Tak vam to zide, dok se nekaj ne napravi na vreme unda tre iti na popravni. Ono biračko telo štero je svoje glase resteplo na vejč kandidatlinov mora iti znova i to ve dok je kniga spala na dva slova. Kaj si nej vi nekaj gruntali da so sam Čakovčanke i Čakovčanci bukterali v prvomo krugo i morajo iti znova glase davat, ne takših ga glasačov hajdi v Lepoj našoj. Verjem da ste čuli i da znate kak je biračko telo v štiri naše nejvekše grade (Zagreb, Osijek, Rijeka, Split) ruon tak dugo premišlavalo i na se zadje mora iti još jempot kaj zbere onoga šteri bode žnjimi gospodaril i šteri bo jim „pamet solil“ v ove prve štiri leti štere so pred nami.
Si mi smo nejbole najgerek što bode itak nasledil pokojnoga zadjega zagrebečkoga grackoga načelnika Milana Bandiča jerbo znuomo da je glavni grad Lepe naše skorom pol države, a i takši so penezi v grackoj kasi. Zagrebečki purgeri si ve več dva tjedne gruntajo i to tak kaj švicajo, ne sam po dnevo nek i po noči, komo bodo dali vroke to svojo gracko kaso v štero se, črez leto dni, nazobači prek šest milijardi kuni. Ne bi vam znal reči kuliko je to penez šest milijardi jerbo sam još nigdar v svojeme živlejo ne mel v roki jeno milijardo, a ne kaj bi mel šest. Verjem da to mora biti jako čuda da se zagrebečki purgeri jako cukajo što bode itak nosil v žepo ključa od gracke kase i gospodaril z milijardama?
V belom Zagreb grado so ostali na „bojnomo poljo“ dva igrači i to Tomek Tomaševičov, šteri se fali da more gospodariti s Zagrebom bole nek je to „vječni“ gradonačelnik Bandič delal i Mirek Škoro, šteri se fali da zna kak se to dela. I ne sam kak se trošijo penezi neg i kak se služijo. Biračko telo je na redo kaj reče komo verje i koga oče kaj ga bode vodil ili za nos vlekel v novomo mandatlino.
Pripovedajo oni šteri nejveč znajo, a znova jiv morete najti pre čakoski gracki vuri, kak zdrav Zagrepčanec ima sto sakefele želji, a betežen sam jeno, a tua je kaj bi Škoro v nedelo pobedil. Istina Božek, Tomek je v prvomo krugo dobil štiri pot vejč glasov od Mireka, ali drugi krug je nova utakmica, ali sam dva igrači, isto igrališče, isti soci, ali sejeno so si najgerek kakši bode rezultat?? Kakši bode rezultat to bode rešila publika (čitaj: birači). To je jedina utakmica de publika odlučivle kakši bode rezultat.
Neje to bilo tak zdavnja dok smo zbirali precednika Lepe naše posle prvoga precednika Franceka Tuđmana 2000. leta, dok so „Kukurikači“ došli na vlast. V drugi krug smo zebrali Dražena Budišo, liberala i „Kukurikača“, šteri je v prvomo krugo mel čuda vejč glasov (kak i ve Tomek), ali so se za dva tjedne esdepeovci premislili pak so ne v drugomo krugo svoje glase dali svojemo „Kukurikačo“ nek so prešli na drugo strano i tak je bil zebrani kosmati Stipe Mesičov, šteroga smo se unda deset let ne mogli rešiti. Nigdar se ne zna de i kak dugo vrag spi!
No, nek Zagrepčanci rešavlejo svoje probleme, a mi Međimorci (Šenkovčari, Prislavčari, Kotoripčani i „građevine“ z Doljnje Dobrave) i Čakovčanci morajo znova zašiliti olovke i zebrati nejbolše, očem reči, jenoga ili jeno od onih šteri se nudijo jerbo nejbolši so se niti ne prijavili na izbore. Prinas, na ovomo našemo „falačko“ je nejbole napeto v Čakovco de je na igrališčo ostala fajna Ljerka Cividini i jena „slatka“ doktorica Marina Gradišer, štere se borijo za svoj prvi mandat, a na drugoj strani so Štef Kovačov i Zoran Zoki Vidovičov, šteri čakajo na svoje tretje mandate. Pred Čakovčankama i Čakovčancima je jako važna i odgovorna nedela. Ve vidite, v nedelo dok bo se slavil Den državnosti Čakovec bode dobil novo(ga) gradonačelnico(ka). Dosta je bilo peršeciji po ovomo našemo Čakovco vu ove zadje dva tjedne, dohajali so denešji precedniki (države i stranki), a i negdašji, ali je saki drukal za svoje tak da so, na se zadje, loptico hitili na ono strano mreže de je biračko telo, štero ionak več hajdi dugo švica i čoše se po glavi. Rekla je teca Franca: ne razmem kaj si tuliko gruntajo, kaj švicajo, koga god bodo zebrali posle jim bode žal!
Mora se priznati da so of tjeden nejveč posla v predizbornoj kampanji oddelale kosilice naših komunalcov z Čakoma. Predi prvoga kruga izborov so ne pokosili travo, štera po ovomo majskomo dežđo i sunco raste kak i glive posle dežđa, pak je još važeči (par dni) gradonačelnik naredil kaj se trava dotira v red i cvetje posadi. Komunalci delajo tak kaj so šmrkljivi, delajo po cele dneve i iberštunde si nabivlejo, delajo vu svetek i petek i oni šteri so naručili košnjo se nadjajo da jiv bode biračko telo prepoznalo i da bode biračka olovka delala kružiča okoli jivoga imena i prezimena. Teca Franca je rekla: nekak to ne razmem kak bi to cvetje i trava mogli pobediti na izboraj? No, teca Franca je malo stareša (ne tak kak Manolič, ali neje niti jako dauko) i zna da se negda ne hodalo v snoboke z cvetjom nek z belim kruhom, frugom (mesa z tiblice) i fraklecom žganice.
Nesam veruval da je tua predizborna kampanja za čakoskoga načelnika tak teška kaj se je Štef Kovačov moral resplakati pred novinaraj. Ne znati je li je to zato kaj je več pre krajo z snagom ili pak je mortik senjal kaj so ovi nedeljni izbori ne prešli onak kak se je on nadjal i kak je na političkoj kladionici na odličnomo drugomo mesti. Si znuomo da se je on nadjal da bode jahal na belomo kojo posle prvoga kruga, ali so se v igro vpleli nekši novi igrači, a (najbrž zbog radi korone) je na utakmico došlo čuda meje publike (čitaj: biračov) i glasi so se restepli, sakomo nekaj i Štefeko je sfalilo. Kuliko čujemo v zadjih par dni od naših stožerov (državnoga i ovoga našega međimorskoga) korona je ove dneve odišla na produženi vikend tak da bode biračko telo moglo malo leži dihati i moglo iti glase davat sam ak ima voljo. Na korono se več nebremo zgovarjati.
Pre čakoski gracki vuri sam spituval Čakovčanke i Čakovčance kaj bi oni rajši: gradonačelnico ili znova gradonačelnika? Morem vam reči da sam nikaj ne spametneši jerbo je saki držal svojo strano, očem reči, puce i žene so bile za gradonačelnika, a dečki i moži za gradonačelnico. I ve nek ja bodem spameten??
Čakovec je na prvaj izboraj (1993.) zebral gradonačelnico, a posle so sedem mandatov moški za sebe zeli, najbrž bi bil red da v osmomo mandato pak bode gradonačelnica!!? Što je to rekel? Kaj što? Zajec!
