Svetla so vgašena, a Španjolci so bili nejbolši
Tak kak je bilo i splanerano Nemci so vgasnoli svetla na sim igrališčima na šterima so se nejbolši EU labodoritaši borili za prvo mesto, za mesto nejbolših labodoritašov Evrope, zlatne želencije i veliki pehar. Nejbolši so bili Španjolci šteri so pobedili v sih sedem utakmici štere so igrali. Tak se to i kazalo od prvoga dneva dok so pobedili naše Vatrene. Mi smo se nadjali da bi Španjolci mogli biti nejbolši jerbo so nas glatko sprašili z 3:0, ali smo se ne nadjali da bodemo mam posle prvoga kruga odišli dimo. Negda, kuliko vidimo, se pripeti onak kak se čovek nadja, a negda je čistam drugač. Verjem da so se niti Nemci ne nadjali kaj se bodo preselili med kibice i to dosti fletno, ali dok jim je Englez Antoni Tejlor ne dofučkal elvera čistoga kak suza unda se je vidlo da niti med labodoritaškim cvetjem ga ne pravice. I još nekaj, čim je englez Tejlor ne dofučkal elvera za Nemce se je vleklo na to, kak je i teca Franca rekla, da bodo ne sam Španjolci nek i Englezi išli dale. I ne sam dale nek čistam do kraja kak se je to i pripetilo. Neje bilo tak zdavnja pak verjem da se zmislite kakšega elvera je sodec Zvajer, i to Nemec, dosodil za Engleze. Si velijo da je sodec zfušal, a kaj to znači Nizozemcima šteri so morali iti dimo, a Englezi, niti krivi niti dužni, vu finale.
No, neje to se kaj se je sfušalo na ovomo evropskomo labodoritaškomo prvenstvo: Španjolci so prvaki jerbo so bili nejbolši, Španjolci imajo nejbolšega igrača i to je bil Rodri, tak je bar UEFA rekla, a si šteri so gledali i pratili EURO 2024 velijo da je to bil naš labodoritaš i Dinamovec vu Španjolki reprezentaciji Dani Olmo. Ne sam da je nejbole rital nek je zabil i tri gole i to one nejglavneše, mel je i dve asistencije i z jenom je rešil pobjedo protiv Dojčlanda. I ne sam to, par minot predi kraja finala protiv Englezov, dok so Španjolci vodili 2:1 z glavom je vudril lopto vum z praznoga gola, očem reči, z gol crte. Ali to se je ne bilo dosti za UEFO kaj bi on bil nejbolši igrač EURA. Olmo si nebre pomoči jerbo so evropski labodoritaški oci presodili drugač.
Več sam vam par pot rekel da se je hajdi čudnih stvari pripetilo na ovomo EURO: sodili so i pederi, ne znati je li so pederi i igrali, sodili so soci šteri so posluhnuli kak tre soditi i saka utakmica je mela nekša svoja pravila. Bar kaj se elverov dotikavle.
Kak sam rekel, svetla so vgašena, si grehi i rezoltati se bodo pozabili jedino bo se pamtilo da so Španjolci bili nejbolši. Nigdi ne bode pisalo što je mel nejveč kibici na tekmi i čiji so kibici bili nejglasneši, čiji so nejveč spili… A laboda se riče, tak bar velijo, za kibice i publiko. Najgerek sam, jako sam najgerek je li se bode nešči zmislil kak so se nejstareši igrači Luka Modrič i Cristiano Ronaldo plakali jerbo so sfušali. I Portugalac Pepe, kak nejstareši, se je plakal, ali po skrivečki.
V Brezovici smo znova zazvedili
Pak smo zazvedili, nejpredi v Brezovici, a posle v Jadovnom, dok smo vidli što je se došel, kak je Lepa Naša v Domovinskomo rato pobedila Jugo i komunizam, a niti dendenes je ne pobedila Jugo i komunizma vu Hrvatima. Hajdi je cajta minulo, ali kuliko vidimo nikaj se je ne spremenilo ili pak jako, jako malo.
Nejmeje kaj morem reči je to da so mi čudni, kaj čudni, jako čudni ljudi te Siščani. Falijo se kak so v junjušo 1941. leta sam jeno vuro posle kak je Dolfi (čitaj: Hitler) napal Staljina zafremali prvoga partizanskoga odreda v Evropi. Ne znam kaj bi vam tu rekel, a niti teca Franca mi tu neče nikaj reči sam čkomi, ali prvi sisački partizanski odred je zapisani prd kraj septembra, a kuliko vidimo ovo v junjušo so priče za malo deco. Još nekaj, pred tri i pol leti je bil potres v Banovini, očem reči, Petrinji i Sisko, a do dneva denešjega je sisačka gradska načelnica teta Ikača Baniček još nikaj ne popravila makar joj je Evropa za hajdi toga dala peneze. I to je tak dauko došlo kaj bode Teta Ikača morala Evropi vrnuti peneze štere je ne znala potrošiti. Tuliko o partizanskomo odredo i obnovi rezrušenih zgradi v Sisko!
Što itak davle građevinske dozvole za cirkve delati?
Nebrete veruvati z čim se se bavi stranaka Moremo, očem reči, oni šteri si gruntajo da se Morejo. Dok se gracki načelnik beloga Zagreb grada hrva z smetjom, šteroga ga, istini za voljo, saki den de se vejč i vejč, jegova Rada Boričova furt ratuje z katolikima šteri molijo i šteri hodajo v cirkvo. Znuom da se ljudi delijo na one štere je stvoril dragi Božek kak i na one šteri so postali od majmuna, ali gospođa Borič, kuliko čujemo i vidimo se bori protiv ovih Božekovih i hujša je nek so bili komunisti. Znamo si da krščanska i katolička vjera, očem reči, Jezoš Kristoš vedri i oblači z ovim našim svetom duže od dve jezere let, a komunisti so se pojavili pred nekaj vejč od 100 let, a došli so po krvavoj cesti. Več sam vam pisal kak so komunisti za nekaj meje od sto let sfondali prek sto milijonov ljudi. Saki on šteri je ne bil na levoj komunističkoj strani odišel je po riti k meši: saki šteri je ne za nas te je protiv nas, a znuomo de je protivnikaj mesto.
Rado Borič smetajo ovi kaj molijo na glavnomo zagrebečkomo placo, smetajo jo oni, i to mladi, šteri v nedeljo idejo v cirkvo, smetajo jo oni šteri delajo i zidajo cirkve, a jiv šteri se znajo, šteri se Morejo nišči nikaj ne pita. Odnegda je bilo da saki moli de oče i za koga oče, a i v Ustavo piše da saki more iti v cirkvo da oče, de oče i ne mora nikaj pitati ove kaj se Morejo, a niti paj Rado Boričovo. Da Jezuš Kristuš nej postojal ne bi opstal na ovomo našemo sveto duže od dve jezere let i ne bi sako nedelo tuliko ljudi, tuliko mladi išlo v cirkvo na mešo. I ne sam to, ljudi šteri molijo jako dobro znajo zakaj molijo, a posebno moški šteri molijo klečečki. Navek je tak bilo, a najbrž je niti denes ne drugač da babe hodajo po šumaj, a moški po cestaj, moški hodajo na molitvo i v cirkvo, a babe kam god očejo.
I predi nek smo se nadjali po celoj Lepoj Našoj so došle velike vručine štere je ne lefko magaditi. Rekel je sosed Tonča: Tak je vroče kaj niti z ljuckom ženom nebreš spati!
