Posle maloga dečjega rotora pre cirkvi na čakoskomo Jugo dela se i rotor v Buzovco i to v Preloški vulici, a si znamo da je Preloška vulica nejdukša vulica ne sam na Jugo nek i v celomo Čakovco, očem reči, glavna čakoska vulica. Rotor se dela na raskrižjo Preloške vulice, Buzovečke i vulice Tomaša Goričanca. Ne bi se štel mešati je li tu tre naprajti rotora, ali sam jako najgerek da bode itak te rotor gotov? Preloška vulica je na pol zaprta tak da auti morejo iti malo tua, a malo nazaj, ali na gradilišto nebrem pod milim Božekom videti niti jenoga težaka. Istina Božek denes je teško najti težake, a još teži dobre težake, ali ak se ne bode nikaj delalo unda nigdar niti rotor ne bode nigdar gotov. Ne verjem ruon da težaki delajo sam unda dok jiv ja ne kontroleram, ne verjem da se skrivlejo pred menom pak kaj se bodo skrivali pred menom, pak jiv ja ne plačam?
Zazvedil sam na Fejsbok stranici: – Pravzaprav vam morem reči da mi je ne nikši kunšt oditi na posel, ali čakati i skrivati se osem vur kaj se morem vrnuti dimo to mi je strašno naporno!
Imajo i Hajdukovci konja za trko
Si znamo da so Hajdukovci kanili dojti v Evropo prek Španjolcov, prek Vilareala, ali so odišli po riti k meši, očem reči, zgubili so i v Španjolskoj i v Splito. Neje da so Hajdukovci igrali slabo, ali so Španjolci bili čuda, čuda bolši i zabili so čuda vejč golov. Posle utakmice v Splito i trener Vilareala je pofalil Hajdukovce kak so dobri i povedal je koga bi si on zel od Hajdukovci da bi mogel. Priznal je: – Zel bi si publiko!
Hajdukovcima i Torcidi je jako malo tre za veselje i fešto, čistam dosti jim je kaj Dinamovci zgubijo!
Pita navučitelica Duju: – Za koga navijaš? – Za Ajduka, kak je i red, priznal je mali Duje. – A za koga od klubov v Evropi? – Pak za Dinamo!!
Kuliko denes košta potrošačka korpica?
Teca Franca mi je mam otpovedala da to točno nišči nebre znati jerbo je ne znati kuliko sega bode što nametal v korpico? Rečite mi, prosim vas lepo, kak ja nek teci pojasnim da v te potrošačke korpice si jednako mečejo, očem reči, seposod so te korpice jednako pune ili pak jednako prazne. Najgerek sam i spituvlem sebe i vas kuliko pravzaprav denes košta živleje pod suncem ovim Božekovim ak zraka ne računamo. Znuomo da se se cene smickajo pomalem prema gori, kak na pijaco, tak na semo, a bormeš i po štacunima. Kaj god deneš v korpico na kasi ti zaračunajo vječ nek si kanil potrošiti, a ne tak retko i vejč nek imaš. Ne znati kak dugo bodemo itak zdržali kaj bodemo se to plačati kaj se od nas išče i kak dugo bodemo mogli zdržati se te šokove štere saki den preživljavlemo. Ne bi vam znal reči je li so se poštari tak poprajli vu svojim poslima, ali čeki dohajajo tak gosto kaj jeden drugoga dostigavle. I ne sam to, čeki so saki den se vekši i vekši, kaj nem rekel se debleši i debleši. Ve dok so plinači, strujači i vodači došli z urlaba kak da so zgubili sako mero, očem reči, kak da so jim naši Dalmoši na debeloj vodi vum z žepa zvlekli se penez, pak ve očejo od nas, šteri smo bili doma, zvleči čim vejč penez kaj si se namirijo kaj so potrošili i kaj još jene peneze zaslužijo jerbo tre prepravljati peneze za zimo štera nam je včasi pred vrati. Doživeli smo strujni šok, plinski šok, vodeni šok, o nafti i benzino se nemo niti spominali jerbo so nas oni šokerali več pred 3 – 4 mesece. Ve još čakamo čeke od komunalcov, a kuliko smo meli za čuti oni se več dugo prepravlajo kaj nam bodo zdigli cene jerbo ne bodo oni, najbrž, nejhujši. Znate kak je to, što zadji zdigne cene te nebre računati na peneze jerbo našim penzionerima so ne zrasle penzije makar je država, prek plinači, platila pol milijarde na penzionerski račun. Kaj vam morem reči, najgerek sam, jako sam najgerek kak bodemo itak dugo zdržali mi šteri plačamo? I ne sam to, žmičemo se čega god se primemo, frižideri so nam se prazneši (i ne sam frižideri nek i tajeri), remene steguvlemo, gemište sejamo, a vodo, i to z pipe, pijemo i još navek ne znamo je li bodemo meli dosti dok mrzleši dnevi dojdejo? A znate kaj nas čeka dok bode mrzleše? Plina mortik ne bode dosti za se, ali čeki bodo furt dohajali. Država sebe mora namiriti, a kaj jiv brige za nas. Nešči (čitaj: potrošači) mora platiti ono milijardo kaj so ovi zamračil. Pak ne bode valjda država na gubičko. Tak se bodo najbrž političari mesto dospomenuli. Pak zato smo jiv zebrali.
Fčera vjutro sam se raneše stal i odidem ravno do frižidera i otprem ga… mam sam se na Remetinec zmislil… vu frižidero sam rešetke i žarolja…
Kaj nam bodo gorice donesle?
Velika meša je minula i več smo v septembro. Berbe sam kaj so ne hapile. Kam god se čovek obrne (polja, sadovnjaki, gorice…) seposod je sega meje zraslo. Dežđ je prekesno opal i suša je svoje odnesla. Kalmperači več jafčejo, em ga meje kalampera v zemlji, em je drobneši tak da znamo da bode dražeši jerbo morajo i seljaki, očem reči, poljoprivredniki od nečega živeti. Ne znati što bode pajceke i svije hranil ve dok ga meje kuruze i dok je duplo dražeša? Naluknul sam se malo i v gorice. Grozdje je lepo, za ve ga ne preveč betegi jerbo so naši vinari maheri i saki čas špricajo protiv betega šteri je došel i protiv onoga šteri se ravna kaj bi došel. I v goricaj je suša svoje odnesla, ali fala dragomo Božeko kaj si naši vinari imajo vodovoda pak bodo nabrali grozdja kuliko je Božek dal, a vina bodo meli kuliko lagvi imajo. Sa je sreča kaj i mi meje pijemo jerbo policaji laufaju po sim cestam z frulicaj v žepo tak da se žnjimi ne muoči igrati. Još je nišči ne uspel to pojasniti kak to da se i ve dok se meje pije spije se vino kaj naši vinari imajo. Znuom, teško je iti polek tak dobrih vina i trezen ostati, a na se zadje dojde do toga kaj se lagvi spraznijo, a policaji ostanejo sami z suhim frulicama. Se je dobro dok se dobro završi i dok se nikaj hudoga ne pripeti. No, v zadje vreme se nebremo ruon z tem pofaliti jerbo malo, malo pak so sprevodi posle sudari na cesti, a dosti pot, kaj nem rekel navek, so krivi maligani.
Nauk z prve roke
Čuda je bole biti v četroj liniji v INA plino nek med prvi jedanaest v Realo. Vejč zaslužiš!
