneze, a što ima peneze te vlada z svertom, pak tak unda i z Međimorjom. To jedino mi ne razmimo!
Kuliko sam mel priliko čuti i čitati prinas so si protiv HDZ-a, osim onih šteri imajo hadezeove članske knigice. Prinas nejbolšo ceno imajo SDP-ovci makar jiv je se meje i meje. Več sam tu parpot rekel, da je SDP-e držal cugle vlasti od 1991.do denes mi i Lejpa naša bi bili još v Jugi. Najte me nikaj čudno gledati, 25. junjuša 1991. leta dok je Hrvatski sabor donosil odluko kaj se mi Hrvati otcepimo od Juge unda je od 49 esdepeovih sabornikov jiv 48 odišlo vum z sabornice sam kaj nej morali zdiči roko kontra voljene Juge. Sa je sreča kaj je ostalih: hadezeovcov, seljakov, liberalov, narodnjakov bilo dosti pak smo zafremali fondoša Lepoj našoj. Ali to je ne nikaj, esdepeovci još den denes nebrejo zabiti Jugo i Jožeka (ne mene nego ljubičico belo) sam se ve zovejo antifašisti, kaj god to značilo jerbo ga fašistov več hajdi dugo ne. Ak ne računamo ove šteri nam dohajajo z istoka, očem reči, prek Dunava.
Evo, napriliko, Prilok se je prepravljal celo ovo koronirano leto i ve bode počel delati severno zaobilaznico, očem reči, cesto okoli Priloka kaj ne bode v grado stiska i prestigel je z tom cestom i Čakovca, šteri je napravil pol zaobilaznice i ve čaka kaj mo znova presveti hadezeovo sunce, a Nedeliščanci so negdi odišli po riti kmeši z svojo zaobuilaznicom, a več so se meli v rokaj. Mortik i jim smeta hadeze, ali bi jiv još bole trebalo smetati to kaj nemajo zaobilaznico, a nucajo jo kak ovi zmržjeni sonce.
Moj tretji vtni sosed Tonča je protiv novih i sih drugih izborov. On si je jempot zebral svojo felešego de so mo malo i pajdaši pomogli i veli da je jemo dosti izborov i on bi izbore ukinol i to tak kaj bi nam novoga župana mogel i moral zebrati Đelo Hadžiselimovič.
Kak leto ide krajo tak naši gospodarstveniki, točneše rečeno naša gospodarska komora (fala dragomo Božeko kaj je i od nje nekši hasen je ak jo več plačamo) zbira fabrike i poduzeča štera so bila nejbolša vu minulomo leto. Ve pred par dni smo zazvedili štera so to poduzeča bila nejbolša vu minulomo 2020. leti jerbo znate kak se još navek korona šepuri po ovomo našemo sveto unda se kesni. Kak je kesnila Olimpijada v Tokijo, Evropsko prvenstvo v labodoritanju tak je i naša gospodarska komora zebrala nejbolša poduzeča z malo vekšim kešnjenjem. Nebrem nikaj gombati, bar bog kaj so jiv zebrali. Nejbolša med velikim poduzečima je bila Vajda, naši mesari i drugi težaki so zaslužni za to priznanje, tak je bar rekel jiv direktor ili pak menedžer (kak sam to spametno rekel) Alen Kajmovič. Med sredjim poduzečima je splaval Toni Marodi z Doljnjega Kraljevca šteri več na leta (i to jako dobro) vedri i oblači po Doljnjemo Međimorjo, a i širje. Nejbolše malo poduzeče je Cromatic z Priloka, šteri so si to priznanje več zdavnja zaslužili, a ve so došli na red. Niti korona jim je ne mogla nikaj naškoditi. To so prave fabrike.
Nekaj sam si gruntal kakši so to ovi v Komori kaj so ne niti spomenuli nejbolše poduzeče v našemo malomo Međimorjo, poduzeče štero dela kak vurica i brez jega nišči od nas (i to ne sam v Međimorjo) nebre niti jeden den. Potrefili ste, to so naše Međimorske vode. To je prava fabrika štera ima upravno zgrado v centro Čakovca od šest katov tak da pol radnoga vremena težaki jedni druge iščejo ak slučajno ,šteroga nucajo, a ne javla se na telefon. I ne sam to, naše Međimorske vode imajo svojega pogona, očem reči, skladište za mehanizacijo v jenoj jako lepoj zgradi polek čakoske južne obilaznice. Ono kaj ve vi očete mene pitati to bodem ja pital vas: otkod vodovodačima penezi kaj so se to kupil i kaj još živijo kak bubreg v lojo? Poglednite si, još navek plačamo na sim računima 2-3 kune za razvoj vodovoda v Međimorjo, a si Međimorci, več hajdi dugo imajo vodovode, a mesto kaj bi cevi mejali štere so več stare i zmočene oni kupuvlejo velike hiže, štere niti, denimo roko na srce i priznajmo, ne nucajo. Ako imajo tak čuda penez, a vidi se da imajo, unda si mi Međimorci, a i naša poduzeča plačajo pre drago vodo. Si znamo da nam dragi Božek pošilja vodo z neba i da ona nikaj ne košta, ali ona štera prejde črez vodomjere Međimorskih vodi je draga kak sam vrag!
