Kam itak z temi ženskimi pimpeki?
Minula je Olimpijada vu Francuskoj v Parizo, posle štere nikaj ne znamo, očem reči, se nam se je pošemerilo. Ne znamo ve šteri je lepši i nježniji spol, šteri je moški, a šteri pak ženski spol. Več se niti ne zna šteri so te šteri se podbrivlejo, a koga pak predstavljajo oni šteri se depilerajo? Ne zna se kaj so oni šteri se polevlejo z rodičinaj farbaj, a kaj pak oni šteri imajo med nogami luleka, očem reči, pimpeka, a kaj pak so oni šteri imajo doli jačkico, a gori pak bregece? Najte me krivo razmeti, ali sosed Tonča se je javil gospono Mateši našemo šefo Hrvackoga olimpijskoga odbora kaj bi on išel v Pariz i kaj bi bil glavni jerbo on more točno reči šteri je športaš moški, a štera pak žensko. Kak je več Zlatko Mateša čovek jako dobroga i mehkoga srca jerbo da je ne takši ne bi se bil sedem pot ženil i otpelal je pajdaša Tončija v Pariz i to ravno k šefima Međunarodnoga olimpijskoga odbora i on je sima tam rekel kak bi on sorteral moške od ženskih. Verjem da i vi znate kaj jim je Tonča rekel? Pak porineš roko med noge i po onomo kaj napetaš presorteraš športaše. Dok jim je Tonča to povedal oni so se žnjega norca naprajli, hitili so se na pod od smeha: tak je to negda bilo, negda je istina bila med nogami, a ve pak je v srco i v duši. Dok so to Tončo rekli unda je stopram Tonča zazvedil kak je osramotil gospona Metešo, Lepo Našo, naše športaše, političare i doktore. Ve bode Tonča z Oporovca spametnim ljudima solil pamet. Moš mislit!
Tončo se je žaruljica v glavi presvetila dok je videl kak je skorom zlatno kolajno vu skoko z motkom odnesla puca štera je z pimpekom zrušila letvico. I to je sreča kaj se je veni zbudil na vreme, dok je skakala ili pak skakal jerbo da se je to ne pripetilo zlatna želencija bi odišla v čistam krive roke, roke skakačice z pimpekom. Kaj nek vam rečem, tu je sam nastradala letvica, a kak je bilo v bokso de so boksačice z pimpekom tukle v glavo ove boksačice bez pimpeka i ne moram vam niti reči što je pobedil! Kaj reči, i pimpeki so počeli rasti na se strane i brez ikšega reda i srama.
Sam dragi Božek kaj je Olimpijada minula pak bode ve jeno vreme mir, a nejvekšega mira bodo mele žene jerbo jim bode pimpek probleme delal dok bodo one štele (?), očem reči, dok bodo ga žene pustile vu svoj međunožni kazneni prostor!
Sima nam je poznato kak so naši vaterpolisti igrali finale na Olimpijadi protiv vaterpolistov Srbije. Predi utakmice so spali z srebrom, a senjali so zlato. Morem vam reči da se je posle utakmice nikaj ne spremenilo i dale spijo z srebrom, a sejajo zlato jerbo so bili malo preslabi kaj bi spali s zlatom!
Tre se dobro dospomenuti…
Bilo je to zdavnja da so se oženili vrtni sosed Pišta i soseda Tilča z druge vulice. Mam po gostuvanjo so se dospomenuli kak bode se odluke štere so važne za skupno živlenje donašal gazda pre hiži, gospon Pišta, a se one odluke štere so nek tak važne za sakodnevno skupno živlenje bo donašala gazdina žena, očem reči, gospa Tilča. Drugo leto v novembro bodo PIšta i Tilča obslužavali pedeset let kak so se oženili i kak se pre jivi hiži ne nikaj važnoga pripetilo.
Što itak vužiže našo Jadransko obalo?
Najgerek sam, jako sam najgerek što itak vožiže drevje i grmje po našoj Jadranskoj obali? Mogli bi reči da dok dojdo nejvekše vručine unda se nekak to drvje i to grmje po Dalmaciji, a i drugdi polek debele vode, vužge. Mortik je to točno, a mortik je i ne? Več hajdi dugo pratim te ogje po našoj obali i nekak mi je v pamet došlo to kak ga nejveč ogjov podežgano malo predi i malo potlik našega Dneva pobjede, Dneva domovinske zahvalnosti i Dneva naših hrvackih braniteljov. Nebre biti točno da se navek instalacije za strujo počnejo kvariti okoli Dneva Oluje, a to smo več zdavnja zazvedili kak se je još nit jeden ogenj ne vužgal od ivanjskih kukcov. I ne sam to, se drugo se zazvedi sam nebremo nikak zazvediti što itak sako leto kuri to suho drevje, grmje i raslinje po našoj obali. Razmem da se negdi nebre zazvediti, ali da ruon nigdi nebremo najti što je vužgal to nebrem veruvati! Pak se mam vidi kak gori čim nešči vužge! Još mi nikak nejde v glavo kak se je nigdar to grmovje ne vužgalo na Brijunima otkak je gazda Rade Šerbeđija. On se je izjasnil da je Hrvat makar so mo japek i mamika Srbi.
Kak se je mam vidlo i mam se je znalo što je vužgal dok je počelo goreti v Imockomo. Mam se je znalo da je to napravil Marko Perkovič Thompson i mam so si levi novinari z prstom pokazali na Thompsona. Čudno je kak so niti jenoga drugoga ne vidli što je de vužgal ogja, a ogjov je bilo nejmeje dvajsti?
Prcinkulovo – nigdar tuliko ljudi
Minulo je Prcinkulovo, glavno čakosko proščeje i kak si velijo (ak si velijo unda to more biti sam istina) da je nigdar ne bilo tuliko ljudi. Od zdavnja znamo da je negdašji čakoski gracki načelnik Štef Kovačov rad brojil ljudi šteri so došli na proščeje i zato je škoda kaj je ne i on bil jerbo bi unda točno znali kuliko je bilo ljudi i je li jiv je bilo vejč nek negda dok je on hercuval z Čakovcom?
Ve poglečte kak je to vtruc došlo, čim ga ne bilo mamreli po Čakovco mam je skorom saki den dežđ curel. Negda i po tripot. Morem deti roko na srce i priznati kak ga bilo čuda sega i ne sam čuda nek i vejč od toga sam mi nikak nejde v glavo zakaj je naše čakosko proščeje moralo biti generalna proba za koprivnički renesansni festival? Pak ne verjem da mi v Čakovco nemamo nekaj svojega kaj nišči nema, a ne kaj moramo kupuvati ono kaj imajo Koprivničanci. Nebrem veruvati da naša čakoska Zrinska garda mora držati špalera Koprivničancima dok se jivi ratniki mačevaju vu grado Zrinskih, očem reči, vu Staromo grado. Ak so naši turistički težaki znali organizerati šezdeset proščeja Prcinkulovoga do denes unda več ve nekaj znajo i bil bi red kaj bi mi v Čakovco, glavnomo grado Međimurja meli nekaj našega čakoskoga i međimorskoga zbog radi čega ljudi dohajajo na proščeje v Čakovec grad Zrinskih. Najbrž to ne mora biti Halid Bešlič jerbo je on ne naše vere, to ne morajo biti fritule jerbo to moja mamica ne kuhajo ili pak langoši i to po pet ojerov. Ak je i to glavno proščeje pet ojerov za langoš je prek preveč! Bole da mi prejdemo na nekaj domače: pogače z tikvaj, jabukami, orehi, zeljom ili pak sirom… Em je domače i čuda faleše od pet ojerov!
