Kaj vam nek rečem, nekaj mi je ipak jako čudno v toj Lepoj našoj. Dok Uskok, DORH ili pak soci, bilo opčinski, županijski, državni, Ustavni, Trgovački ili pak Vrhovni zemejo pod svoje (čitaj: na zob) Hadezeovce navek delajo onak kak bog zapoveda i čistam je normalno, da na se zadje, dojde na to kaj so Hadezeovci lopovi, da kradejo i unda je čistam normalno da završijo v rešto. Nekaj so v rešto predi nek se zazvedi da so lopovi, a nekaj posle dok vrnejo peneze štere so nazobačili tam de so ne sejali i šteri so jiv nikak ne pripadali. Do problemov dohaja dok so tati i lopovi z drugih partiji oliti stranki. Unda Uskoki ili pak soci prekoračijo svoje ovlasti jerbo se nikak nebre pripetiti i nikak je ne mogoče da bi v Lepoj našoj nešči drugi bil lopov, a da je ne z Hadezeja. Sam so Hadezeovci lopovi, a si drugi so poštejaki, kaj bi rekli poštejak do poštejaka. Dok jim se ne pokaže nekša prilika. V našem lepom, očem reči, fajnom grado Čakovco je nigdar ne bil na vlasti Hadeze, a ve je zišlo vum da se je i tu kralo!? Negda vejč, a negda meje. Nekaj so znali sam oni šteri so vreče držali i oni šteri so nutri metali, a nekaj so znali i oni v Uskoko, ali so ne šteli nikomo reči kaj se nej zazvedilo. A zakaj so nikomo ne rekli to niti dragi Božek ne zna. Več smo par pot rekli kak prilika dela tata (čitaj: lopova) od čoveka i lefko je biti poštejak ak čovek nema priliko zglajzati. Tak je to v sakoj partiji, v sakoj stranki kakše god boje majce ili pariske knigice imajo. Da se razmimo. Morem vam reči ida se i teca Franca slaže z menom kaj se v zadje vreme jako retko pripeti.
Poglednite napriliko Čača (čitaj: Ivo Sanaderov) je odišel z Hadezeja 2009.leta dok je zbog svojih ne malih grehov moral ostajti kožno foteljo precednika Vlade v Lepoj našoj. Ne znam ruon, očem reči, nesam do kraja vpučeni je li se je i pravzaprav ispisal z nejjakše stranke ili ne, ali je stoprocentno članarino ne plačal dok je bil po reštima v Lepoj našoj ili pak Osterajho. Makar je več duže od deset let ne plačal članarino, a si znamo da je on šteri ne plača članarino i ne član stranke, dok so nejvišeši soci rekli kak je Ivo tat i lopov i da mora iti v rešt, ali i da mora vrnuti se naše, očem reči, državne peneze štere si je privatizeral, a neso mo pripadali, mam so skočili esdepeovci, reformisti, suverenisti, laburidti, narodnjaki šteri so več na izdisajo, mostači, seljaki i ovi kaj morejo ili pak mislijo da morejo i složili so se si kak jeden: ak je Ivo tat, a jeje jerbo so tak i soci rekli i na paper napisali (črno na belo), unda so i si hadezeovci tati, a HDZ je kriminalna stranka. Na drugoj strani, tu polek nas imamo i domačega grešnika šteroga so Uskoki ruon tak pretepli i šteri je priznal vejč nek so ga pitali, našega dofčerašjega čakoskoga grackoga načelnika i esdepeovca Štefa Kovača šteri je još sabornik na državnim jaslama i na državnomo kruho, ali je nišči ne zbog radi jega ne rekel da je on esdepeovec i da so po tomo esdeepeovci ruon tak tati i lopovi. A neje nikša tajna da je Štef još navek v partiji i kak član partije hoda v Sabor i saki mesec si tam podiže plačo. Zaslužil jo ili pak ne. Ne znati je li si jo je zaslužil jerbo se je ovo leto,štero ide svojemo krajo pomalem, ali sigurno, još niti jempot ne javil za reč! A kaj bo se javljal ak je zadovolen z sem kaj je tam rečeno, a nejbole z plačom!?
Pomalem dohaja den da bodemo znova morali iti glase davat kaj si zberemo novoga župana, kaj popunimo županovo foteljo štero je Matek Posavcov naglo, onak prek noči, spraznil. Čim smo bliže tomo dnevo pomalem so se počeli, i to naglas, javljati oni političari šteri bi šteli biti župani. Morem vam reči da me je zatekel Darkec Zverov šteri se je prvi javil kak bi on štel biti župan ruon tak kak se je još v zimi javil da bi štel, na prtuletje, biti čakoski gracki načelnik. Veli teca Franca, pak kaj se te čovek vu se razme? Nejpredi je štel biti gracki načelnik, a ve je precednik čakoskoga grackoga veča jerbo je dale ne došel. Biračko telo ga je ipak porinolo vu jeno od čakoskih grackih fotelji. On se v se razme tak da ga bodemo brzčas mogli najti kak precednika labodoritaškoga kluba, precednika ogjogascov, ribičov, a morti i nekše druge udruge de se bode spraznilo mesto. Malo je tak vum sposobnih šteri se v se razmejo. Nekaj još moram reči: dok sam poslušal jegovo kandidaturo, jegov govor dok smo zazvedili da bi nam on štel biti župan mam mi je na pamet pal zagrebečki gracki načelnik Tomislav Tomaševič jerbo je govor bil takši kak da si je od jega prepisal. Kak gud steška, ali moram vam reči da je jako malo tak sposobnih i univerzalnih političarov kak so Tomaševič i Zver. No, Tomaševič več vidi da je čistam drugo biti gradonačelnik i to je čuda teži nek prdekovati o tomo kak nišči (čitaj: Bandič) v Zagrebo nikaj ne dela, kak je Zagreb zmazani i zaostali, a ve dok je došel vu foteljo prvoga Zagrepčanca ve vidi da je to čistam ozbiljni posel i da tu treba čuda vejč znati nek Tomek zna. I neje dosti z peciklinom hodati na posel. Dok je dohajal, on i jegova družina Pere Kvžice, furt je kričal mi Moremo, mi Moremo, a črez mesec dva se več vidlo da nebrejo, a niti ne znajo. Najgerek sam kak bodo dugo zdržali? Več bi Zagreb do vrha bil zaklajeni z smetjom da ga nega Bandičovoga pajdaša Pripuza, a Tomek se je grozil kak se bode rešil Bandičovih ljudi i Bandičovih kooperantov. Za ve je ne napravil niti jeno niti drugo jerbo jedini šteri znajo delati so Bandičovi negdašji ljudi. Oni znajo, moreji i očejo. Imajo sam jeno falingo: očejo plače!
Kuliko sam mel za čuti pre čakoski gracki vuri još ga je kandidatlinov osim našega Mateka šteri čaka kaj mo Uskoki potpišejo kandidaturo, ali za ve so te kandidature na zadjim stolima vu krčmama ili pak po komorama, škedjima, garažama, pelnicama i o tomo se nej spominal dok ne dojdejo na svetlo dneva. Videl sam par „županov“ za stolima z litrom i vodom, ali to nebre biti preveč ozbiljno makar je vu vino još navek istina. Moramo čakati kaj se izjasnijo i oni šteri pijejo vodo ili pak koka kolo. Do Martinja dok nam bode na stol došlo mlado i spametno vino bodemo se znali i mogli bodemo prebirati i početi zbirati. Županov bode dosti tak da so oni šteri so si gruntali kak namo našli novoga v kmico fritnuli.